Month: July 2014

Categories
мэдээ нийгэм

Өнөөдөр таван шар мэнгэтэй хар бар өдөр

Аргын тооллын долдугаар сарын 30. Буд гариг. Билгийн тооллын 3. Таван шар мэнгэтэй хар бар өдөр. Өдрийн наран 05.32 цагт мандаж 20.28 цагт жаргана. Тухайн өдөр нохой жилтнээ аливаа үйлийг хийхэд эерэг сайн ба могой, морь жилтнээ сөрөг муу нөлөөтэй тул элдэв үйлд хянамгай ханд. Эл өдөр ан гөрөө хийх, мал адгуус муулах, сүм дуганыг сэргээх, хот балгадын үйл, цэрэг цагдаагийн үйл, гэр, байшингийн суурь тавихад сайн. Золиг гаргах, бөө, удганы үйлд муу. 

Өдрийн сайн цаг нь хулгана, үхэр, луу, могой, хонь, нохой болой. Хол газар яваар одогсод хойш мөрөө гаргавал зохистой. Тэрсүүд өдөр. Үс шинээр үргээлгэх буюу засуулбал эд малтай, баялаг төгс болно.

Categories
мэдээ нийгэм

Цусны эмгэг, хорт хавдартай хүүхдүүдэд зориулсан эмнэлэг удахгүй нээгдэнэ

Эх, хүүхдийн эрүүл мэндийн төв (ЭХЭМҮТ)-ийн хашаанд цусны эмгэг, хорт хавдартай хүүхдүүдэд зориулсан эмнэлэг барьж буй.

ЭХЭМҮТ бол цусны өвчтэй хүүхдүүдийг эмчилдэг манай улсын ганц эмнэлэг тул ачааллаа дийлдэггүй аж. Энэрэл нигүүлсэл, оюун билгийн төв төрийн бус байгууллагын тэргүүн Ажиа гэгээн Лувсант үвдэнгийн санаачилгаар хүүхдийн цусны эмгэг, хавдар судлалын эмнэлэг барихаар болж, 2012 оны тавдугаар сард шавыг нь тавьсан.

Тус эмнэлгийг ирэх сарын 28-нд ашиглалтад оруулж, улсын өмчид хүлээлгэн өгөхөөр болжээ. “Барилгын ажил дуусаж, тоног төхөөрөмжийг оруулах үлдээд байна” гэж тус төвийнхөн хэлсэн. Иргэд, аж ахуйн нэгжийн хандив, тусламжаар барьсан энэ эмнэлгийн нийт өртөг 4.1 тэрбум төгрөг. Барилгыг “Тэргүүн чансаа” компани хариу нэхэлгүйгээр барьж өгчээ.

Нийт 4600 ам метр талбайтай, долоон давхар уг эмнэлэг 25 ортой Нярайн эрчимт эмчилгээний тасаг, мөн мэс засал, хавдартай хүүхдүүд хэвтэн эмчлүүлэх тасаг болон эцэг эхчүүдийн өрөөтэй, сүүлийн үеийн төхөөрөмжөөр тоноглосон байна. Гадаадаас урилгаар болон сайн дураар эмч нар ирж ажиллах аж.

Цусны өвчтэй хүүхдүүд 3-5 жилийн турш эмнэлэгт эмчлүүлэх шаардлагатай байдаг. Мөн сэтгэл санааны дэм өгч эмчлэх нь хамгийн чухал байдаг гэнэ. Тиймээс эмнэлгийн дэргэд эмч нарын сургалт, хурлын танхим, сэтгэл заслын танхимтай гурван давхар барилга барьж эхэлжээ.

Categories
мэдээ нийгэм

Худалдаа хөгжлийн банк олон улс дахь анхны Төлөөлөгчийн газраа нээлээ

Монгол улсыг дэлхийтэй холбох санхүүгийн гүүр Худалдаа, хөгжлийн банк үйл ажиллагаагаа өргөжүүлэн тэлж, олон улс дахь анхны төлөөлөгчийн газрын нээлтээ Япон улсын нийслэл Токио хотноо 7-р сарын 23-ны өдөр амжилттай зохион байгууллаа.

