Парис хотын Луврийн музейд хадгалагддаг сэргэн мандалтын үеийн суут бүтээлд халдсан хэрэг Ням гарагт гарчээ.
Тэргэнцэртэй, настай эмэгтэйн дүрд хувирсан эрэгтэй Леонардо Да Винчигийн бүтээл болох Мона Лизагийн хөрөг рүү бялуу шидсэн байна.
Халдлагын үеэр бүтээлд ямар нэг гэмтэл гараагүй ба хамгаалалтын шилэн хорго бялууны кремээр бохирлогджээ.
Хамгаалалтын албаныхан хиймэл үс зүүж, уруулаа будсан 36 настай эрэгтэйг музейгээс авч явсан байна.
Түүнийг Парис хотын цагдаагийн газарт саатуулж, урлагийн бүтээлд хохирол учруулсан хэргээр шалгаж эхэлжээ.
Баригдагч этгээд өмнө нь бас Луврийн музейд ийм үйлдэл гаргаж байсан тул энэ удаа зүсээ хувиргаж нэвтэрсэн юм байна.
Тэрбээр баривчлагдаад явахдаа “Хүмүүс эх дэлхийгээ сүйтгэж байна. Энэ талаар бодоцгоо. Уран бүтээлчид дэлхийгээ хайрла гэж та нарт хэлсэн. Би үүнийг сануулах гэж ингэсэн юм” хэмээн хашхирч байжээ.
Мона Лизагийн хөрөг рүү хүчил цацсан хэрэг 1950-аад онд гарч байсан юм. Үүний дараа бүтээлийг шилэн хоргонд байрлуулах болсон байна.
Эх сурвалж: BBC