Наадам хаяанд ирсэн энэ өдрүүдэд нутаг нутгийн бөхчүүдийн гал наадмын сорилго барилдаан явуулж байна. Энэ амралтын өдрүүдэд Увс аймгийн “Увс нуур” галын бөхчүүд их сорилго барилдаанаа зохион байгуулжээ. Увсын бөхчүүд өнөө жил Харзтайд ир бяраа хурцалж байгаа юм. Тэд өнгөрсөн сарын 9-нөөс эхлэн нэгдсэн бэлтгэлд гарч, улсын аварга Сүхбаатарын Мөнхбат, арслан П.Бүрэнтөгс, Н.Батсуурь, харцага Ө.Бат-Орших, Т.Баасанхүү тэргүүтэй 40-өөд бөх гарсан байна. Улсын заан Д.Бумбаяр нутгийн бөхчүүдээ ахалж байгаа аж. Увсын галд улсын харцага А.Цацабшир, Н.Жаргалбаяр тэргүүтэй Дорноговь, Сэлэнгийн бөхчүүд нэгдэн бэлтгэлээ базааж байна. Энэхүү наадмын сорилго барилдаанд дээрх нутгийн 128 бөх зодоглсноос Сэлэнгэ аймгийн Мандал сумын харьяат улсын харцага Нэгдэлийн Жаргалбаяр өнгөтэй байгаагаа харуулж түрүүлсэн бол Увс аймгийн Ховд сумын харьяат улсын арслан Намсрайжавын Батсуурь үзүүрлэлжээ. Ийнхүү нутаг, нутгийн бөхийн гал наадмын их сорилго барилдаанаа хийсээр байна.
Э.МӨНХ