Хятад улсаас чанарын шаардлага хангаагүй мах, махан бүтээгдэхүүн өнгөрсөн шөнө оруулж ирснийг Нийслэлийн мэргэжлийн хяналтын газраас /НМХГ/ илрүүлжээ. Тодруулбал, загас, тахиа зэрэг мал, амьтны гаралтай 2-3 тонн махыг барилгын материал дунд тээвэрлэж оруулсан байна.
Энэ талаар НМХГ-ын Мал эмнэлгийн хяналтын улсын байцаагч Г.Энхтөр “Өмнөговь аймгийн Цагаан хаднаас зориулалтын бус тээврийн хэрэгслээр мал амьтны гаралтай махыг барилгын материалтай хамт тээвэрлэсэн зөрчлийг илрүүлэн, хяналт шалгалтыг үргэлжлүүлж байна. Энэ төрлийн бүтээгдэхүүнийг температурын горим шаардсан тээврийн хэрэгслээр зөөвөрлөх ёстой байдаг.
Энд ойролцоогоор 90 гаруй хайрцаг, шуудай байна. Тиймээс хэчнээн төрлийн бүтээгдэхүүн байгааг нэг бүрчлэн шалгаж төрөл тус бүрээс нь дээж авч лабораторид шинжлүүлнэ. Дээжийн хариу гарах хүртэл тухайн агуулахыг битүүмжлэх юм” хэмээх мэдээллийг өгөв.
