Монголын гоёл чимэглэлийн уран дархчуудын анхдугаар уралдааныг Германы Олон улсын хамтын ажиллагааны нийгэмлэг, Щвейцарийн хөгжлийн агентлаг хамтран зохион байгуулах гэж байна. “Уламжлалаар ирээдүйг гоёхуй” сэдвийн хүрээнд болох энэхүү уралдаанд уран дархчууд алт, мөнгийг дангаар нь эсвэл хослуулан ашигласан гоёлын бөгж, ээмэг, зүүлт урлаж өрсөлдөх ажээ.
Монгол дархчууд гоёл чимэглэлийн зүйл урлаж ирсэн өнө удаан жилийн түүх, уламжлалтай. Уран дархны урлалд нутаг нутгийн онцлог бүхий харилцан адилгүй арга барил, ур хийц гэж бий. Өнөө цагийн монголчууд орчин үеийн хэв загвар бүхий гоёл чимэглэлийн зүйлийг илүү их шимтэн хэрэглэх болсон учир энэхүү уралдаанаар дамжуулан загвар, хэв маягийн шинэ санаа, шинэлэг загвар эрэлхийлэхийг зорьж байгаа гэнэ. Тиймээс уламжлалтаас өөр шинэ арга барилаар, төрөл бүрийн материал ашиглахын зэрэгцээ хуучны хэв донжийг орчин үеийн загвартай хослуулан урлах боломжтой юм байна.
Гоёл чимэглэлийн уран дархчуудын улсын анхдугаар уралдааны бүртгэл хоёрдугаар сарын 10 хүртэл үргэлжлэх бөгөөд гуравдугаар сарын 15-ны дотор бүтээлүүдийг хүлээн авч шилдгүүдийг шалгаруулан монгол дархны ур ухааны гайхамшиг болсон бүтээлүүдийг нийтэд танилцуулан сурталчлах юм байна.