Өвөрхангай аймгийн Уянга сумын сургууль лего робот сургалтын лабораторитой боллоо. Ерөнхий боловсролын сурагчдад техник технологийн суурь боловсрол эзэмшүүлэх, мэргэжлийн чиг баримжаа олгох, бүтээлч сэтгэлгээг хөгжүүлэх зорилт бүхий Залуу зохион бүтээгчдийн дугуйланг сэргээх санаачилгыг УИХ-ын дарга З.Энхболд гаргасан бөгөөд “Аум алт” ХХК-ийн гүйцэтгэх захирал Ц.Мягмардорж 40 сая төгрөгөөр санхүүжүүлснээр Уянга суманд лего робот сургалтын лаборатори байгуулсан байна.
Мөн “Робот хөгжил” ТББ- аас Уянга сумын ерөнхий боловсролын сургуулиудын зургаан багшийг сургалтад хамруулжээ. Тус лабораторид ухаалаг самбар, компьютер, роботын төхөөрөмж гээд шаардлагатай бүх тоног төхөөрөмжийг суурилуулсан байна.