Нийслэлийн 375 жилийн ойд зориулсан үндэсний бөхийн барилдаан өчигдөр Монгол бөхийн өргөөнд болж өндөрлөв. 1994 оноос хойш жил бүр уламжлал болон зохиогдсоор ирсэн энэхүү барилдаанд Архангай аймгийн Булган сумын харьяат Алдар спорт хороо, Бөхбилэгт дэвжээ, Их засаг их сургуулийн бөх улсын өсөх идэр начин Р.Пүрэвдагва найм даван түрүүлж, Увс аймгийн Ховд сумын харьяат Увснуур дэвжээ, Химон констракшны бөх улсын арслан Н.Батсуурь үзүүрлэжээ.
Тус барилдаанд С.Мөнхбат, улсын арслан Х.Мөнхбаатар, Н.Батсуурь, П.Бүрэнтөгс, улсын гарьд Б.Гончигдамба, улсын заан Ч.Санжаадамба, Д.Баасандорж, Б.Батмөнх, Б.Соронзонболд тэргүүтэй 224 бөх зодоглосон байна.
Монгол Улсын Ерөнхийлөгч Ц.Элбэгдорж хүмүүсийн оюун ухаан, авъяас билэг, хөдөлмөр, зүтгэлээр цогцлон бүтээгдэж, хэмжээ далайц, чанар, техник технологийн түвшингээрээ дэлхийн жишигт хүрч, Монгол Улсын өрсөлдөх чадварыг нотолж чадсан бүтээн байгуулалтыг дэмжин алдаршуулах талаар иргэд, байгууллагуудын гаргасан саналыг үндэслэн “Үндэсний бүтээн байгуулалтын дээд шагнал-Төрийн гэрэгэ” шагналыг олгох зарлигыг 2010 онд гаргаж байсан. Үүний дагуу Нийслэлийн ЗДТГ-аас Улаанбаатар хотын хөгжил дэвшилд томоохон бодитой хувь нэмэр оруулсан, олон улсын стандарт, шаардлагад нийцсэн орчин үеийн техник технологийн шинэ шийдэлтэй, бүтээн байгуулалтыг цогцлоосон шилдэг аж ахуйн нэгж, байгууллагыг шалгаруулах зорилгоор “Нийслэлийн бүтээн байгуулалтын дээд шагнал” гардуулах ёслолын ажиллагааг Нийслэлийн 375 жилийн ойг угтан 2 дахь жилдээ зохион байгууллаа. Энэхүү үйл ажиллагаанд Нийслэлийн Засаг дарга бөгөөд Улаанбаатар хотын захирагч Э.Бат-Үүл, Нийслэлийн орлогч дарга нар, Нийслэлийн ЗДТГ болон хэрэгжүүлэгч агенлагууд, Нийслэлийн дүүргүүд, Яамдууд, Гадаадаас уригдсан зочид төлөөлөгчид, Олон улсын байгууллагууд, аж ахуйн нэгжийн төлөөллүүд оролцлоо.
Арилжааны банкуудын нэхэмжлэлтэй ШӨХТГ-д холбогдох асуудлыг хэлэлцэх анхан шатны шүүх хурал өнөөдөр захиргааны хэргийн шүүхэд болно.Уг шүүх хурал энэ сарын 15-нд болох байсан ч Капитал банк, Улаанбаатар хотын банк шүүх хуралдаанд ирээгүй, Хас банк, Капитрон банк төлөөлөгч, өмгөөлөгч оролцуулах хүсэлт гаргасан шалтгаанаар өнөөдрийг хүртэл хойшлуулсан юм.