Уг нээлтийн үйл ажиллагаа  Монгол улсын Ерөнхийлөгч Ц.Элбэгдоржийн Япон улс дахь албан ёсны айлчлалын үеэр зохион байгуулагдсан ба Монгол банкны Ерөнхийлөгч Н.Золжаргал, Монгол улсаас Япон улсад суугаа Онц бөгөөд бүрэн эрхэт элчин сайд С.Хүрэлбаатар, ХХБ-ны Ерөнхийлөгч Рандольф Коппа, ХХБ-ны Гүйцэтгэх захирал Б.Мэдрээ, ХХБ-ны Гүйцэтгэх захирлын Тэргүүн орлогч О.Орхон, Японы Санхүүгийн үйлчилгээний агентлагийн дарга асан Хатанака Рютаро, “Bank of Tokyo Mitsubishi UFJ” Гүйцэтгэх захирал Ёшикава Эижи, бусад улс төрийн болон бизнесийн хүндтэй зочид төлөөлөгчид хүрэлцэн ирсэн юм.

ХХБ-ны төлөөлөгчийн газар нь Япон улстай тогтоосон бизнесийн хамтын ажиллагааг улам өргөжүүлж, Азийн хамгийн хурдацтай хөгжиж буй орнуудын нэг болох Монгол улсад гадаадын хөрөнгө оруулалтыг нэмэгдүүлэх, санхүүжилт босгох, хөрөнгө оруулагчдыг эдийн засаг, зах зээлийн шаардлагатай мэдээллээр хангахад чухал ач холбогдолтой. Уг төлөөлөгчийн газраараа дамжуулан ХХБ Япон дахь хөрөнгө оруулагчид, бизнес эрхлэгчдийг Монгол улсын төр, хувийн хэвшлийн байгууллагуудтай холбох санхүүгийн гарц болох юм. 

Төлөөлөгчийн газрын нээлтийн үйл ажиллагаанд зориулж ХХБ Монгол улсын ЗГХЭГ болон Япон улс дахь Монголын ЭСЯ-тай хамтран “Монголын үдэш” хүндэтгэлийн арга хэмжээг зохион байгуулсан ба Монгол улсын Ерөнхийлөгч Ц.Элбэгдорж, Японы парламентын зөвлөхүүдийн танхим дахь Монгол, Японы найрамдлын бүлгийн дарга Эда Сацүки, Японы ЗГХЭГ-ын дэд сайд Нишимура Ясутотши болон бусад хүндтэй зочид уригдан ирж, монголын үндэсний гайхамшигт дуу хуурыг сонсон, үндэсний зоог барьж, монгол зан заншилтай танилцан, нэгэн сайхан үдшийг өнгөрүүллээ.

Мөн хүндэтгэлийн арга хэмжээний үеэр Монгол, Япон 2 улсын цаашдын хамтын ажиллагаа үргэлж эв найрамдалтай байхыг бэлэгдэн Японы уламжлалт “Кагами Бираки” буюу японы саке архины торх хагалах хүндэтгэлийн ёслолыг үйлдсэн юм.

Түүнчлэн ХХБ Япон улсад төдийгүй олон улс оронд сонирхон үздэг мэргэжлийн сумо бөхийн дэвжээнээ Монгол улсаа таниулан, Нагоя башёд барилдаж буй Монгол бөхчүүдээ дэмжин бооцоо (кэншо) тавьсан Монгол улсын анхны аж, ахуйн нэгж боллоо.

ХХБ Монгол улсаас анх удаа олон улсын санхүүгийн зах зээлд бонд гаргаж, амжилттай арилжаалан, Азийн Хөгжлийн Банк болон Олон Улсын Санхүүгийн Корпорациас санхүүжилт авсан Монголын анхны банк болж, Олон улсын 150 гаруй банк санхүүгийн байгууллагатай корреспондент харилцаатай ажиллаж, Монгол улсын гадаад төлбөр тооцооны 50 гаруй хувийг дангаараа гүйцэтгэдэг олон улсад Монгол улсын нэр хүндийг өргөгч банк юм.


