Month: July 2014

Үндэсний их баяр наадмын хүчит бөхийн барилдааны дөрвийн даваанд Монгол Улсын дархан аварга Г.Өсөхбаярын хөл рүү аймгийн арслан Баасандорж дохиод буцав. Гэсэн ч аварга түүнийг төвөггүйхэн өвдөглүүлээд туг тойрлоо. Улсын аварга О.Балжиннямыг Архангайн аймгийн арслан Бадарч давснаар улсын начин цолонд хүрэхэд нэг даваа үлдлээ. С.Мөнхбат амйгийн арслан Пүрэвгарьдыг төвөггүйхэн өвдөглүүлэв. Г.Эрхэмбаяр аймгийн арслан Ганболдыг мушгиад давлаа, улсын арслан Ганбат аймгийн арслан Ганбаатараар дөрөв давав. Улсын гарьд Н.Ганбаатар аймгийн арслан Золбоотой, Т.Санчир аймгийн арслан Лха-Очиртой, Санжаадамба аймгийн арслан Баатарцолтой, Соронзонболд заан Бадамсүрэнтэй Бат-Орших харцага Сэлэнгийн аймгийн арслан Дэлгэрсайхантай, улсын харцага Содномдорж улсын начин Цэрэнтогтогтохтой, уран барилдаант хоёр бөх оноолт таарсан нь Ө.Даваабаатар улсын начин Б.Пүрэвсайхантай оноолт таарчээ. Улсын гарьд Д.Рагчаа аймгийн арслан Чимэддоржийг давлаа. Завхан аймгийн Их-Уул сумын харьяат улсын гарьд Гончигдамба аймгийн арслан Дарханбатын ард нь гарч өвдөглүүллээ. Архангай аймгийн Хашаат сумын харьяат улсын заан Ч.Санжаадамба аймгийн арслан Баатарцолоор дөрөв давлаа. Хөвсгөл аймгийн Шинэ-Идэр сумын харьяат улсын арслан Х.Мөнхбаатар аймгийн арслан Еркеболанаар даваагаа ахиуллаа. Улсын гарьд Ж.Бат-Эрдэнэ аймгийн арслан Бат-Эрдэнэтэй барилдаж
Улсын харцага Н.Түвшинбаяр улсын начин Одбаяртай барилдаж талбайн зах руу нэлээд хөөж яваа харагдана.
Аймгийн арслан Баасандорж Бүрэнтөгсөөр дөрөв давж олны уухайтай туг тойрсон юм. Аймгийн арслан Золбоо Н.Ганбаатар гарьдад тахим буулган наадмыг өндөрлүүлэв. Аймгийн арслан Лха-Очир Т.Санчир заанаар даваагаа ахиулж тавын даваанд гарахаар боллоо.

Гурвын давааны үргэлжлэлд аймгийн арслан Дарханбат улсын харцага Мөнгөнцоожоор, аймгийн арслан Мөнгөн улсын гарьд Баянмөнхийн Гантогтохоор тус тус гурав давж есөн хөлт цагаан тугаа тойрлоо. Улсын заан Сайнбаяр Архангай аймгийн Бөхбилэгт дэвжээний бөх аймгийн заан Дагва-Очироор гурав даван тун хурдтай туг тойрч харагдлаа. Аймгийн арслан Тайван улсын өсөх идэр начин Лхагвасүрэнгээр, улсын харцага Найдангийн Түвшинбаяр хөөж элдсээр аймгийн арслан Отгонбаатараар гурав даван туг тойрлоо. Завхан аймгийн Алдархаан сумын харьяат аймгийн арслан Лха-Очир гурав давсан бол цэргийн арслан Амартүвшин Амартүвшин харцагаар, улсын начин Ганхүү аймгийн арслан Батмөнхөөр, Энхбат начин улсын өсөх идэр начин Жамъянпүрэвийг амлан барилдаж давсан юм. Улсын начин Шүхэртийн Уламбаяр улсын начин Завханы Баянтэсийн Нямсүрэнг амласан юм. Аймгийн хурц арслан Батчулуун улсын өсөх идэр начин Отгонбаяраар гурав давлаа. Увс аймгийн Зүүнхангай сумын харьяат аймгийн заан Болдбаатарыг ноднин жил харцага цолны босго давсан Оюунболд амлан шахааны барьцнаас мушгин давлаа.

Өвөрхангай аймгийн Хужирт сумын харьяат аймгийн арслан Чимэддорж улсын арслан Н.Бүрэнбаатараар, аймгийн арслан Батжаргал Булган аймгийн Гурванбулаг сумын харьяат улсын өсөх идэр начин Цогтжаргалаар гурав давж начны даваанд ойртлоо. Итгэлт Орших группын бөх улсын харцага Ө.Даваабаатар Завхан аймгийн Их-Уул сумын харьяат улсын начин Оргилыг амлан барилдаж давсан юм. Улсын харцага Арслангийн Бямбажав аймгийн арслан Ганжадыг мөн амлажээ. Харцага Ганжадын араар нь тэвэрч шидсэн нь тохой нь түрүүлж газардаж харагдлаа. Гэсэн ч хөлийн цэц засуулын шийдвэрээр залуу харцага даваа авсан юм. Улсын харцага Т.Өсөх-Ирээдүй шахааны барьцнаас шахаж мордон аймгийн арслан Отгонбаатараар гурав давлаа.

