Month: October 2014

Дүүргийн нэгдүгээр прокурорын газраас УИХ гишүүн асан Д.Дондог болон түүний туслах Д.Сайнбаяр, А.Батбилэг, Д.Ширнэндорж, А.Ариунболд нарт ЭХТА-ийн 148.3, 148.4, 149.3 дах хэсгүүдэд заасан гэмт хэрэгт тус тус яллах дүгнэлт үйлдэж ирүүлсэн эрүүгийн хэргийг Дүүргийн Эрүүгийн хэргийн анхан шатны нэгдүгээр шүүх дээр өнгөрөгч наймдугаар сард хянан шийдвэрлэсэн.

Тэгвэл өнөөдөр тэдний давж заалдах шатны шүүх хурал Давж заалдах шатны аравдугаар шүүхэд болж шийдвэрээ гаргалаа.

Шүүхээс энэхүү хэргийг нэмэлт мөрдөн байцаалтад буцааж, Д.Дондогийн таслан сэргийлэх арга хэмжээг өөрчилөн, бусдыг нь гадуур байцаахаар болсон байна.

Нийслэлийн 375 жилийн ойд зориулсан шинэ номын нээлт өнөөдөр Blue moon арт галерейн үзэсгэлэнгийн танхимд боллоо. Дөрвөн боть бүхий нийслэлийн түүхийг агуулсан шинэ номыг МСГЗ, Төрийн шагналт зохиолч Д.Төрбат ариутган шүүж, Ардын уран зохиолч, Соёлын гавьяат зүтгэлтэн П.Бадарч, АУЗ, СГЗ Ш.Дулмаа, АУЗ, СГЗ До.Нямаа тэргүүтэй зохиолчид өмнөтгөл бичижсэн аж. Номын баярын нээлтэнд нийслэлийн удирдлагууд, номын зохиогчид, нийслэлийн болон улсын архив, номын сангийн удирдлага, мэргэжилтнүүд оролцсон юм. Нийслэлийн хотын түүх, соёл, барилга байгууламж хийгээд өнгөө цагийн өнгө төрхийг илтгэсэн гэрэл зураг, уран бүтээлийн шилдэг түүврийн дөрвөн боть ном хэвлэгдэн гарч уншигчдийн гарт хүрж байгаа аж. Эдгээр бүтээлийг хийж гүйцэтгэсэн уран бүтээлчид хэлэхдээ “Бид хамтран хуучин түүхийг шинэчилж бүтээлээ. Энэ бол маш их хүч хөдөлмөр, ур ухаан, цаг хугацаа, итгэл зүтгэлийн үр дүнд бий боллоо. Оюутан залуус, хүүхэд багачууддаа нийслэлийн түүхийг баринтаглан үлдээж байгаадаа баяртай байна” гэсэн бол Нийслэлийн ИТХ –ын дарга Д.Баттулга “Бид ямар цаг үед, ямар газар амьдарч байгаагаа мэддэг байх хэрэгтэй. Монгол улсын нийслэл Улаанбаатар хотыг дэлхийн хэмжээний хот болоход энэхүү бүтээлүүд түүхийн хувьд маш үнэт баталгаа байх болно. Бидний бүтээсэн түүх дурсгалуудустаад байгаа юм бишүү гэдэг үндэслэлээр энэхүү чухал номуудыг бүтээсэн юм. Энэ бол нийслэлийн ард иргэд болон удирдлагуудын зүгээс хотынхоо түүхийг, өв соёлыг байгаагаар нь авч үлдсэний том илэрхийлэл гэж бодож байна” хэмээсэн юм. Ийнхүү номын нээлтийн дараа номынхоо үзэсгэлэнтэй танилцсан билээ.