Хөгжил дэвшилд хамтдаа

Худалдаа, хөгжлийн банк

Categories
мэдээ эдийн-засаг

Дорнодын замын ажлын дутуу хөрөнгийг шийдвэрлэлээ

Өндөрхаан-Чойбалсан чиглэлийн 10.65 км хатуу хучилттай авто замын барилгын ажилд шаардлагатай 1.9 тэрбум төгрөгийн нэмэлт санхүүжилтийг Хөгжлийн банкнаас олгохоор Засгийн газрын өчигдрийн хуралдаанаар шийдвэрлэжээ.

Хэнтий-Дорнод чиглэлийн 95.4 км авто замын нэг багц болох энэ зам Чойбалсан хотын төвөөр дайрах бөгөөд 9 м өргөнтэй, хоёр захаараа бетон хашлагатай, борооны ус зайлуулах байгууламж, цахилгаан холбоо, шугам сүлжээ, авто замын гэрэлтүүлэг зэрэг инженерийн иж бүрэн байгууламжтай баригдах юм байна.

2009 онд ажил нь эхэлсэн боловч өнөөдрийг хүртэл бүрэн ашиглалтад оролгүй таван жилийн турш сунжирсан Өндөрхаан-Чойбалсангийн чиглэлийн 288 км замын бүтээн байгуулалтын ажилд Шинэчлэлийн Засгийн газар гүйцэтгэгч компаниуд нэмж оруулан ажиллуулсан.

 Ингэснээр өнгөрсөн оноос эрчимжсэн Дорнодын замын бүтээн байгуулалтын ажлын гүйцэтгэгчээр таван компани ажиллаж байна. Эдгээр компани тус бүр 10-143 км зам хариуцан барьж байгаа бөгөөд бүтээн байгуулалтын ажил 70 гаруй хувийн гүйцэтгэлтэй байгаа аж. Дорнодын замын 145 км нь ирэх есдүгээр сард ашиглалтад орох юм байна.

Categories
онцлох-нийтлэл туслах-ангилал

“Өглөөний сонин”-ы сэтгүүлчийг шүүх гэм буруугүй гэж үзлээ

Монгол Улсаас ХБНГУ-д суугаа Онц бөгөөд Бүрэн эрхт Элчин сайд асан Б.Даваадоржийг гүтгэсэн гэх хэргээр “Өглөөний сонин”-ы сэтгүүлч Р.Саруултөгсийг шүүлээ. Шүүх хуралдаан 14.00 цагт дүүргийн Эрүүгийн хэргийн анхан шатны I шүүхэд хаалттай эхэлсэн юм. Сэтгүүлч ХБНГУ-д Элчин сайдаар ажиллаж байсан Б.Даваадоржийн дансанд таван удаагийн үйлдлээр 201 мянган евро шилжин орсон гэх мэдээллийг бичиж  сониндоо цувралаар нийтэлсэн юм. Үүгээрээ бусдын нэр төр, алдар хүндэд халдаж, гүтгэсэн гэх үндэслэлээр шүүгдэж байгаа аж. Шүүхийн байрны өмнө сэтгүүлчид “Германы Элчин сайд асан Б.Даваадорж сэтгүүлчээс бохир савраа тат”, “Өглөөний сонин” сэтгүүлчээ өмөөрөх эрхтэй”, “Сэтгүүлч эх сурвалжаа хамгаалах эрхтэй” гэх мэт лоозон барин зогссон байв. Цагдаа нар тэднийг шүүхийн байрны өмнө эсэргүүцэл илэрхийлэхгүй байхыг шаардаж, хөөсөн юм. Б.Даваадорж нь сэтгүүлчийг баримт олж авахад тусалсан эх сурвалжаа хэл гэж удаа дараа тулгасан аж. Энэ талаар “Өглөөний сонин”-ы Хариуцлагатай нарийн бичгийн дарга С.Туул “2013 оны тавдугаар сараас эхлэн манай сонин Монгол Улсаас Германд суух элчин сайд Б.Даваадоржийн данс руу Монгол Улсаас таван удаагийн үйлдлээр 201 мянган евро орсон гэсэн мэдээллийг нийтэлсэн. Зөвхөн энэ мэдээллийг дэлгээд зогсохгүй өмнө нь энэ хүний холбогдож байсан хэргийн хурлын протоколуудыг авч, олон нийтэд мэдээлсэн. Дараа нь Б.Даваадорж “Өдрийн сонин”-нд ярилцлага өгсөн. Тэгэхдээ “Өглөөний сонин дээр ийм мэдээлэл гарсан байна” гэсэн сэтгүүлчийн асуултад “Тийм ээ, таван удаагийн үйлдлээр миний данс руу мөнгө орсон нь үнэн” гэж яриад, өөрөө нотолсон байгаа. Тэгсэн атлаа Сэтгүүлчийг баримт олж авсан эх сурвалжаа хэл гэж тулгаж байна. Энэ нь сэтгүүлчийг мохоох гэсэн арга. Сэтгүүлч маань энэ мэдээллийг ганцхан эх сурвалжаас аваагүй. Маш олон эх сурвалжаас мэдээллээ авсан” гэсэн юм. Хаалттай эхэлсэн шүүх хуралдаан тус сэтгүүлчийг гэм буруугүй гэж үзлээ.

