Нийслэлийн Соёл, урлагийн газраас Улаанбаатар хотын явуулын тайзыг ашиглалтад оруулжээ. Тус явуулын тайз бүхий автомашин нь 2008 оноос эхлэн ашиглагдаж байгаад зогссоныг сэргээн засварласан байна. Энэхүү тайзыг ашиглан явуулын урлагийн тоглолт, өдөрлөг, уулзалт зэргийг тогтмол зохион байгуулахын зэрэгцээ Улаанбаатар чуулгын шилдэг уран бүтээлийн тоглолтыг нийслэлийн 152 хороодын иргэдэд зориулан, үнэ төлбөргүй зохион байгуулахаар төлөвлөсөн аж.
Хөгжим, гэрлийн иж бүрдэл бүхий зориулалтын автомашинтай явуулын тайз нь үйл ажиллагаагаа энэ сарын 28-нд 19:00 цагаас Хан-Уул дүүргийн 5, 6 дугаар хороодын иргэдэд зориулсан Улаанбаатар чуулгын шилдэг уран бүтээлийн тоглолтоор эхлүүлэх юм байна.
