Монгол банкны Дархан-Уул аймаг дахь хэлтсийн захирал Д.Дарханбаяр орон нутгийн сэтгүүлчдэд мэдээлэл хийж “Өмнө нь амины орон сууц худалдан авчихаад байсан иргэдийн хувьд зээлийн нөхцлийг хангасан тохиолдолд дахин санхүүжилтийн журмаар зээл нь 8 хувьд шилжих боломжтой” гэжээ.
Тэрбээр “Монголбанк “Орон сууцны санхүүжилтийн журам”-даа нэмэлт, өөрчлөлт оруулж хөдөө орон нутгийн иргэдийн “Амины орон сууц”-ыг 8 хувийн хүүтэй зээлд хамрагдах боломжтой болгосон. Орон сууцны санхүүжилтийн журамд хөдөө орон нутгийн амины орон сууц гэж аймаг, сумын батлагдсан хөгжлийн төлөвлөгөө, орон сууцны хотхон, хорооллын хэсэгчилсэн ерөнхий төлөвлөгөөний дагуу баригдаж, эрх бүхий байгууллагын шийдвэрээр байнгын ашиглалтанд орсон, дэд бүтэцийн шийдэл бүхий орон сууцыг хэлэх ба газрыг өмчлөх, эзэмших эрх улсын бүртгэлд бүртгэгдсэн, эзэмших эрх нь 20-иос дээш жилийн хугацаатай байх шаардлагатай хэмээн журманд заасан гэдгийг хэллээ.
Тус аймгийн хэмжээнд одоогийн байдлаар нийт арилжааны 10 банкны салбар ажиллаж байна. Монгол банкны хэлтэсээс тэдгээр банкны салбаруудын төлөөлөлтэй энэ асуудлаар уулзалт хийж Капитал банкнаас бусад арилжааны банкууд өнөөгийн байдлаар зээлийн журмыг судлаж өөрсдийн журмандаа өөрчлөлт оруулах ажлыг зохион байгуулж байна гэв. Тэрбээр цааш нь хэлэхдээ амины орон сууцыг жилийн 8 хувийн хүүтэй зээлээр авах боломжийг олгож байгаа энэ зээлийн журам нь зөвхөн худалдах, худалдан авах харилцаанд үйлчлэхээс бус хувьдаа амины орон сууц барьсан ялангуяа түүнийгээ банкны тухайн төрөлд хамрах зээлээр барьсан нөхцөлд үйлчлэх боломжгүй” гэлээ.