Month: July 2014

“Номин холдинг” группын түрээсэлж байсан “Их тэнгэр” цогцолборын 24 дүгээр байрыг төр өмчдөө буцаан авахаар болсон талаар мэдээлсэн. Үүнийг тус группын тэргүүн  Ш.Баярсайхан өнгөрсөн долоо хоног эсэргүүцэж, бичлэг цацсан билээ. Тэгвэл энэ асуудлуур Төрийн тусгай хамгаалалтын газрын дарга, хурандаа Ж.Наранбаатар тэргүүтэй хүмүүс мэдээлэл өглөө. Тэрээр мэдээлэхдээ ”Номин холдинг” группынхэн ашиг олох үүднээс хууль зөрчсөн. 2004 он хүртэл “Их тэнгэр” цогцолборын 24 дүгээр байр зориулалтынхаа дагуу хэвийн үйл ажиллагаа явуулж байсан. Харин 2004, 2006, 2007 онуудад “Номин Холдинг”  групп хууль зөрчсөн түрээсийн гэрээ байгуулж, удаан хугацаагаар иргэдэд түрээслүүлсэн. Нэгдүгээрт, 2004 онд байгуулсан гэрээ нь  2001 оны 130 дугаар тогтоолоор баталсан “Төрийн өөрийн эд хөрөнгө түрээслүүлэх журам”-ыг зөрчсөн. Хоёрдугаарт, 2004, 2007 онуудад байгуулсан түрээсийн гэрээг Төрийн өмчийн хороогоор батлуулаагүй, ТӨХ-ноос баталсан түрээсийн гэрээний үлгэрчилсэн загварыг баримтлаагүй. Түүнчлэн 3455 метр квадрат бүхий байрыг гэрээнд зориудаар бууруулан 2952 метр квадрат болгож тусгасан. Ингэснээр түрээсийн төлбөрийг хамгийн багаар тооцоход жилд 139.4 сая төгрөгийн түрээсийн төлбөр төлөлгүй хувьдаа завшсан. Улмаар иргэдэд өндөр үнэтэй дамлан түрээсэлсэн зэрэг зөрчлүүд илэрсэн. Иймд бид төрийн тусгай хамгааллалтай 24 дүгээр байрыг “Номин холдинг” компани түрээсэлсэн гэрээг  энэ оны гуравдугаар сарын 20-ны өдрийн тогтоолоороо цуцалсан ю” гэлээ. Мөн тус байранд хийсэн гэж буй 1.2 тэрбум төгрөгний хөрөнгө оруулалтыг ТӨХ-ноос зөвшөөрөл аваагүй учраас хууль бус хэмээн үзэж байгаагаа илэрхийлсэн юм.

Э.Номин

“Хааны эрэлд-2014” Энхийг дэмжих ажиллагааны Олон улсын хамтарсан сургуульд оролцсон АНУ-ын арми, тэнгисийн явган цэрэг болон Монгол Улсын зэвсэгт хүчний цэргийн инженерүүд, 071 дугаар ангийн бие бүрэлдэхүүн хамтран хүмүүнлэгийн арга хэмжээний хүрээнд Баянгол дүүргийн 144 дүгээр цэцэрлэгт 180 мянган ам.долларын бүрэн хэмжээний засварыг хийж гүйцэтгэлээ.
Уг ажлын хүрээнд цэцэрлэгийн сантехник, шал, хаалга, цонхыг иж бүрнээр нь сольж гадна талын хашаа, хүүхдийн тоглоомын талбайг шинэчлэн засварлаж дуусган өнөөдөр хүлээлгэн өглөө. 