Ц.Өрнөх

Categories
гадаад мэдээ

Пакистанд Фэйсбүүк хэрэглэснээс болж гурван хүн амиа алджээ

Фэйсбүүк хуудаснаа бурхан шүтээнийг муулсан материал нийтэлсэнээс болоод Пакистаны хоёр хүүхдийг эмээгийнх нь хамтаар хороожээ. Исламын шашны бүлэг танхай этгээдүүд долоон настай хүүхдийг нялх дүү, эмээгийнх нь хамтаар хороогоод гэрийг нь шатаасан байна. Хүүхдүүд шашныг муулсан пост бичсэний дараа цагдаагийн хэсэг дээр 150 хүн цугларч, тэрслүү үзэлтэн гэдэг шалтгаанаар хэрэг үүсгэжээ. Пакистанд бурханд тэрсэлсэнээс болоод амиа алдсан хүмүүсийн тоо жил ирэх бүр өссөөр байна. Энэ он гарсаар 100 орчим хүн бурханд тэрсэлсэн хэргээр амиа алджээ. Хувийн өшөө хорслоосоо болж ийм гэмт хэрэг үйлдэх нь ихэсч буйг хүний эрхийг хамгаалагчид сануулж байна.

Categories
мэдээ спорт

Сүхбаатарын наадамд Б.Номиндалай түрүүлж, аймгийн арслан цол хүртэв

Сүхбаатар аймгийн наадамд Онгон сумын харьяат, улсын шонхор, аймгийн заан Болор-Эрдэнийн Номиндалай түрүүлж аймгийн арслан болов. Ингэснээр тэр аймгийнхаа наадамд 3 жил дараалан аймгийн харцага, аймгийн заан, аймгийн арслан цолд хүрлээ. 

Үзүүрт бөхийн хийц галбир сайхантай, жудаг ёс сайнтай Мөнххааны Мухаалайн Баасанбат хүрч аймгийн заан болов. Их шөвөгт Дарьгангын Гансүх харцага шалгарч цолоо баталсан бол Наран сумын уугуул, сумын заан Шарын Жадамба мөн зургаа давж аймгийн харцага боллоо. 

Дарьгангын Энхсайханы Цэнд-Очир, Мөнххааны Сарангэрэлийн Буянсүрэн нар аймгийн начин болов. Мөн Мөнххаан сумын уугуул бөх аймгийн арслан Г.Батдэлгэр өөрийн хүү Гантогтохыг аймгийн цолд хүргэсэн бол Сүхбаатар сумын харьяат, сумын заан Б.Содномдорж өөрийн төрсөн ах аймгийн арслан Б.Сэнгэдоржоор тав давж цолд хүрлээ. Хөвсгөл аймгийн начин Б.Даваа-Очир Сүхбаатар аймагт барилдаж тавын даваанд а.х М.Гансүхтэй тунаж барилдаад шорооджээ.

Оноолтыг тавын даваанаас үзнэ үү.

