Хятадын хамгийн том сошиал сүлжээнд тооцогддог WeChat өнгөрсөн сар шинийн баяраар нэг тэрбум хэрэглэгчтэй болсныг Tencent компанийн гүйцэтгэх захирал Ма Хуатэн өнөөдөр зарлажээ.
2017 оны сүүлийн улирлын тайланг танилцуулахдаа тус компани 980 сая хэрэглэгчтэй болсныг мэдэгдэж байсан юм. Сар шинийн баяраар улаан дугтуйтай мөнгө бэлгэнд солилцдог уламжлалтай Хятадад өнгөрсөн сард 688 сая WeChat хэрэглэгч дижитал дугтуй солилцсон нь хэрэглэгчийн тоог өсгөхөд нөлөөлсөн байна.
Хятад хэлээр Вэйшин гэдэг WeChat бол зөвхөн мессэнжэр биш, сошиал сүлжээ, мобайл төлбөр, такси дуудлага, хоол хүргэлт зэрэг олон үйлчилгээг нэг дор багтаасан платформ юм.
Өнөөдөр дэлхий дээр хамгийн олон хэрэглэгчтэй сошиал сүлжээ нь 2.13 тэрбум хэрэглэгчтэй Фэйсбүүк болж байна. Тус компанийн эзэмшдэг WhatsApp мессэнжэр аппликэшнийг 1.5 тэрбум хүн хэрэглэдэг гэдэг. Эдгээрийн араас тэрбумын босгыг давсан хэрэглэгчтэй гурав дах платформ нь WeChat болж байна.