З.Батхуяг

Нийслэлийн ИТХ-аар батлагдсан “Ухаалаг Улаанбаатар” хөтөлбөрийн хүрээнд Хотын захиргаа дэлхийн мэдээллийн технологийн тэргүүлэгч Google компанитай албан ёсоор хамтран ажиллахаар болж, нийслэлийн Засаг дарга бөгөөд Улаанбаатар хотын Захирагч Э.Бат-Үүл, Google компанийн Ази Номхон далай, Ойрхи дорнод, Африк, Орос дахь Засгийн газрын асуудал хариуцсан Ерөнхий захирал Susan Pointer нар хамтран ажиллах санамж бичиг байгууллаа. Хамтын ажиллагааны хүрээнд Улаанбаатар хотыг дэлхий нийтэд танилцуулж, аялал жуулчлалыг дэмжиж, эдийн засгийн өрсөлдөх чадварыг хөгжүүлэх зорилгоор Google Map, Google Street View, Google Culture Institute, Google Art project төслүүдийг хэрэгжүүлнэ. Эдгээр ажлын эхлэх болох Улаанбаатарын зураглалыг Google Street View – д оруулах нээлтийн үйл ажиллагаа Их эзэн Чингис хааны талбайд боллоо. Google компанитай 2 жил орчмын хугацаанд хамтран ажиллаж төслийн туршилтыг бүрэн хийсний үндсэн дээр Улаанбаатар зураглалыг албан ёсоор оруулж байгаа юм. Ингэснээр дэлхийн аль ч цэгээс гар утас болон компьютер ашиглан хотын бүх гудамж талбай, музей, ресторан, барилга байшин дотор аялах боломжтой боллоо.
Нээлтийн үйл ажиллагаанд УИХ-ын дарга З.Энхболд, Google компаний Ази Номхон далай, Ойрхи дорнод, Африк, Орос дахь Засгийн газрын асуудал хариуцсан Ерөнхий захирал Susan Pointer, Нийслэлийн Засаг дарга бөгөөд Улаанбаатар хотын Захирагч Э.Бат-Үүл, нийслэлийн ЗДТГ-ын дарга Ё.Гэрэлчулуун, Нийслэлийн Мэдээллийн технологийн газрын дарга Б.Бат-Өлзий болон Ухаалаг Уланбаатар төслийн ажлын хэсгийнхэн, бусад албаны төлөөлөгчид, нийслэлийн иргэд оролцсон юм.
УИХ-ын дарга З.Энхболд нээж хэлсэн үгэндээ “Улаанбаатар хотыг Дэлхийн хот болгон хөгжүүлэх боломжийг олгож байгаа Google компанид талархал илэрхийлж, Мэдээллийн технологи ашиглан хөгжлөө урагшлуулж Дэлхийн томоохон хотуудын жишигт хүрэх зорилтоо хэрэгжүүлэхээр бүс нутгаа тэргүүлэн ажиллаж байгаа Нийслэлийн Засаг дарга Э.Бат-Үүлд баяр хүргэлээ.
Харин Нийслэлийн Засаг дарга бөгөөд Улаанбаатар хотын Захирагч Э.Бат-Үүл “Бид төв Азиас анхдагч болж Улаанбаатар хотоо Google Street View-д нэвтрүүллээ. Ингэснээр Улаанбаатар хотын дэлхийн хотуудтай өрсөлдөх чадвар нэмэгдэж, нэг алхам урагшилж байна. Хамгийн өрсөлдөх чадвартай, өндөр технологийн интернэтийн орчин бүрдсэн хот болох зорилтдоо хүрэхэд ойрхон байгааг энэ үйл ажиллагааг харуулж байна” гэлээ
Энэ үеэр Google компанийн Ази Номхон далай, Ойрхи дорнод, Африк, Орос дахь Засгийн газрын асуудал хариуцсан Ерөнхий захирал Susan Pointer Google компанийн албан ёсны тугийг нийслэлийн Засаг даргад гардуулсан юм.
Өнөөдрөөс эхлэн Улаанбаатар хотод Google Maps-д зориулсан 360 градус зураглал цуглуулах Street View-ийн машиныг явуулж эхлэнэ. Одоогийн байдлаар Street View нь дэлхийн 61 оронд нэвтэрсэн бөгөөд тус орнуудад, хэрэглэгч нь газрын зургийн зүүн гар талд байрлах улбар шар өнгийн тэмдгийг чирч хөх өнгөөр онцолсон гудамж дээр эсвэл Google Maps дээрх хамгийн ойр нарийвчилсан түвшинрүү татах замаар гудамжны түвшний зураглалруу хандаж болно. Төслийг гүйцэтгэхэд шаардлагатай хөрөнгийг нийслэлээс бүрэн шийдвэрлэсэн гэж Нийслэлийн ЗДТГ-ын Хэвлэл мэдээлэл, олон нийттэй харилцах хэлтсээс мэдээллээ.

