Month: July 2014

Их Монгол улс байгуулагдсаны 808 жилийн ой, Ардын хувсгалын 93 жилийн ой, Үндэсний их баяр наадмаар Улаанбаатар хотын гудамж талбайд өнгө нэмэх зорилгоор нийслэлийн хэмжээнд гэрэлтүүлгийн шонг угаах будах,  нэмж байруулах, цахилгааны монтажны холболтын нүхийг тагжуулах зэрэг тохижилтын ажил өрнөж байна. Энэ ажлын хүрээнд хотын гэрэлтүүлгийн ашиглалт засвар үйлчилгээг хариуцсан компаниуд олон ажлууд хийж хэрэгжүүлсэн. Шөнийн дөлөөр харанхуй гудамжаар явсаар гэртээ ордог гэр хорооллын иргэдийн тав тухтай амьдрах орчинг бүрдүүлэх зорилгоор “Би Эм Жи Эл” ХХК СХД-ийн Бага Нарангийн 45 дугаар гудамж, “Филипс” гэрэлтүүлэг ХХК СХД-ийн 8-р хорооны нарийн гудамд шинээр гэрэлтүүлэг тавьж наадмын өмнө оршин суугчдыг нь  баярлууллаа. Харин “Холбоо трейд”, “Соёндрим”,”Төгс гэрэл”компаниуд Их монголын гудамж, Чингэлтэй дүүргийн Хувьсгалчдын гудамж, Чингисийн өргөн чөлөөний гэрлийн шонг угааж, хотын гудамжинд гэрэл нэмэх өнгөөр будсан нь олны талархлыг хүлээсэн. Мөн хотын гэрэлтүүлгийг төвлөрсөн удирдлагын системд оруулах ажлыг Улаанбаатар хотын Захирагчийн ажлын алба, Шинжлэх ухааны академийн Информатикийн Хүрээлэнтэй хамтран хэрэгжүүлэх гэрээ хийсэн. Энэ гэрээний  үр дүнд Чингэлтэй дүүргийн нийтийн эзэмшлийн зам талбай, орон сууц, гэр хорооллын гэрэлтүүлгийг төвлөрсөн удирдлагад оруулах ажил хийгдэж дуусаад байна. Цаашид энэ ажил ХУД, СБД-т үе шаттайгаар хэрэгжинэ гэж Улаанбаатар хотын Захирагчийн ажлын албанаас мэдээллээ.

-Малчид, ард иргэдэд зориулсан цаг агаарын мэдээ-

Баяр наадмын өдрүүдэд ихэнх нутгаар дуу цахилгаантай, түр зуурын бороо орно.

Өнөөдөр нутгийн өмнөд хэсгээр үүлэрхэг, бусад нутгаар солигдмол үүлтэй. Баруун зүгийн нутгийн өмнөд, говийн нутгийн баруун хэсэг, зүүн зүгийн нутгийн зарим газраар бороо, төвийн нутгийн зарим газраар дуу цахилгаантай түр зуурын бороо орно. Дуу цахилгааны үеэр салхи түр зуур ширүүснэ. Алтай, Хангай, Хөвсгөлийн уулархаг нутгаар 15-20 градус, говийн бүсийн зүүн хэсгээр 24-29 градус, бусад нутгаар 20-25 градус дулаан байна.

УЛААНБААТАР ХОТ:Үүлшинэ. Оройдоо хотын баруун чиглэлээр түр зуурын бороо орно. Дуу цахилгаантай. Салхи баруун хойноос секундэд 6-11 метр. 20-22 градус дулаан байна.

Энэ сарын 15-ныг хүртэлх цаг агаарын урьдчилсан төлөвөөр 11-нд төв, зүүн, говийн нутгийн зарим газраар, 12-нд нутгийн зүүн хагаст, 13-нд баруун зүгийн нутгийн баруун хэсэг, төв зүүн зүгийн нутгийн зарим газраар, 14-нд баруун зүгийн нутгийн зарим газраар бороо орно. Дуу цахилгаантай. Борооны өмнө салхи түр зуур ширүүснэ. Алтай, Хангай, Хөвсгөл, Хэнтэйн уулархаг нутгаар шөнөдөө 4-9 градус, өдөртөө 16-21 градус, Их нууруудын хотгор болон Говийн бүс нутгийн өмнөд хэсгээр шөнөдөө 15-20 градус, өдөртөө 25-30 градус, бусад нутгаар шөнөдөө 9-14 градус, өдөртөө 19-24 градус дулаан байна.13-нд нутгийн баруун хагаст, 14-нд ихэнх нутгаар өдөртөө хална.