Аймгийн арслангууд гурвын даваанаас эхлэн өөрсдийн багш болон улсын цолтой бөхчүүдийн аманд гарч гар амар гурав давж байгаа юм. Гарьд магнай кинон дээр “Далайцэрээн чи олон хүмүүсийг харж байна уу. Энэ бүх хүмүүс наадам үзэх гэж ирсэн” гэдэг билээ. Угтаа наадамд худлаа барилдаж болохгүй гэдгийг сануулсан үг байсан билээ. Хорьж ч болдоггүй яаж ч болдоггүй начин цолоо гэж.

Өчигдөр төрийн их баяр наадмын нэгийн давааны эхэнд А.Сүхбат, Г.Өсөхбаяр аварга нарын хэн нь зүүний магнайд босох вэ гэдэг нь хэл амтайхан байсан билээ. А.Сүхбат Г.Өсөхбаяр аваргыг амлан авч барилдах байлаа. Гэсэн ч дархан аварга А.Сүхбат барилдалгүй Г.Өсөхбаярт элэг бүсээ тайллаа. Г.Өсөхбаяр аварга энэ бүхнийг тооцоолоогүй байсан тул тахим авах дургүй байгаагаа илтгэв. Улсын аварга О.Балжинням улсын харцага Чулуунбаатарыг, С.Мөнхбат аварга аймгийн начин Мөнхдоржийг аймгийн начин Баярдамбыг амлан авлаа. Гончигдамба Отгонбатаараар, улсын арслан П.Бүрэнтөгс аймгийн начин Ариунмөрөнгөөр гурав давлаа. Улсын арслан Ганбат гурав давж туг тойроод байна.

Өчигдөр зүүний магнайд Сүхбат аваргыг гаргахгүй гэхэд тэрээр өмнө нь зодог тайлахдаа малгайгаа нүдэндээ дараад нулимсаа арчиж байсан дүр зургийг бид мартаагүй. Тэгвэл өчигдөр яг ийм зүйл тохиосон билээ. Харин өнөөдөр Сүхбат аварга зангаргыг мэдрүүлж ам даван аварга бөх шиг тахим буулгалаа. Түүний хувьд энэ жилийн баяр наадмаар ганцхан Г.Өсөхбаяр аваргыг амлахаар барилдсан мэт санагдаж байна.

Үндэсний их баяр наадмын гурвын даваа эхэлж дархан аварга А.Сүхбат, улсын аварга О.Балжинням нарын цолыг дуудаж байна. Энэ давааны хамгийн эхэнд дархан аварга А.Сүхбат дархан аварга Г.Өсөхбаярыг амлан авлаа. Хэн хүний тааварлаагүй ам авсанд хүмүүс ихэд гайхаж байгаа юм. А.Сүхбат аваргын хувьд өчигдөр Г.Өсөхбаяр аваргатай зүүний магнай булаацалдан нэлээдгүй хэл ам хийцгээсэн билээ. Энэ жилийн баяр наадам үнэхээр ярих зүйлтэй, үзүүштэй наадам болох нь гарцаагүй болж байна. Өмнө нь аварга цолтой бөх дээд тал нь арслан цолтой бөхийг амлаж байсан удаа бий. Гэхдээ дархан аварга тэр дундаа гурвын даваанд ам авч байсан түүх үгүй билээ. Г.Өсөхбаяр аварга аманд гарсан тул баруун жигүүрийн ест зогсож байна.

Хоёр аваргын барилдаан ихээхэн сонирхолтой болох нь дамжиггүй биз ээ. Бөхчүүдийн цолыг дуудаж байна.

Э.ЭНХ

NBA-гийн супер од Леброн Жеймс дөрвөн жилийг “Майами Хит” багт өнгөрүүлсний эцэст эргээд хуучин баг “Кливленд Кавалерьс”-таа ирлээ. Флоридагийн багт дөрвөн жилийг өнгөрөөхдөө хоёр удаа NBA-ийн финалд тэргүүлж байсан энэ сагсчин 2014 оны улирал дуусаад чөлөөт агент болоод байсан юм. Иймээс сар гаруй хугацаанд бодсоны эцэст  долоон жилийг өнгөрөөсөн анхны багтаа ирэхээр шийджээ. “Би дөрвөн жилийн өмнө эндээс явахдаа Огайо муж сагсан бөмбөгөөс илүү үнэтэй нутаг юм гэдгийг ойлгоогүй явжээ. Гэхдээ одоо ойлгосоон.” хэмээн тэр хэлэв.

Б.Хулан