Нийслэлийн цагдаагийн газрын харьяа Түр хамгаалах байранд дуудлага авах 107 тусгай дугаар ажиллаж эхэллээ. Энэхүү дугаараар Гэр бүлийн хүчирхийллийн талаархи бүх төрлийн мэдээлэл дуудлагыг авах юм.

Гэр бүлийн хүчирхийлэлд өртсөн эсвэл хүчирхийлэлд өртөх магадлалтай хохирогч, түүний бага насны хүүхдийг хамгаалах ажлыг Нийслэлийн Цагдаагийн газрын харьяа тус Түр хамгаалах байранд явуулж байна. Энэ төв нь 24 цагаар үйл ажиллагаа явуулж хохирогчдыг 3-10 хоног байрлуулан тэдэнд сэтгэл зүйн зөвлөгөө, туслалцаа үзүүлж байна.

Гэр бүлийн хүчирхийлэл гарахаас урьдчилан сэргийлэх, хохирогчдыг хамгаалах чиглэлээр Хууль зүйн яам, харьяа байгууллагууд чиглэл чиглэлээр ажиллаж байна. Тухайлбал, Хууль зүйн яамны харьяа Шүүхийн Шинжилгээний Үндэсний Хүрээлэнгийн Шүүх эмнэлгийн дэргэдэх Гэр бүлийн болон бэлгийн хүчирхийлэлд өртөгсдөд үйлчлэх Нэг цэгийн төвд хохирогчдод эмнэлгийн болон сэтгэл зүйн туслалцаа үзүүлж байна гэж Хууль зүйн яамнаас мэдээллээ.

Америк дахь Монголчуудын Хөдөлмөрийн Яармаг 10 дугаар сарын 11,12-ны өдрүүдэд АНУ-ын Чикаго хотод болжээ. Тус арга хэмжээг Монгол Улсын Хөдөлмөрийн Яам, Хөдөлмөрийн Төв Бирж, АНУ-д үйл ажиллагаа явуулж буй зургаан хотын Монгол оюутны холбоод, Монгол Улсаас АНУ-д суугаа Элчин Сайдын Яам хамтран зохион байгуулсан бөгөөд нийт 200 гаруй оюутан, залуус, Монголын болон АНУ-ын банк, мэдээлэл технологи, хөдөлмөр зуучын компани зэрэг 10 гаруй байгууллага оролцов. Арга хэмжээг нээж ЭСЯ-ны Ерөнхий консул Б.Мөнхжаргал, Хөдөлмөрийн төв биржийн дэд захирал Э.Ган-Эрдэнэ, “Хүний хөгжил” ТББ-ын тэргүүн Г.Галбадрах нар оюутан залууст хандаж үг хэлжээ.