Нотариатын үйл ажиллагаа эрхлэх тусгай зөвшөөрлийг Нотариатын тухай хуулийн 13 дугаар зүйлийн 13.1.5 дахь заалт, Аж ахуйн үйл ажиллагааны тусгай зөвшөөрлийн тухай хуулийн 15 дугаар зүйлийн 15.5.4 дэх заалтыг тус тус үндэслэн Хууль зүйн сайд олгож байна.

Хуульч сонгон шалгаруулах тухай хуульд заасан сонгон шалгаруулалтад тэнцэж, гэрчилгээ авсан, ял шийтгэлгүй, мэргэшлийн шалгалтад тэнцсэн, нотариатын үйлдэл хийх ажлын байртай иргэнд нотариатын үйл ажиллагаа эрхлэх тусгай зөвшөөрөл олгоно.

“Нотариатчийн мэргэшлийн шалгаруулалтын журам”-ыг Хууль зүй, дотоод хэргийн сайдын 2009 оны 10 дугаар сарын 22-ны өдрийн 214 дүгээр тушаалаар баталсан.

2012 оны 4 дүгээр сарын 6-ны өдрийн байдлаар нийт 251 хуульч тусгай зөвшөөрөл авсан байна. Тэдгээрийн 191 нь нийслэлийн нотариатын тойрогт ажиллахаар, 82 нь орон нутгийн нотариатын тойрогт ажиллахаар тус тус тусгай зөвшөөрөл авчээ.

Д.САР

Мянганаар өртөөлсөн Тулгар төрийн их ой, Их Монгол Улсын 808 жил тохиож, Үндэсний их баяр наадмын урь дэлгэрч, эх орны дөрвөн зүг найман зовхист хурдан морины гийнгоо цангинасан энэ мөчид Монголын төрт ёсны их Хүндэтгэл Есөн хөлт цагаан тугийнхаа өмнө хөдөлмөр бүтээлээрээ шалгарсан эрхэм иргэддээ төрийн өндөр дээд цол, одон медаль гардууллаа.

Нэгэнт цагт “Чингисийн чулууны бичиг” хэмээх Монгол туургатны гайхам сууг дархалсан дурсгалын бичээст “Есүнхэй мэргэн 335 алд” буюу одоогийнхоор бол 500 хол метрт харван онож, дэлхийд дайчин алдраа мандуулсан Монгол эрсийн домгийг бүтээж байсан түүхтэй. Чухамдаа монгол хүн бүр морьтон адил монгол хүн бүр харваач байсан.

Өнөөдөр тэр түүхийн үргэлжлэл болж, Дорнод Монголын алдарт харваач, эх орныхоо төлөө амь бие үл хайрлан дайтаж явсан ахмад дайчин Аюушийн Цэвээн Монгол Улсын Хөдөлмөрийн баатар цол хүртлээ. Монголчууд гойд чадварлаг харваач байснаараа дэлхийн цаг тооны бичгийн үлэмж хувийг үндэстнээрээ овоглож чадсан. Харваа бол улс үндэстний тэсэн үлдэх хийгээд мандан бадархуйн түшиг тулгуур байсан, эдүгээ Монгол түмний наадмын үндсэн төрөл юм.

Аюушийн Цэвээн гуай улсад дөрвөнтээ түрүүлж, найм үзүүрлэн, Монгол соёлынхоо бахархалт өв болсон нум сумыг олон жил урлаж, алдар цуутай олон шавь төрүүлсэн нь түүний Монгол Улсын төлөө цуцалтгүй хөдөлмөрлөсний үр өгөөж юм. Танд чин сэтгэлээсээ баяр хүргэе.

Мөн улсынхаа нэр алдрыг дэлхийн дэвжээнд дуурсгасаар байгаа дэлхийн энтэй шүүгч, спортын зүтгэлтэн Адуучийн Басхүү, Санхүү, эдийн засгийн салбарт хоёр түмэн шавь төрүүлсэн ахмад багш Жамъяны Нямсүрэн, сонгодог урлагийн тайзнаа тод мөрөө дархалсан манай нэртэй уран бүтээлч Адилбишийн Дашпэлжээ нар ардын цолтон боллоо.

