Month: July 2014

Төрийн их баяр наадмын эрэгтэй сурын харваанд 40 сумнаас 38 онож түрүүлсэн Ховд аймгийн харъяат Отгонбаярт тод мэргэн цол олголоо. Мөн эмэгтэй сурын төрөлд түрүүлсэн Улсын хошой мэргэн Оюунчимэгт 40 сумнаас 36 онож түрүүлсэн амжилтыг нь үнэлж гарамгай мэргэн цол олголоо. Уг цолын зарлигийг Ерөнхийлөгчийн Тамгын газрын дарга П.Цагаан уншиж танилцууллаа.

Эрэгтэй сурын төрөлд Сэлэнгэ аймгийн Ерөө сумын уугуул Д.Батбаатар 38 оноогоор, С.Өлзийсайхан 37 оноогоор, Д.Баярсайхан 36 оноогоор, А.Төртогтох 36 оноогоор удаалжээ. Харин эмэгтэй сурын төрөлд Улсын мэргэн Д.Норжмаа 36 оноогоор хоёрдугаар байр, И.Цэцэгмаа 35 оноогоор, Б.Пунцалдулам 35 оноогоор, О.Чинзүрх 35 оноогоор удаах байруудыг эзэлжээ.

Үндэсний их баяр наадмын хүчит бөхийн барилдааны тавын даваанд Архангай аймгийн Батцэнгэл сумын харьяат Монгол Улсын дархан аварга Г.Өсөхбаяр нутгийн бөх Архангай аймгийн Тариат сумын харьяат аймгийн арслан Адъяабатыг амлан баруун ташаагаа тавьж өгсөөр байв. Адъяабатын баруун хавираанд дархан аварга тэссэнгүй. Увс аймгийн Баруунтуруун сумын харьяат улсын аварга С.Мөнхбат аймгийн арслан Баасандоржийг халз хутган гэдрэг нь харуулав. Сэлэнгэ аймгийн Мандал сумын харьяат, Аврагч спорт хорооны бөх улсын аварга Г.Эрхэмбаяр улсын начин Ш.Жаргалсайханыг амлан уначихав. Өвөрхангайн улсын арслан Д.Ганхуяг Завханы аймгийн арслан Лха-Очирыг амласан ч тахим буулгав. Улсын арслан Ганбат аймгийн арслан Базаргүрийн Бадамсүрэнг амлан бариа зөрүүн дээрээс зайлаанд нь явчихлаа. Ингэснээр Бадамсүрэн өнөө жилийн улсын начинуудын салхийг хагаллаа. Х.Мөнхбаатар арслан аймгийн арслан Бадарчийг халз хутгаад өвдөглүүлэв. Д.Азжаргал арслан улсын заан Баасандоржоор давлаа. Улсын гарьд Дамбын Рагчаа улсын начин Ж.Нямсүрэнгээр тав давж шөвгөрлөө. Улсын гарьд Н.Ганбаатар улсын начин Чотонгийн Баянмөнхийг давснаар их шөвөгт шалгарсан юм. Ч.Санжаадамба заан Хөдөлмөрийн баатар, улсын харцага Н.Түвшинбаяраар тав давж түмэн олныг баясгалаа. Ж.Бат-Эрдэнэ гарьд Говь-Алтайн Тонхилын Б.Суманчулууныг амлан тахим буулгасан юм. Ингэснээр олон жил начны тааварч байсан Балжиннямын Суманчулуун улсын начин боллоо. Улсын гарьд Гончигдамба Таванханы улсын харцага Т.Өсөх-Ирээдүйг давав. Аймгийн хурц арслан Ч.Батчулууныг улсын заан Сайнбаяр нар ам аваад байсан. Барилдаан удааширсан тул хаялцах барьцыг улсын заан авсан юм. Гэсэн ч барилдааны дүнд нөлөөлөөгүй тул Батчулуун арслан барьц сонгоод ч давалцсангүй. Барилдааны төгсгөлд хурц арслан зааныг орхисноор улсын начны цолд багтлаа.

Улсын харцага Намсрайжавын Батсуурь улсын харцага Ө.Бат-Оршихыг гуд татан өвдөглүүлэв. Улсын начин Рэнцэнбямбын Пүрэвдагва Төв аймгийн Баянхангай сумын харьяат улсын заан Б.Батмөнхийг орхин начин цолоо баталлаа. Улсын харцага Т.Өсөх-Ирээдүйг амласан улсын гарьд Гончигдамба нэлээд удаан барилдсаны эцэст улсын гарьд давсан юм.
Энэ барилдаанд улсын харцага Цэдэвийн Содномдорж, улсын начин Б.Пүрэвсайхан нарыг хэнч амлалгүй тунасан. Уг барилдаанд Ховд аймгийн Чандмань сумын харъяат Улсын начин Пүрэвсайхан харцага Ц.Содномдоржийг давснаар улсын начин цолоо баталлаа.

Үндэсний их баяр наадмын хүчит бөхийн барилдааны тавын даваанд Монгол Улсын дархан аварга Г.Өсөхбаяр нутгийн бөх аймгийн арслан Адъяабатыг, улсын аварга С.Мөнхбат аймгийн арслан Баасандоржийг, улсын аварга Г.Эрхэмбаяр улсын начин Ш.Жаргалсайханыг, Өвөрхангайн улсын арслан Д.Ганхуяг Завханы аймгийн арслан Лха-Очирыг, улсын арслан Ганбат аймгийн арслан Бадамсүрэнг, Х.Мөнхбаатар арслан аймгийн арслан Бадарчийг, Д.Азжаргал арслан улсын заан Баасандоржийг, гарьд Н.Ганбаатар улсын начин Чотонгийн Баянмөнхийг, Санжаадамба заан Хөдөлмөрийн баатар, улсын харцага Н.Түвшинбаярыг, Ж.Бат-Эрдэнэ гарьд Говь-Алтайн Тонхилын Б.Суманчулууныг, улсын гарьд Гончигдамба Таванханы улсын харцага Т.Өсөх-Ирээдүйг, аймгийн хурц арслан Батчулууныг улсын заан Сайнбаяр нар ам аваад байгаа юм. Энэ барилдаанд улсын харцага Цэдэвийн Содномдорж, улсын начин Б.Пүрэвсайхан нарыг хэнч амлалгүй туналаа.

Цэнгэлдэхийн эргэн тойронд гадаадын жуулчдыг хамгаалах нийт 34 оюутан ажиллаж байна. Оюутнууд жуулчдыг зам гаргаж өгөх, халаасны хулгайчдаас сэрэмжлүүлэх, хоол хүнс авахад нь тусалж байгаа аж.

Шагайн харваад 490 харваачийн 50 баг оролцсон цэц мэргэнээ сорьсноос шилдэг зургаан баг тодорлоо.

Шилдэг зургаад Монгол Улсын үлэмж дархан мэргэн Идэрзориг ахлагчтай Өмнөговь аймгийн баг, үлэмж дархан мэргэн С.Ямааранз ахлагчтай АПУ групп, улсын мэргэн Базарханд ахлагчтай “Тайган-Алтай” групп, үлэмж дархан мэргэн Ц.Болдбаатар ахлагчтай “Сэлэнгэ-Орхонтуул”, үлэмж дархан мэргэн Ц.Гантулга ахлагчтай Сэлэнгэ аймаг болон үлэмж дархан мэргэн Ж.Мөнхжаргал ахлагчтай “Хөх чоно” группийн багууд тус тус шалгарав.