Тавын даваа

1. Г.Батдэлгэр а.а – Б.Гантогтох с.з

2. О.Баярхүү а.а – Э.Цэнд-Очир с.з

3. Б.Сэнгэдорж а.а – Б.Содномдорж с.з

4. Ц.Энхбат а.а – С.Буянсүрэн с.з

5. Б.Номиндалай а.з – Ч.Энхмөнх с.з

6. Р.Анхбаатар а.з – Ш.Жадамбаа с.з

7. М.Баасанбат а.з /тойрог/ – Д.Батболд а.х

8. М.Гансүх а.х – Б.Даваа-Очир а.н

Зургаагийн даваа

1. Б.Номиндалай а.з – Б.Гантогтох с.з

2. М.Баасанбат а.з – Э.Цэнд-Очир с.з

3. М.Гансүх а.х – Б.Содномдорж с.з

4. С.Буянсүрэн с.з – Ш.Жадамбаа с.з

Долоогийн даваа

1. Б.Номиндалай а.з – Ш.Жадамбаа с.з

2. М.Баасанбат а.з – М.Гансүх а.х

Наймын даваа

1. Б.Номиндалай а.з – М.Баасанбат а.з

Тодмагнай.мн

 

Categories
мэдээ спорт

Чөлөөт бөхийн залуучуудын ДАШТ-д манай 16 тамирчин өрсөлдөнө

Бөхийн чөлөөт, сонгомол барилдааны 2014 оны залуучуудын Дэлхийн аварга шалгаруулах тэмцээн наймдугаар сарын 5-10-ны өдрүүдэд Хорватын Загреб хотын “Dow Sportova” спортын ордонд болно.

Тэмцээн эрэгтэй 50, 55, 60, 66, 74, 84, 96, 120 кг, эмэгтэй 44, 48, 51, 55, 59, 63, 67, 72 кг-ын жингийн ангиллаар болох юм. Залуучуудын ДАШТ-ээс манай эрэгтэй бөхчүүд алт 4, мөнгө 6, хүрэл 14, эмэгтэй бөхчүүд алт 2, мөнгө 2, хүрэл 9, нийт 37 медаль хүртсэн амжилттай юм. Өнгөрсөн жил Болгар улсын София хотод болсон залуучуудын ДАШТ-ээс эмэгтэйчүүдийн 59 кг-ын жинд С.Цэрэнчимэд алт, 51 кг-ын жинд Э.Даваачимэг, 55 кг-ын жинд П.Орхон нар хүрэл, эрэгтэй 60 кг-ын жинд Б.Номин мөнгөн медаль хүртэж байсан юм.

Залуучуудын 2014 оны ДАШТ-нд оролцох Монголын багийн бүрэлдхүүнийг дор толилуулж байна. Манай бөхчүүд энэ тэмцээний сонгомол барилдааны төрөлд анх удаагаа оролцоно.

Эрэгтэй чөлөөт бөх:

50 кг: Цэдэвийн Мандалсүрэн /”Алдартан” клуб, Азийн залуучуудын аварга шалгаруулах тэмцээний хүрэл, залуучуудын УАШТ-ний алт, хүрэл медальт/

55 кг: Пунцагийн Эрдэнэбилэг /”Алдар” спорт хороо, залуучуудын УАШТ-ний мөнгөн медальт, азийн залуучуудын аварга/

60 кг: Гансүхийн Бэгзжав /”Алдар” спорт хороо, залуучуудын УАШТ-ний мөнгөн медальт/

66 кг: Буянцогтын Цогтгэрэл /Дархан-Уул аймаг, “Хасу-Мегаватт” клуб, залуучуудын УАШТ-ий медальт/

74 кг: Болдхүүгийн Батсүх /БХИС, залуучуудын УАШТ-ний хүрэл медальт/

120 кг: Энхтөрийн Мөнхбаатар /”Говь-Сүмбэр аймаг, Азийн залуучуудын аварга шалгаруулах тэмцээний хүрэл медальт, залуучуудын улсын аварга/

 Эмэгтэй чөлөөт бөхийн баг:

44 кг: Лхагвагийн Баттогтох /Налайх дүүрэг, залуучуудын улсын аварга/

48 кг: Цогт-Очирын Намуунцэцэг /Дархан-Уул аймаг, “Хасу-Мегаватт клуб, залуучуудын улсын аварга өсвөр үеийн ДАШТ-ний мөнгөн медальт/

