Өвлийн улирлын хүйтэн температур, хүчтэй салхи, хуурай агаар зэрэг нь хүний арьс болон үсийг гэмтээдэг. Ялангуяа нүүрний арьс их эмзэг болж, хуурайшиж, улайж, хөлдөх тохиолдол бий. Агаарын хэт хүйтэн байдал арьсны уян хатан чанарыг алдагдуулж, хуурайшуулдагтай холбоотой. Энэ нь хавар илүү мэдрэгддэг. Хүмүүс үүнийг анзаарахгүй хавар арьс их хуурайшаад байна гэдэг. Үүнээс сэргийлэх хэд хэдэн арга бий. Нүүрээ буцалсан ус болон цэвэршүүлсэн бүлээн усаар угааж занших хэрэгтэй. Мөн тухайн арьсанд тохируулан тос хэрэглэх нь чухал. Тэр дундаа монгол тосыг өвөл түрхвэл зохимжтой. Учир нь монгол тосны найрлага нь тослог ихтэй, хүйтэн температураас хамгаалах сайн бүрхүүл болдгоороо онцлогтой гэнэ. Хэрэв нүүрний арьсны аль нэг хэсэг хөлдсөн, эсвэл цайрсан бол ургамлын тосыг хөвөнд шингээн болгоомжтой, зөөлөн үрэх маягаар арчина. Чийгшил нь багассан арьс хуурайшин барзайж, улайж загатнан, цаашлаад батга гарах нөхцөл болдог. Тиймээс арьсны чийглэг байдлыг огт алдаж болохгүй. Зарим чийгшүүлэгч керосины агууламж өндөртэй байдаг тул өвлийн улиралд таны арьсыг цочроодог. Иймээс байгалийн гаралтай (зуун наст, өргөст хэмх) био-энергитэй усан суурьтай чийгшүүлэгч сонгоорой. Өвлийн нар зуны нарнаас ч илүү арьсанд нөлөөлдөг тул суурь тос түрхсэнийхээ дараа нарны хамгаалалттай тос заавал түрхээрэй. Шөнийн цагаар хүний бие чийгшил хурдан шингээдэг тул орой унтахдаа нүүрэндээ чийгшүүлэгч түрхэж, түүнчлэн гар, хөмсөг, тохой, хөл, өвдөг зэрэг нимгэн арьстай хэсгүүддээ тос түрхэж унтаж байгаарай.
Та арьсаа долоо хоногт 1-2 удаа тогтмол гуужуулагчаар цэвэрлэж байх хэрэгтэй. Ингэхгүй бол хуучин арьс арьсны нүх сүвийг бөглөж, бохирдол үүсгэн, чийг тосны тэнцвэрийг алдагдуулдаг байна. Үүнээс үүдэж батга гарах, будаг шингэхгүй байх зэрэг асуудлууд үүсдэг. Өвлийн улиралд усны агууламж өндөртэй хүнсний бүтээгдэхүүн хэрэглээрэй. Тухайлбал, лууван, улаан лооль болон бусад бүх төрлийн жимс жимсгэнийг дангаар нь жүүс болгон хэрэглэх боломжтой. Зөгийн бал, өргөст хэмх, тараг, гадил, зуун наст зэрэг нь чийгшил өгөх хамгийн үр дүнтэй хүнсний бүтээгдэхүүнд тооцогддог байна. Тиймээс эдгээрийг ашиглан өөрийн гараар маск бэлдэж, нүүрэндээ долоо хоногт 2-4 удаа тавьж байгаарай.