Халх голын ялалтын 75 жилийн ойг тэмдэглэн өнгөрүүлэх хүрээнд “Ялалтын дөл” залуучуудын дөрөвдэхь удаагийн тойрон аялал ирэх ирэх сарын 22-30 өдрүүдэд зохион байгуулагдах гэж байна. “Ялалтын дөл” тойрон аялал нь хоёр орны залуучуудын нөхөрлөлийг бэхжүүлэх, хөгжүүлэх, өсвөр үеийнхэнд цэрэг эх оронч хүмүүжил олгох, 1939 оны Халх голын дайнд амь үрэгдсэн монгол-зөвлөлтийн дайчдын гэгээн дурсгалыг хүндэтгэх, хөшөө дурсгалыг сэргээх, залуучуудын эх оронч үзлийг бэхжүүлэх зорилготой аж. Энэ удаагийн аялал ОХУ-ын Эрхүү мужаас МУ-ын Дорнод аймгийн Халх гол сум хүртэл нийт 5500 км замыг туулах ба Оросын 75, Монголын 75-н залуучууд  оролцох бөгөөд Монголын талаас оролцох залуучуудыг Батлан Хамгаалах Яам болон Монголын Залуучуудын холбоо хамтран сонгон шалгаруулалт явуулах юм байна.  Уг тойрон аяллыг 2004, 2005 ба 2009 онуудад тус тус зохион байгуулж байсан бөгөөд 2009 онд Халх голын дайны ялалтын 70 жилийн ойд зориулан хоёр орны 140 залуучуудын бүрэлдэхүүнтэй багууд амжилттай оролцож байжээ.
Энэ удаагийн тойрон аяллын оролцогчдыг Орос хэлний мэдлэг  сайтай, спорт, урлагийн авьяастай, бие бялдрын хөгжил сайтайн зэрэгцээ аялалд оролцож байсан туршлагатай байх гэсэн тодорхой  шалгуураар сонгох аж.Тус аялалд оролцохыг хүссэн хүмүүс http://myf.mn/ сайтад тавигдсан анкетийг татаж авч бөглөөд тус анкетаа МЗХ-ны байранд авчирч өгч бүртгүүлэх бөгөөд сонгон шалгаруулалт 2014 оны 8 дугаар сарын нэгнээс эхлэх аж.

М.Эрдэнэ

Төрийн орон сууцны корпорацийн захиалгаар баригдсан “Буянт ухаа 1” хорооллын захиалагчийг тодруулах хоёр дахь шатны сугалааг энэ сарын 25-н буюу маргааш 15.00 цагт Спортын төв ордонд зохион байгуулахаар тов тогтоосон ч хойшлуулах шийдвэрийг гаргажээ.

Хойшлуулах шийдвэрийг ийн гаргасан нь иргэдээс ирүүлсэн санал хүсэлттэй холбоотой аж. Иргэдийн зүгээс “Зуны амралт эхэлж, хөдөө орон нутагт амарч байгаа тул  сугалаанд оролцох боломжгүй байна. Сугалааг хойшлуулж өгнө үү” гэжээ. Иймээс Төрийн орон сууцны корпориацаас иргэдийн санал хүсэлтийн харгалзан үзэж сугалааг хойшлуулах болсон байна.

Сануулахад,  “Буянт ухаа 1” хороолол нь 1764 айлын орон сууц бөгөөд энэ удаад 323 захилагчийг тодруулах сугалаа амралт дуусч, ажил жигдрэх хүртэл хойшилж байна.

М.Эрдэнэ

Өнөөдрийн байдлаар Завхан аймгийн Дөрвөлжин, Говь-Алтай аймгийн Хөхморьт, Булган аймгийн Хишиг-Өндөр сумын дөрөвдүгээр багийн Нарангийн гол, нийслэлийн ХУД-ийн 13 дугаар хороонд боом өвчин гараад байна.  Боомын голомтод 21 өрх, 13528 мал байгаа бөгөөд 80 мал үхэж,  гурван хүн, 15 мал өвчилжээ. Түүнчлэн Завхан аймгийн Дөрвөлжин суманд 21 хоног, Говь-Алтай аймгийн Хөхморьт, ХУД-ийн 13 дугаар хороонд тус бүр 14 хоногийн хорио цээр тогтоогоод байгаа аж.

Мөн Булган аймгийн Хишиг-Өндөр суманд боомоор өвчилсөн гэх сэжигтэй хоёр хүнийг хэвтүүлэн эмчилж байгаа бөгөөд тус сумын Засаг даргын захирамжаар хорио цээр тогтоон, вакцинжуулалт хийж, зургаан адуу, нэг үхрийн сэг зэмийг устган ариутгал, халдваргүйжүүлэлт хийжээ. Үүний зэрэгцээ холбогдох газруудаас боом өвчнөөс урьдчилан сэргийлэх сурталчилгаа, зөвлөмжийг нутгийн иргэд болон хил залгаа сумдад тарааж, голомтын ойролцоох найман өрхийн 2518 малд үзлэг, тандалт хийсэн байна.

М.Эрдэнэ