Хөдөлмөрийн яармагийн эхний өдөр арга хэмжээнд оролцогчдын мэдлэгт дусал нэмэх үүднээс Висконсоны Их Сургуульд Улс төр судлалын чиглэлээр докторантаар суралцаж буй У.Дэлгэржаргал өөрийн туршлагаа хуваалцаж лекц уншсан байна. Мөн Колумбын Их сургуулийн төгсөгч Б.Мөнх-Эрдэнэ, “Apple” компанийн ажилтан Энх-Амгалан, НИТХ-ын төлөөлөгч Ц.Баатархүү, Висконсны Их Сургуулийн докторант У.Дэлгэржаргал нар оюутан залуустай чөлөөт ярилцлага хийж хийж, ажлын ярилцлаганд хэрхэн бэлдэх, намтараа хэрхэн зөв бичих талаар зөвлөгөө өгч, ажлын карьераа оновчтой сонгох талаар сургалт, нээлттэй хэлэлцүүлгийг зохион байгуулсанаас гадна оюутнуудын дунд кейс стади тэмцээнийг зохион байгуулсан юм. Хөдөлмөрийн яармагын хоёр дахь өдөр ажил олгогч компаниуд нээлттэй ажлын байрнуудынхаа тухай дэлгэрэнгүй мэдээллийг өгч, ажилд орох хүсэлтэй оюутан залуустай ганцаарчилсан уулзалт, ажлын ярилцлага хийжээ.

Хөдөлмөрийн яармагийн гол зорилго нь АНУ-д тэргүүлэгч их дээд сургуулийг төгсөгч болон одоо суралцаж буй оюутан, залуусыг Монголын болон АНУ-ын томоохон аж ахуй нэгж, компаниудтай холбох ба энэхүү Хөдөлмөрийн Яармагт оролцогчид арга хэмжээг үндсэн зорилгодоо хүрч чадсан, үр өгөөжтэй арга хэмжээ боллоо гэж дүгнэж байлаа. Тус арга хэмжээг жил бүр уламжлал болон зохион байгуулах бөгөөд цаашид хамрах хүрээгээ улам бүр тэлж АНУ-д ажиллаж, сурч буй Монгол оюутан залуусыг хамруулахыг зорьж ажиллахаа мэдэгдэв.

Хөдөлмөрийн яармагтай холбоотой дэлгэрэнгүй мэдээлэл авахыг хүссэн байгууллага, хувь хүмүүс http://careerfair.oyutan.org/mn/index, jobfair@oyutan.org хаягаар холбогдох боломжтой юм.

Монгол Улсын Ерөнхийлөгч Ц.Элбэгдоржийн Австри, Унгар улсад хийж буй айлчлалын бүрэлдэхүүнд Үйлдвэр, хөдөө аж ахуйн яамны төлөөлөгчид оролцон эдгээр улстай үйлдвэр, хөдөө аж ахуйн салбарт хамтран ажиллах боломжийн талаар танилцуулж холбогдох уулзалтыг хийжээ.

Үйлдвэр, хөдөө аж ахуйн дэд сайд Ц.Туваан Унгар Улсын Хөдөө аж ахуйн дэд сайдтай уулзан хоёр орны хөдөө аж ахуйн салбарын уламжлалт хамтын ажиллагааг сэргээн хөгжүүлэх, хамтын ажиллагааны боломжтой чиглэлүүдийн талаар санал солилцсон байна.
Уулзалтын үр дүнд Монгол Улсад эрчимжсэн үхрийн аж ахуйг хөгжүүлэхэд хувь нэмрээ оруулах зорилгоор загвар фермийн аж ахуй байгуулах, явуулын мах нядалгааны цех нийлүүлэх, махны боловсруулах үйлдвэрийн салбарт евро стандартыг нутагшуулах, Био үйлдвэрт технологийн шинэчлэл хийх боллоо. Мөн монголын хөдөө аж ахуйн мэргэжилтнүүдийг Унгарт дадлагажуулах, сургахад хамтран ажиллах боломжтой гэдэгт хоёр тал санал нэгдлээ.

Монгол Улсын Ерөнхийлөгчийн айлчлалын хүрээнд зохион байгуулагдсан Бизнес форумд “Монгол Улсын Үйлдвэр, хөдөө аж ахуйн салбарын хөгжил, хамтын ажиллагаа, нөөц боломж” сэдвээр илтгэл тавьсан нь Австри, Унгарын бизнес төлөөлөгчдийн сонирхлыг татсан аж.