Month: September 2014

Олныг цочроосон аймшигт хэргүүд гарсаар
байна. 2014 оны 9 сарын 22-ны орой Орхон аймгийн статистикийн хэлтсийн
мэргэжилтэн албан ажлаа хийж яваад бусдын гарт хэрцгийгээр амиа алдсан
хэрэг гарчээ. Хохирогч бүсгүй 30 гаруй настай бага насны хүүхэдтэйгээ
амьдардаг байсан аж. Тэрбээр Хөдөлмөрийн яамнаас явуулж байсан
судалгаагаар Орхон аймгийн Баян-Өндөр сумын Цагаанчулуут багийн оршин
суугч 30 орчим насны эрэгтэй “Б”-ийн гэрт 16 цагийн орчим орсон бөгөөд
ийнхүү айлын гэрт амиа алджээ.  

Сэжигтэн “Б”  нь сэтгэцийн өвчтэй бөгөөд
2006 оноос хойш энэхүү өвчнөөр өвчилж, аавынхаа хараа хяналтад
амьдардаг байжээ. Хэрэг гарах үеэр аав нь ажилдаа явсан “Б” гэртээ
ганцаараа байсан бөгөөд хохирогчыг 5 удаа хутгалан амь насыг нь
хохироосон гэсэн мэдээлэл байгаа юм. 18 цагийн орчим аав нь ажлаасаа
ирэхэд хохирогчийн цогцосыг нуусан байсан бөгөөд аавыгаа бензин авч
ирэхийг шаардаж авч ирэхгүй бол “ална” гэх мэтээр сүрдүүлсэн байна.
Улмаар аав нь бензин авч ирнэ гэж гараад цагдаад мэдэгдэж уг хэрэг
илэрсэн байна. Төрийн нэрийн өмнөөс ажлаа хийж явсан нэг иргэн
харамсалтайгаар амиа алдлаа хэргийг Орхон аймгийн цагдаагийн газар
эрүүгийн хэрэг үүсгэн шалгаж байгаа бөгөөд  сэжигтэнд цагдан хорих,
таслан сэргийлэх арга хэмжээ авчээ.

 Хэргийн газрын үзлэг болон хойшлуулшгүй
ажиллагаанд аймгийн прокурор Цагдаагийн газрын дарга нар оролцож хяналт
тавьж ажиллажээ. Нутгийн захиргааны байгууллага харьяа нутаг
дэвсгэрийнхээ хэмжээнд гэмт хэрэг, нийгмийн хэв журмын зөрчлөөс
урьдчилан сэргийлэх арга хэмжээг авч хэрэгжүүлэх үүрэгтэй бөгөөд энэ
ажлын хүрээнд нутаг дэвсгэрийнхээ гэмт хэрэг зөрчилд орж болзошгүй болон
бусад бүх төрлийн судалгааг хийж байх ёстой. Иймд цаашид ард иргэдээс
судалгаа авах тохиолдолд тухайн нутаг дэвсгэрийнхээ багийн холбогдох
албан тушаалтнуудад мэдэгдэж хамтран зохион байгуулж байх, 
ажилтнуудынхаа аюулгүй байдлыг хангаж ажиллахыг Орхон аймгийн прокурорын
газраас анхааруулсан  байна.

Гадаад харилцааны сайдын санаачилгаар “Бүтээлч хамтын
ажиллагаа” сэдэвт хилийн чанад дахь монголчуудын холбоод, ТББ-уудын чуулга
уулзалт болон Британийн монголчуудын үүсгэн санаачилсан “Монгол орны хөгжилд”
10 дугаар чуулга уулзалтыг хамтатган 9 дүгээр сарын 18-19-ний өдрүүдэд ГХЯ-нд
амжилттай зохион байгууллаа.

Чуулга уулзалтанд хилийн чанад дахь монголчуудын холбоо,
ТББ-уудын төлөөлөл 93, “Цахим өртөө” холбооны илтгэгч, судлаач 38, дотоодын
байгууллагын (яам, агентлаг) 22 төлөөлөгч, онлайнаар бүртгүүлсэн 42 нийт 195
хүн оролцов.

