Халх голын байлдааны ялалтын 85 жилийн ойг тохиолдуулан “Халхын гол-85” судалгаа, үр дүн, чиг хандлага” сэдэвт олон улсын эрдэм шинжилгээний хурал боллоо.
Хурлыг Батлан хамгаалах яам, Шинжлэх Ухааны Академийн харъяа Түүх угсаатны зүйн хүрээлэнтэй хамтран зохион байгуулав. Эрдэм шинжилгээний хуралд ОХУ, БНХАУ, БНСУ, Япон улсаас манай улсад суугаа Элчин сайд болон Элчин сайдын яамны дэргэдэх цэргийн атташе нар, Зэвсэгт хүчний жанжин штаб, төрийн цэргийн командлалууд, Стратеги судлалын хүрээлэн, МУИС, МУБИС, Хил хамгаалах ерөнхий газар, Хилийн цэргийн хил судлалын хүрээлэн, Батлан хамгаалахын эрдэм шинжилгээний хүрээлэнгийн төлөөлөл эрдэмтэн судлаачид оролцсон ач холбогдол бүхий хурал болж байгаагаараа онцлог юм. Хурлын талаар БХЭШХ-ийн захирал, доктор, профессор хурандаа Д.Содномцог “Түүхт ялалтын баяр Халхын голын 85 жилийн ой тохиож байна. 1939 оны наймдугаар сарын 20-ны энэ өдөр онцлогтой түүхэн өдөр. Монгол-Зөвлөлтийн цэргийн давшилт эхэлсэн өдөр тохиож байна. Улс төр дипломатын харилцаа байр сууринаас геополитикийн талаас бодлогын үр дүнд зэвсэгт мөргөлдөөн үүсэж даамжирч бүс нутаг, дэлхийн хэмжээнд дайнд хүргэдгийг тал талын эрдэмтэн судлаачид хэлэлцэж буйгаараа онцлогтой хурал болж байна” гэв.
Хуралд илтгэгчийн төлөөлөл болох БНСУ-ын Чосуны их сургуулийн Зүүн хойд Азийн судалгааны хүрээлэнгийн судлаач, доктор (Ph.D) профессор Хэон Ёнг Сим “Би анх удаа Монголд ирж хуралд илтгэл тавих гэж байгаадаа баяртай, гүн гүнзгий сэтгэгдэл өндөр байна. Танай хүмүүсийн яаж амьдарч байгааг дахин ирж хармаар санагдаж байна. Хуралд солонгос хүн оролцон илтгэл тавих гэж байгаа нь анхдагч гэдгээр онцлог юм. Дараа дараагийн эрдэм шинжилгээний хуралд илүү их судалгаа хийн оролцоно гэж итгэл дүүрэн байна” гэв.
Ц.Отгонсүрэн