УИХ-ын нэгдсэн чуулганы үдээс хойших хуралдаанаар Монгол Улсын урт хугацааны тогтвортой хөгжлийн үзэл баримтлалын тухай төслийг хэлэлцэхийг дэмжив.
Төрийн байгуулалтын байнгын хорооны дарга А.Бакейн хэлснээр уг үзэл баримтлалыг баталбал Монголын төрийн бодлого залгамж чанартай болох аж. Учир нь УИХ-аас Хөгжлийн бодлого төлөвлөлтийн тухай хуулийг баталсан нь ийм боломж олгох юм байна.
УИХ-ын гишүүн С.Баярцогт энэ үзэл баримтлалыг хэрэгжүүлэх механизм байхгүй байгааг шүүмжилсэн юм. Харин Д.Оюунхорол гишүүн хөдөө орон нутгийн хөгжлийг дэмжих механизмыг тусгаж өгөхийн чухлыг онцолж байв.
Монгол Улсын урт хугацааны тогтвортой хөгжлийн үзэл баримтлалын тухай төслийг энэ сарын эхээр УИХ-ын даргад өргөн барьсан билээ. НҮБ-ын Ерөнхий ассамблейгаас өнгөрсөн есдүгээр сард 2030 он гэхэд хүн төрөлхтний хүрэх тогтвортой хөгжлийн зорилтуудыг тодорхойлсон. Үүнтэй холбоотойгоор манай улс урт хугацааны хөгжлийн бодлогоо боловсруулж, парламентаараа хэлэлцэж байгаа юм.