Нэгдсэн чуулганаас 4 зүйл заалт бүхий протоколыг нийт
төлөөлөгчдийн 98 хувийн саналаар дэмжин баталж, чуулганы мөрөөр хэрэгжүүлэх
хөтөлбөр, төлөвлөгөөг  2014 оны 11 дүгээр
1-ний дотор гаргах, дараагийн чуулга уулзалтыг 2016 оны 9 дүгээр сард зохион
байгуулахаар тогтов.

“Монгол орны хөгжилд” 10 дугаар чуулга уулзалтын хүрээнд
“Өндөр технологи”, “Нийгмийн эрүүл мэнд”, “Шинжлэх ухаан, боловсрол, танин
мэдэхгүй”, “Бизнес эрхлэлт”, “Урлаг, соёлын менежмент” сэдэвт салбар
хуралдаанууд хуралдаж, зөвлөмж гаргасан байна.

Нийт оролцогч, төлөөлөгчдийн зүгээс чуулга уулзалтын
хамрах хүрээ, зохион байгуулалт, хүрсэн үр дүнд сэтгэл өндөр байгаагаа
илэрхийлж, цаашид Монгол Улсын төрөөс хилийн чанад дахь Монголчуудын холбоод,
ТББ-уудыг бодитой дэмжих, төрийн зарим үүргийг ТББ-дад гэрээний үндсэн дээр
хариуцуулан, бүтээлчээр хамтран ажиллах маш том эхлэл суурь тавигдсанд талархаж
байв.

Чуулганы хоёр дахь өдөр
монголчуудын холбоод, ТББ-ынхан хуралдаж, “Хилийн чанад дахь Монголчуудын
холбоо, ТББ-уудын нэгдсэн зөвлөл”-ийг байгуулан, зөвлөлийн дүрмийг хэлэлцэн
баталсан бөгөөд тив тивийн төлөөлөл 9 хүний бүрэлдэхүүнтэй Удирдах зөвлөлийг
сонгон, УЗ-ийн даргаар Швед дэхь Монголчуудын үндэсний холбоо, Европ-Монголын
нийгэмлэгийн тэргүүн Н.Номун-Эрдэнийг 100 хувийн саналаар сонгосон байна.

Тодорхой асуудал хариуцсан салбар хороодыг байгуулах,
нэгдсэн зөвлөлийн нарийвчилсан бүтцийг ойрын хугацаанд гаргаж, хилийн чанадад
үйл ажиллагаа явуулж буй 114 ТББ-аар хэлэлцүүлэн батлахаар тогтов.

ГХЯ-ны Төрийн нарийн бичгийн дарга Б.Болдбаатар
төлөөлөгчдийг 2014 оны 9 дүгээр 22-ны өдөр хүлээн авч уулзан, чуулга уулзалтын
үр дүн, цаашдын зорилго, зорилтын талаар санал солилцож, шинэ байгуулагдсан
Нэгдсэн зөвлөлийн үйл ажиллагаа, төр, төрийн бус байгууллагын дэвшилтэт хамтын
ажиллагаанд өндөр амжилт хүсч, хилийн чанад дахь монголчуудын холбоо,
ТББ-уудаас төрд дуу хоолойгоо хүргэхэд нь боломжтой бүх талын дэмжлэгийг үзүүлж
ажиллахаа  илэрхийлэв.

