Өнгөрсөн амралтын
өдрөөр Үндэсний соёл амралтын хүрээлэнгээс “Өөрийгөө ялах” 12 ба 24 цагийн
гүйлтийн тэмцээний гараагаа эхлүүлсэн тамирчид өчигдөр 10:00 цагт барианд орж
иржээ.
Тэмцээнийг “Шри Чинмойн” марафоны баг, Нийслэлийн БТСГ, Монголын хэт холын
марафон гүйлтийн холбоо, Үндэсний Соёл Амралтын хүрээлэн зэрэг байгууллагууд хамтран зохион
байгуулсан байна. Тэмцээн 12 ба 24 цагийн төрлөөр 20-34, 35-49, 50 -аас дээш
гэсэн насны ангилалд тамирчдыг шалгаруулсан бөгөөд тухайн насны ангилалд 12 ба
24 цагийн хугацаанд хамгийн хол зайг туулсан гүйгчид нь ялагч болсон байна.
Тэмцээний зам нь 500 м-ийн тойргоор явагдсан бөгөөд хяналтын тойргийн шүүгчид,
улсын зэрэгтэй шүүгчид бүтэн өдрийн турш ажиллажээ. Ингээд 12 цагийн гүйлтийн 20-34 насны эрэгтэй ангилалд “Худалдаа
хөгжлийн банк”-ны ажилтан Н.Баттулга 95 км гүйж, 35-49 насны эрэгтэй ангилалд
УБТЗ-ын замын II ангийн “Замчин” спорт клубийн тамирчин Т.Лхагвасүрэн 73
км гүйж, 50-аас дээш насны эрэгтэй ангилалд “Шри Чинмойн” марафоны багийн
тамирчин С.Ганхүү 73.5 км гүйж тэргүүн байр эзэлсэн байна. Харин 35-49 насны
эмэгтэй ангилалд БЗД-ийн иргэн Б.Баярмаа 80 км гүйж, 50-аас дээш насны эмэгтэй
ангилалд Ц.Оюунсүрэн 75 км гүйж
тэмцээний тэргүүн байруудыг эзэлжээ. Түүнчлэн
24 цагийн гүйлтийн 20-34 насны эрэгтэй ангилалд
СХД-ийн иргэн П.Отгонбаатар 162.5 км гүйж, 50-аас дээш насны эрэгтэй ангилалд “Эрдэнэт”
үйлдвэрийн тамирчин Б.Оюунбаатар 80км гүйж тэргүүлсэн байна. Тэгвэл 35-49 насны
эмэгтэй ангилалд БГД-ийн иргэн С.Оюунгэрэл 112 км гүйж, 50-аас дээш насны
эмэгтэй ангилалд БЗД-ийн иргэн Б.Баярсайхан 101 км гүйцгээж тэмцээний тэргүүн
байруудыг эзэлж алтан медаль хүртжээ. Тэмцээний явцад гүйгчдийн биеийн байдал,
эрүүл мэндийг эмч нар тодорхой цагийн интервалаар хянасан бөгөөд иллэг бариа
хийх сувилагчид ажиллажээ. Мөн гүйлтийн явцад биеийн алдагдсан энергийг нөхөх
хоол тэжээлээр тогтмол үйлчилсэн аж. Тус тэмцээн нь нийтийн биеийн тамирыг
дэмжиж хөдөлгөөний дутагдлыг багасгах зорилготой бөгөөд энэ жилээс эхлэн олон
улсын стандартын дагуу Соёл спорт аялал жуулчлалын яамнаас тус тэмцээний төрөлд
тамирчдад улсын зэрэг цол олгохоор болжээ.
