Чингэлтэй дүүргийн Засаг даргын Тамгын газрын санхүүжилтээр тус дүүргийн Өрхийн эрүүл мэндийн төвүүдээс нийт 15 сувилагч Анагаахын шинжлэх ухааны үндэсний их сургуулийн төгсөлтийн дараах сургалтанд хамрагдсан билээ.
Уг сургалтын хүрээнд “Өрхийн сувилахуй” буюу өрхийн сувилагч мэргэжлээр мэргэшин суралцсан сувилагч нар энэ сарын 9-нд мэргэжлийн үнэмлэхээ гардан авлаа.
Нийслэлийн эрүүл мэндийн газраас 2018 оныг “Өрхийн эрүүл мэндийн төвийг дэмжих жил” болгон зарласан. Тиймээс цаашид бусад дүүргийн Өрхийн эрүүл мэндийн төвүүдийн сувилагч нарыг “Өрхийн сувилахуй”-н чиглэлээр мэргэшүүлж, хүн ардад сувилахуйн мэргэжлийн тусламж үйлчилгээ үзүүлэхээр зорьж ажиллаж байгаа юм гэж нийслэлийн Эрүүл мэндийн газраас мэдээллээ.