Монголын нутгийн удирдлагын холбооны
20 жилийн ой энэ өдрүүдэд тохиож байгаа аж. Үүнтэй холбогдуулан УИХ-ын гишүүн,
Монголын нутгийн удирдлагын холбооны тэргүүн Су.Батболд сэтгүүлчдэд мэдээлэл
өглөө. Уг холбоо нь Монгол Улсын нутгийн удирдлагын тогтолцоог  Үндсэн хуулийн үзэл баримтлалын хүрээнд
төлөвшүүлэн хөгжүүлж бэхжүүлэх, нутгийн захиргааны болон нутгийн өөрийн
удирдлагын байгууллагуудын нийтлэг эрх ашгийг хамгаалах, тэдгээрийн хоорондын
хамтын ажиллагааг дэмжих, үйл ажиллагааны ололт амжилтыг сурталчлах, дэмжлэг
үзүүлж үйлчлэх зорилгоор 1994 онд анх байгуулагджээ. 20 жилийн хугацаанд
холбооноос нутгийн удирдлагын чиглэлээр томоохон семинар, сургалт, чуулга
уулзалтыг зохион байгуулж ирсэн. Энэ удаад ч түүхт ойгоо баяр ёслолын биш ажил
хэрэгч байдлаар тэмдэглэн өнгөрүүлэх зорилгоор УИХ-ын Төрийн байгуулалтын
байнгын хороотой хамтран энэ сарын 26-нд “Нутгийн удирдлагын хөгжлийн хандлага”
сэдэвт хэлэлцүүлэг ярилцлагыг зохион байгуулах юм байна. Хэлэлцүүлгээр нутгийн
өөрөө удирдах ёсны байгууллагын чиг хандлага, УИХ болон орон нутгийн сонгуулийн
хуулийн өөрчлөлт, Засаг захиргаа, нутаг дэвсгэрийн нэгж, түүний удирдлагын
тухай хуулийг өнөөгийн нөхцөл байдалд үндэслэн хэрхэн өөрчлөх боломжтой вэ
гэдэг гурван үндсэн асуудлыг хөндөн ярилцах ажээ. Төрийн ордонд болох энэхүү
хэлэлцүүлэгт орон нутаг, нийслэлийн 250 гаруй төлөөлөгч оролцоно.

Энэ талаар Су.Батболд гишүүн хэлэхдээ “Манай холбоо
нь ардчиллыг бэхжүүлэх, орон нутаг дахь улстөрчдийг бэлтгэх, нутгийн өөрөө
удирдах ёсны байгууллага болох аймаг, нийслэл, сум, дүүргийн ИТХ, нутгийн
захиргааны байгууллага болох аймаг, нийслэл, сум, дүүргийн ЗДТГ-ын үйл
ажиллагааг чиглүүлэх, бие даасан байдлыг хангах, санхүү, төсөв, боловсон хүчний
талаар эрх мэдэлтэй болгоход чиглэсэн үйл ажиллагаа явуулдаг. Нэг талаас төрийн
чиг үүргийг гүйцэтгэдэг байгууллага. Учир нь холбооноос явуулж байгаа үйл
ажиллагаа нь Үндсэн хуульд нутгийн тунхагласан өөрөө удирдах ёсны болон нутгийн
захиргааны байгууллагад дэмжлэг үзүүлэхэд чиглэгддэг. Нөгөө талаас Нутгийн
удирдлагын холбоо нь Засгийн газрын сөрөг хүчин маягаар үйл ажиллагаа явуулдаг.
Яагаад гэвэл төвлөрлийг сааруулах, орон нутгийн эрх мэдлийг өргөтгөх чиглэлээр
байнгын идэвхтэй үйл ажиллагаа явуулдаг. Орон нутгийн улстөрчдийг бэлтгэх,
ИТХ-д сонгогдсон төлөөлөгчдийн үйл ажиллагааг идэвхжүүлэх, ямар чиг үүрэг
зорилготой сонгогдсон, нутгийн захиргааны байгууллагатай хэрхэн хамтран
ажиллах, орон нутгийн хөгжлийн төлөө юу хийх вэ гэдэг чиглэлээр тасралтгүй үйл
ажиллагаа явуулж ирсэн” гэлээ.

Өнгөрсөн 20 жилийн хугацаанд эл холбоо нь зургаан
удаагийн сонгуулийн бүрэн эрхийн хугацааны нутгийн өөрөө удирдах байгууллагад
ажиллагсдыг сургаж дадлагажуулах, нийтлэг эрх ашгийг нь хамгаалах, ололт
амжилтыг нь сурталчлах, мэргэшүүлж дадлагуулах ажлыг хийсээр иржээ. Хамтын
энэхүү үйл ажиллагааны үр дүнд Засаг захиргаа, нутаг дэвсгэрийн нэгж, түүний
удирдлагын тухай хуульд долоон удаа нэмэлт, өөрчлөлт оруулсан байна.

Тус холбооноос “Нутгийн удирдлага” сэтгүүлийг
эрхлэн гаргаж байгаа бөгөөд мөн 20 жилтэйгээ золгож байгаа аж.