Монголын Хараагүйчүүдийн Үндэсний Холбооноос өнгөрөгч дөрөвдүгээр сарын 24-ний өдөр төрийн гурван өндөрлөгт хандан хараагүй хүүхдийн сурч боловсрох эрхтэй холбоотой шаардлага хүргүүлсэн билээ. Тэдний тавьж буй шаардлагыг БСШУС-ын яамнаас сонсоод, 116-р сургуульд шалгалт хийхээр ажлын хэсэг байгуулсан байна. Ажлын хэсэг өнөөдөр өглөө тус сургуульд шалгалтаар очсон ч сургуулийн багш нарын эсэргүүцэлтэй тулснаар шалгалт хийж чадалгүй буцсан байна.
Багш нар “Багш бидний хөдөлмөрийг үндэслэлгүй битгий үгүйсгэ”, “Хараагүйчүүдийн үндэсний холбоо биднээс илүү шавь нарт минь хайртай гэж үү”, “Сургуулийн хэвийн үйл ажиллагаа алдагдсан тохиолдолд бүх хариуцлагыг Монголын хараагүйчүүдийн холбоо, түүний гар хөл бологчид хариуцах ёстой”, “Өөрсдийнхөө ашиг сонирхолд, сургууль, сурагчдын нэрийг бүү оролцуул”, “Хамт олны нэр хүндийг гутаан доромжлогч бидэнд хэрэггүй” гэх мэтчилэн уриа, лоозон барин жагсчээ.