51 кг: Батбаатарын Мөнхтуяа /Дархан-Уул аймаг, азийн залуучуудын болон өсвөрийн аварга шалгаруулах тэмцээний хүрэл, залуучуудын УАШТ-ний мөнгө, хүрэл, хошой алтан медальт/

55 кг: Алтанцэцэгийн Батцэцэг /Дархан-Уул аймаг, өсвөрийн ДАШТ-ний мөнгө, азийн залуучуудын аварга шалгаруулах тэмцээний алт, хүрэл, залуучуудын УАШТ-ний мөнгө, хүрэл, хошой алтан медальт, залуучуудын ДАШТ-нд хоёр дахь удаагаа оролцож байна./

59 кг: Сүхээгийн Цэрэнчимэд /”Алдар” спорт хороо, залуучуудын дэлхийн аварга, өсвөрийн ДАШТ-ний хүрэл, азийн залуучуудын аварга шалгаруулах тэмцээний мөнгө, хүрэл, залуучуудын УАШТ-ний хүрэл, хошой алтан медальт, залуучуудын ДАШТ-нд хоёр дахь удаагаа оролцож байна./

63 кг: Бүрнээбаатарын Нямгэрэл /Орхон аймаг, “Хангарьд” клуб, өсвөрийн ДАШТ-ний хошой хүрэл, азийн залуучуудын аварга шалгаруулах тэмцээний мөнгө, хүрэл медальт, залуучуудын 3 удаагийн улсын аварга/

67 кг: Отгонбатын Оюунгэрэл /Дархан-Уул аймаг, “Хасу-Мегастарс” клуб, Азийн залуучуудын аварга шалгаруулах тэмцээний мөнгө, залуучуудын улсын аварга/

72 кг: Пүрвээгийн Номин-Эрдэнэ /Өмнөговь аймаг, азийн залуучуудын болон өсвөрийн аварга шалгаруулах тэмцээний хүрэл, залуучуудын УАШТ-ний хүрэл, 3 алтан медальт/

Сонгомол барилдаан:

55 кг: Пунцагийн Эрдэнэбилэг /”Алдар” спорт хороо, өсвөрийн улсын аварга шалгаруулах тэмцээний медальт, азийн аварга/

66 кг: Норовсүрэнгийн Амарсайхан /”Харгант-Уамхаг” клуб, өсвөрийн улсын аварга шалгаруулах тэмцээний медаль, азийн өсвөрийн аварга шалгаруулах тэмцээний хүрэл медальт/

Дасгалжуулагчид:

Цэрэнбаатарын Хосбаяр /“Алдар” спорт хорооны дасгалжуулагч, залуучуудын

эрэгтэй шигшээ багийн дасгалжуулагч/

Цэндийн Баярсайхан /“Хасу-Мегастарс” клубын дасгалжуулагч, залуучуудын эмэгтэй шигшээ багийн дасгалжуулагч/

Чүлтэмсүрэнгийн Раднаабазар /“Хангарьд” клубын дасгалжуулагч/

Паламдоржийн Чулуунбаатар /Чөлөөт бөхийн дасгалжуулагч/

Дашсүрэнгийн Энхбат /Сэлэнгэ аймгийн Соёл, спорт, аялал жуулчлалын

газрын дасгалжуулагч/

Шүүгч:

Олон улсын нэгдүгээр зэрэглэлийн шүүгч Лувсан-Ишийн Болормаа

Залуучуудын ДАШТ-ний хуваарь:

Наймдугаар сарын 5. Мягмар гариг

18.30-19.00 Нээлтийн ёслол

Наймдугаар сарын 7. Пүрэв гариг

10.00-14.00 Эмэгтэй 48, 55, 63, 72 кг-ын жингүүдийн урьдчилсан болон дагах барилдаан

18.00-20.00 Эмэгтэй 48, 55, 63, 72 кг-ын жингүүдийн медалийн төлөө барилдаан, медаль гардуулах ёслол

