Монгол Улсын 27 дахь Ерөнхий сайд Н.Алтанхуяг
саяхан нэгэн хэвлэлд ярилцлага өгсөн нь шуугиан тарьж байна. Тэрээр олны анхаарлыг
татсан хурц шүүмжлэлтэй зүйлс ярьсан бөгөөд тэдгээрээс онцлон хураангуйлбал, “Би
Монголынхоо ард түмний сонголтыг хүндэтгэнэ. Гэхдээ өнгөрсөн сонгуулийн өмнө нь
ч тэр, сонгуулийн үеэр ч тэр олон луйврын, гэмт хэргийн шинжтэй, хууль бус үйлдлүүд
болсон. Ийм үйлдлүүд хийгдэж, захиалгын УИХ бүрдэх нөхцөл бий болсон талаар өнгөрсөн
дөрөвдүгээр сард миний бие мэдэгдэл хийж байсныг хүмүүс санаж байгаа байх”, “Үнэндээ
арай ч дээ гэмээр олон хууль бус үйлдлийг явцуу эрх ашигтаа нийцүүлэн хуйвалдан
хийсээр хуйвалдааны төрийг бүрдүүлж чадлаа.
Хэвлэл мэдээллийн хэрэгсэл ашиглан тогтмол
давтамжаар тархи угааж, хууль хүчний байгууллагуудыг ашиглан өрсөлдөгч улстөрчдийнхөө
нэр хүндэд удаа дараа халдсаар, зарим нэгийг нь барьцаалж байгаад тэд зорьсондоо
хүрлээ”, “Өнгөрсөн сонгуулиар Монголоо гэсэн сэтгэлтэй, Монголынхоо төлөө зүтгэх
аль ч нам ялаагүй. Харин ганцхан бүлэглэл л хуйвалдааны төрийг байгуулж чадсан нь
гашуун үнэн. Харамсалтай нь энэ бүлэглэлд монгол хүнийг Монголд нь сайхан амьдруулах
ямар ч хүсэл байхгүй нь ахиад л нотлогдож байна”, “Энэ бүлэглэл ард түмнийг айдсаар
дарангуйлж, ходоодыг нь хагас хоосноор барьж, цаагуураа Монголын баялгийг гаднынхантай
хувааж цөлмөөд өөрсдөө л хүчирхэгжин хөлжих ганц л зорилго бий”, “Улам илүү хараат
болсон шүүх, нэг хоёрхон хүний дохио зангаагаар ажилладаг болсон хуулийн байгууллагууд
л байна”, “Өөрийн толгойгүй Ерөнхий сайдад эрх мэдэл дутахаас яах вэ”, “Гүйцэтгэх
засаглалын тэргүүн шийдвэр гаргах, түүнийгээ хамгаалах эрх мэдэлгүй бол бид хөгжил
гэдэг үгийг мартах хэрэгтэй”, “Хүсээгүй шийдвэр, хүсээгүй даалгавар, дээр нь зохион
байгуулалттай, давтамжтайгаар ирэх элдэв гүтгэлэг дайралт бол их хэцүү байдаг. Ер
нь Монголын ирээдүйг авч явах чадалтай олон залуу, нэг хоёр хүний шуналын золиос
болж дуусдаг жишиг битгий тогтоосой”, “Ардчилсан намын нэр хүндийг шалд нь унагаж,
засаглаж чаддаггүй нам, хоорондоо хэл амаа ололцдоггүй нам гэдэг ойлголтыг нийгэмд
хоногшуулан сонгуульд ялагдуулах олон эрээ цээргүй хуйвалдаан явсныг бүгд мэдэж
байгаа”, “Товчхондоо бол зорилгодоо хүрч намаа сэхээнд ортол нурааж тамласан хүн,
эмчийн хувцас өмсөөд мэс засал хийж аварна гээд ороод ирнэ гэдэг юу л бол. Улс орны
хөгжил дэвшил, Монголын ардчиллын ирээдүй, олон мянган гишүүний итгэл үнэмшил, хувь
заяатай холбоотой асуудалд арай л явцуу эрх ашгийн, аминч, хувиа хичээсэн өнцгөөс
хандсан даа”, “Ардчилсан нам бүх шатандаа бүтээлч, шинийг санаачлагч, хүнд суртлыг
арилгагч байж чадсан ч харамсалтай нь энэ бүхнийг эрх баригчид эхнээс нь буцааж
хүнд хөшүүн хойрго байдал руу ухрааж байгаа нь харамсалтай. Ер нь Ардчилсан нам
маань МАНАН гэдэг бүлэглэлээс салж байж нам шинжээ хадгалж, улс орноо урагшлуулж
чадна”, “МАНАН бол үнэндээ том биш шүү дээ, хэдхэн хүний бүлэглэл. Барууны гэж нэрлэсэн
хэт хөрөнгө мөнгө шүтсэн, эрх ашгаараа нэгдсэн, эх орон, өв соёл, бүр цаашилбал
тусгаар тогтнолоо хүртэл хоёрдугаарт эрэмбэлдэг хүмүүс шүү дээ”, “Эхнээсээ манай
нам дээр хийж хорлосон танил аргууд нь одоо эрх баригч намын бодлого шийдвэрүүд
дээр тодроод ирлээ.
Цөөхөн гэр бүлийн явцуу шунал өнөөдөр Монголын ард түмний тусгаар
тогтнол, ардчиллын баталгаа болсон нам гэдэг байгууллагын дээр гарснаар тэд утсан
хүүхэлдэйнүүдээрээ бодлого бариулсан болж үндсэн зорилгодоо далдуур хүрч, эрх мэдлийг
мөнхөд атгана гэж үзэж байна”, “Хэрэг илрэх шатандаа явж байна гэсээр нэлээдгүй
хугацаа өнгөрлөө. Өмнө нь энэ хэргийн дуулианыг олон удаа улс төрийн зорилгоор ашиглаж
байсан”, “Урд нь орд газруудаа урьдчилж зараад, сонгуулийн амлалтаа биелүүлж, мөнгөө
бэлнээр тараагаад гадагшаа урсгадаг байсан бол одоо урт хугацааны үр өгөөжтэй бодит
хөрөнгө болж үлдсэнтэй хэн ч маргахгүй”, “Өнөөгийн эрх баригчдад ямар ч бодлого
алга. Яг яах гээд ард түмнээ айлгаад байгаа юм. Мандуулна, хөгжүүлнэ гээд байснаа
хийхгүй юм уу. Эсвэл бүх зүйлийг сөнөсөн, дампуурсан гэж итгүүлээд улсаа хувьчилж
авах гээд байгаа юм уу”, “МАН-ын Засгийн газрын дэвшүүлсэн олон асуудал бодлогогүй
үйлдэл болж, нийгмийг бухимдууллаа. Албан тушаалын томилгоо хийж, татвар нэмж, иргэдийнхээ
халаас руу гараа дүрэхээс өөр хийж байгаа ажил алга. Тэд ийм л байсан, тиймээрээ
л байна” гэж ярьжээ.
Д.САРУУЛ