Засгийн газар хуралдаж байна

Засгийн газрын ээлжит хуралдаан хуваарь ёсоор өглөө 08.00 цагт эхэлнэ. Хуралдаанаар Covid-

19-ийн нөхцөл байдал болон авч хэрэгжүүлж буй арга хэмжээнүүдийн талаарх мэдээллийг сонсоно.

Өчигдөр 11:00 цагийн байдлаар манай улсад Covid-19-ийн батлагдсан тохиолдол 801, дотоодын халдварын тоо 358 болсон. Нийт 358 тохиолдлын 84 нь Улаанбаатар хотод бүртгэгдсэн. ХӨСҮТ-д нийт 434 хүн эмчлүүлж байгаа талаар ЭМЯ-наас мэдээлсэн. Батлагдсан тохиолдлуудаас биеийн байдал нь маш хүнд дөрвөн хүн, хүнд зургаа, хүндэвтэр 82, хөнгөн 342 хүн байна.

Засгийн газар өнгөрсөн Ням гариг (2020.11.29)-т ээлжит бусаар хуралдаж, Улаанбаатар болон халдварын голомт нутаг болоод байгаа Сэлэнгэ, Архангай аймгийн засаг захиргаа, нутаг дэвсгэрийн нэгж, төрийн болон нутгийн захиргааны байгууллага, иргэн, хуулийн этгээдийг 2020.12.11-ний 06:00 цаг хүртэл Бүх нийтийн бэлэн байдлын зэргийг мөрдөхийг хэвээр үлдээх шийдвэр гаргасан.

Халдвар бүртгэгдээгүй бусад аймгуудын хөл хорионы зэргийг 2020.12.01-ний 06:00 цагаас эхлэн бууруулж, өндөржүүлсэн бэлэн байдлын горимд шилжүүлсэн билээ.

Засгийн газрын өнөөдөр (2020.12.02)-ийн хуралдаанаас гарсан шийдвэрийн талаар эргэн мэдээлнэ.