Өнөөдөр Нийслэл хот үүсэн байгуулагдсаны түүхт 375 жилийн ой тохиож байна. Энэ хүрээнд баяр ёслолын олон арга хэмжээ зохион байгуулахаар төлөвлөөд байгаа. Баярын үйл ажиллагааны эхлэл болох баярын парад Чингисийн талбайд нээлтээ хийж байна. Баярын жагсаалд УДЭТ-ын хамт олноос эхлээд манай урлаг соёлынхон оролцож буй аж. Баярын жагсаал болохтой холбоотойгоор Чингисийн талбайн баруун талын уулзварыг өнөөдөр 24:00 цаг хүртэл хаана. Харин талбайн зүүн талын уулзварыг өнөөдөр 10:00–13:00 цагийн хооронд, Амарын гудамжнаас МУБИС-ийн уулзвар хүртэлх замыг өдрийн 14:00 цаг хүртэл тус тус хаахаар болсон.
Хууль сахиулахын их сургуулиас санаачлан Европын аюулгүй байдал хамтын ажиллагааны байгууллага /ЕАБХАБ/-ын Терроризмтэй тэмцэх газраас “Террорист үйл ажиллагаанд интернэтийг ашиглаx ба цаxим гэмт хэрэг” сэдэвт сургалт өнөөдөр Хуульзүйн үндэсний хүрээлэнд болж байна. Сургалтад таван орны 30 гаруй төлөөлөгч оролцож , цахим ертөнцийг терорист үйл ажиллагаанд хэрхэн ашиглаж байгаа, тэдгээрээс урьдчилан сэргийлэх арга замууд, сүүлийн үед цахим ертөнцөд гарч байгаа хэргийн аюул заналхийлэл, үндэсний хэмжээнд мөрдөж байгаа хууль тогтоомж, түүнд тулгарч буй бэрxшээлүүд сэдвээр өрнөх аж. Мөн цаxим гэмт хэрэгтэй тэмцэу буй олон улсын туршлага сэдвээр хэлэлцүүлэг хийнэ. Сургалт хоёр өдөр үргэлжилж, маргааш өндөрлөнө.
Хэнтий аймгийн Бор – Өндөр тосгонд зэс хайлуулах үйлдвэр барихаар болжээ. Салбарын яамнаас сайтар судалсны эцэст тус сумыг сонгосон ажээ. Хүхрийн хүчлийг зэстэй хольж боловсруулах түүхий эд нь Бор – Өндөртэй ойролцоо байдаг. Тус үйлдвэрийг 300 – 400 орчим ам.долларын хөрөнгө оруулалтаар 2015 – 2018 онд барьж ашиглалтанд оруулах боломжтой гэсэн тооцоо гаргажээ. Мөн Бор – Өндөрөөс гадна өөр хэд хэдэн газарт хувийн хэвшлийнхэн зэс хайлуулах үйлдвэр байгуулах саналаа ҮХААЯ –нд ирүүлээд байгаа гэнэ.
Нийслэлийн 375 жилийн ойн хүрээнд нийслэлд үйл ажиллагаа явуулдаг төрийн болон төрийн бус 32 асрамж, халамж үйлчилгээний төвийн 1000 гаруй хүүхдүүдэд нийслэлийн удирдлагууд хүндэтгэл үзүүлж, нийслэлийн 375 жилийн ойн баярын бэлэг гардууллаа. Энэ үеэр нийслэлийн Засаг дарга бөгөөд Улаанбаатар хотын Захирагч Э.Бат-Үүл “Юуны өмнө Монгол Улсын ирээдүй болсон хүүхэд багачууд та бүхэндээ, Улаанбаатар хот байгуулагдсаны 375 жилийн ойн баярын мэндийг хүргэж, үргэлж та нартаа баярлаж явдгаа хэлмээр байна. Мөн манай бяцхан иргэдийн төлөө ажилладаг сурган хүмүүжүүлэгч багш нартаа талархал илэрхийлье. Их хотын ирээдүйн эзэд та нартаа бид хайртай шүү” хэмээн онцлон хэллээ. Хүүхэд, багачуудад Монголын Хүүхдийн ордоны авъяаслаг уран бүтээлч хүүхдүүд урлагийн тоглолтоор бэлэг барилаа гэж Нийслэлийн ЗДТГ-ын Хэвлэл мэдээлэл, олон нийттэй харилцах хэлтсээс мэдээллээ.
–