Наймдугаар сарын 8. Баасан гариг

10.00-14.00 Эмэгтэй 48, 55, 63, 72 кг-ын жингүүдийн урьдчилсан болон дагах барилдаан

18.00-20.00 Эмэгтэй 44, 51, 59, 67 кг-ын жингүүдийн медалийн төлөө барилдаан, медаль гардуулах ёслол

Наймдугаар сарын 9. Бямба гариг

10.00-14.00 Эрэгтэй 55, 66, 84, 120 кг-ын жингүүдийн урьдчилсан болон дагах барилдаан

18.00-21.00 Эрэгтэй 55, 66, 84, 120 кг-ын жингүүдийн медалийн төлөө барилдаан, медаль гардуулах ёслол

Наймдугаар сарын 10. Ням гариг

13.00-18.00 Эрэгтэй чөлөөт бөхийн 50, 60, 74, 96 кг-ын жингүүдийн урьдчилсан болон дагах барилдаан

18.00-20.00 Эрэгтэй чөлөөт бөхийн 50, 60, 74, 96 кг-ын жингүүдийн медалийн төлөө барилдаан, медаль гардуулах ёслол

Д.ӨЛГИЙСАЙХАН (МЧБХ) 

Categories
мэдээ нийгэм

Дархан аварга Г.Өсөхбаяр сумынхаа ойд түрүүлжээ

Архангай аймгийн Батцэнгэл сумын 90 жилийн ойн баяр наадам болж өнгөрлөө. Наадмын үндэсний бөхийн барилдаанд Архангай аймгийн харъяат дархан аварга Г.Өсөхбаяр түрүүлсэн байна.

Түүнтэй Улсын харцага Т.Мөнгөнцоож үзүүр булаалдсан бол улсын харцага Г.Батбаяр, аймгийн арслан Л.Шинэбаатар нар их шөвөгт шалгарчээ.

Ийнхүү өнөө жил дархан цол хүртсэн хоёр аварга хоёулаа төрөлх сумдынхаа ойд түрүүлж байгаа юм. 

Categories
мэдээ улс-төр

Гишүүд Эрхүү мужийн эрх баригчдад санал тавьжээ

УИХ-ын чуулган завсарласан энэ өдрүүдэд УИХ-ын гишүүн Д.Эрдэнэбат, Ц.Оюунбаатар, Ц.Цолмон тэргүүтэй төлөөлөгчид ОХУ-ын Бу­риад улсын Эрхүү мужид албан ёсны айлч­лал хийж байгаа аж. Энэ удаагийн айчлалаар Эрхүү мужийн эрх баригчдад хандан худалдааны чө­лөөт бүс хамтран байгуулах санал тавь­сан талаар хойд хөршийн “Байкал инфо” сонинд нийтэлсэн аж.

Тодруулбал, “Монголын дээд хэм­жээний төлөөлөгчдийн хийсэн айлчлалын үеэр чөлөөт худал­дааны бүс хамтран байгуулах асуудал хөндөгдлөө. Хамтарсан чөлөөт худалдааны бүс байгуулагдсанаар хоёр талын худалдааны эргэлт нэмэгдэхээс гадна бизнесмэнүүдэд хамтарч ажиллах шинэ, шинэ боломжууд бий болно гэдэгт УИХ-ын Аюулгүй байдал, гадаад бодлогын байнгын хорооны дарга Ц.Оюунбаатар итгэлтэй байна. Жишээ нь, Монгол Улс мал аж ахуйн гаралтай мах болон бусад хүнсний бүтээгдэхүүн, чанартай арьс, ширэн бүтээгдэхүүнийг санал болгож чадна гэж тэрбээр хэлсэн” хэмээн бичжээ. Мөн хоёр талын харилцааны өнөөгийн байдлын талаар “Монгол, Эрхүү муж сүүлийн үед урлаг, спорт, боловсрол, бизнесийн чиглэлээр нягт хамтран ажиллаж байна. Жил бүр хэдэн арван монгол оюутан их дээд сургуулиудад суралцдаг бөгөөд манай эндхийн боловсролыг Монголд зүй ёсоор хүндэтгэж үздэг” хэмээн эерэг зүйл бичсэн аж.