Энэ мөчид Монгол Улсын гавъяат цолтнууд ч хүрээгээ тэллээ. Хүн төрөлхтний спорт гэгдэх Хөлбөмбөгийн ДАШТ ид өрнөж буй энэ мөчид Монголд хөлбөмбөгийн спортыг хөгжүүлэхэд олон жил хөдөлмөр зүтгэлээ зорилуж ирсэн Лувсандоржийн Сандагдорж Гавъяат дасгалжуулагч боллоо.

Энд нэгэн хүний гавъяаг онцгойлон дурьдах хэрэгтэй. Манай ахмад үеийн шалгарсан нисгэгчдийн нэг Далайн Баатар Монгол Улсын гавъяат нисгэгч боллоо. Тэрээр агаарт 17 мянган цаг нисч, 6 сая км туулан 111 мянган зорчигч тээвэрлэн мөнгөн цагаан хөлгөөр 4000 гаруй цаг хөөрсөн нэртэй нисгэгч юм.

Түүнийг 1975 онд Улаанбаатар –Дундговийн чиглэлд нисч байсан АН-24 онгоцны нисгэгчээр нислэг үйлдэж явахад нь тас шувуу онгоцны урд шилийг мөргөж онц аюултай нөхцөл үүссэн үед авхаалж гарган онгоцоо аюулгүй газардуулж 50 шахам зорчигчийн амь насыг аварч байсан түүхтэй. Хожим мөн 1983 онд 42 зорчигч тээвэрлэж явсан онгоцных нь баруун хөдөлгүүр агаарт унтарч гарцаагүй ослын аюул нүүрлэхэд мөн л мэргэжлийн самбаа, чин зориг, өндөр чадвар гарган онгоцоо амжилтай газардуулж байжээ. Энэ бол яахын аргагүй гавъяат, эрэлхэг үйлс юм.

Мөн өнөөдөр энэ танхимд мянга мянган шавь төрүүлсэн багш нар, буянт малынхаа тоо толгойг өсгөж, монгол ухаанаа өвлүүлэн яваа малчин ардын маань төлөөлөл гээд механикжуулагч, төмөр замчин, хөгжим судлаач, дуучин, зураглаач, алтан гартай эмч, геологич нарын мэргэжил мэргэжлийн эзэд гавъяатын алдраа хүртлээ.

“Дуудах нэрийг эцэг эх заяаж, дуурсах алдрыг өөрөө олдог” ардын сайхан сургааль бий. Алдар цуугийн торгон хүндэтгэлийг ард олны дэмжлэг, олон жилийн зүтгэл, хөлс хүч, хөдөлмөр туурвил түшиж явдаг аа. Үүний зэрэгцээ хариуцлага, улам илүүг бүтээх итгэл ч дагалдаж байдаг.

Энэ танхимд шагнал хүртсэн болон орон даяар хөдөлмөрөө үнэлүүлсэн нийт иргэддээ, Та бүхний гэр бүл, хамт олон, үйл хэргийг тань түшиж ирсэн тэр эрхэм хүмүүст гүн талархал дэвшүүлье.

Та бүхэн сайхан наадаарай.

Өнөөдрийн байдлаар Алтай нуруунаас усжих Ховд гол Мянгад сум орчимд үерийн аюултай түвшинг, Буянт гол Ховд хот, Орхон голын дунд хэсэг, Хэнтэй нурууны баруун хажуугаас усжих Туул гол Улаанбаатар хот, Туул гол Алтанбулаг сум, Их Хянганы нурууны Халх гол Ялалт баг, Хэнтэй нурууны арын Онон гол Дадал сум, Хурх гол Өмнөдэлгэр сум, Хэрлэн гол Мөнгөнморьт сум, Хангайн нурууны өврийнБайдраг гол Баянбүрд сум, Увс нуурын сав Хархираа зэрэг голууд үерийн түвшинг даван тус тус үерлэж байна. Баяр наадмын өдрүүдэд түр зуурын усархаг бороо орох төлөвтэй байгаа тул гол мөрний сав газраар нутаглаж буй малчид, ард иргэдийг үер усны аюулаас болгоомжтой байхыг Ус цаг уур, орчны хүрээлэнгээс онцгойлон анхааруулж байна.