Монгол-ОХУ-ын хооронд визгүй зорчих гэрээг ирэх наймдугаар сард, Халх голын ялалтын 75 жилийн ойгоор В.Путин, Ц.Элбэгдорж нар Монголд батална гэж мэдээлж байсан. Гэвч сүүлийн үед “В.Путин Монголд ирэх эсэх нь эргэлзээтэй” гэсэн мэдээлэл гараад буй ч уг визгүй зорчих гэрээ хэрэгжих цаг ойртож байгаа бололтой.ОХУ-ын Буриад улсын Ерөнхийлөгч Вячеслав Наговицын энэ талаар “Энэ асуудлыг манай хоёр улсын төрийн тэргүүнүүд ярьчихсан. Монголын тал ирэх есдүгээр сар гэхэд шилжих боломжтой гэдгээ сая илэрхийллээ. Одоо бид гаалийн шалган нэвтрүүлэх цэгүүдийнхээ хүчин чадлыг олон хүнд зэрэг үйлчлэх боломжтой болгон өргөтгөж байна. Энэ бол эхний шат. Дараагийн шат бол мэдээж, визгүй журамд шилжинэ” хэмээн өгүүлжээ. Тэрбээр Оросын тал саналыг бүрэн хүлээж авсан болохыг баталсан ийнхүү баталсан байна.

Монголын төлөөлөгчид Эрхүү хотод зочлох үеэр ОХУ-ын Буриад улсын Ардын хурлын орлогч дарга Владимир Павлов “Хоёр улс визгүй зорчих гэрээ байгуулсны дараа хэрэгжилтийг нь хангах тал дээр бэлтгэл ажлуудыг бид зохион байгуулж байна. Тэгвэл би өнөөдөр та бүхнээс “Хоёр улс хоорондоо визгүй чөлөөтэй зорчдог болох, болсны дараа худалдаа эдийн засгийн харилцаагаа илүү бэхжүүлэх тал дээр Монголын тал ямар ажил хийж байна вэ” гэж асууя. Хоёр талын худалдаа эргэлт нэмэгдсэнээр зөвхөн Буриадад биш, Монголд ч бас ашигтай шүү дээ” хэмээн манай төлөөлөгчдөөс асуусан байна. Энэ асуултад УИХ-ын гишүүн Ц.Цолмон “Энэ асуудал ойрын хугацаанд шийдэгдэж, манай хоёр улсын иргэд бизнесийн болон амин хувийн шалтгаанаар хоорондоо чөлөөтэй зорчдог болно гэдэгт би итгэж байна” хэмээн хариулсан аж.

Сонирхуулахад, Эрхүү муж нь Сибирийн холбооны тойрогт багтдаг, 774 846 км нутаг дэвсгэртэй, хүн амын тоогоор Монгол Улстай ойролцоо / 2014 оны байдлаар 2 418 348 хүн амтай/. Мод бэлт­гэл, целлюлоз-цаас үйлдвэрлэл, уул уурхай, машин угсралтын сал­бар түлхүү хөгжсөн. Нэг хүнд ног­дох ДНБ-ий хэмжээгээр ОХУ-ын бү­рэл­­дэхүүнд багтсан 83 субъектээс 20-д жагсдаг. Аж үйлдвэрлэл өндөр хөгж­сөн мужийн тоонд ордог бөгөөд ОХУ-д үйлдвэрлэгдэж буй нийт эрчим хүч­ний 6.5 хувь, мод бэлтгэлийн 15 хувь, нүүрс олборлолтын зургаан хувь, целюллюлозын 20 хувь, картон цаасны 10 хувь, нефть бүтээгдэхүүний есөн хувийг дангаараа бүрдүүлдэг байна.  Монгол Улсын хувьд худалдааны чухал хамтрагч байж чадах муж юм. Өнгөт металл, хар төмөрлөг зэрэг байгалийн баялаг ихтэй бөгөөд манайхаас ялгаатай нь энэ чиглэлийн боловсруулах үйлдвэрүүдийг хан­галттай байгуулсан. Хүнд үйлд­вэрлэлийн салбарт манай улсад үлгэр жи­шээ болж чадах аж.