УОК өнөөдөр 18:00 цагаас хуралдлаа. Тус хуралдаанаас гарсан шийдвэрийг танилцуулан албаныхан мэдээлэл хийж байна.
УОК-ын дарга, Шадар сайд С.Амарсайхан “Дөрөвдүгээр сарын 5-ны өдрийг хүртэл улбар шар түвшиндээ буюу халдвар хамгааллын дэглэмээ ягштал баримталж, хамтран ажиллах шийдвэр гаргалаа. Засгийн газар, УОК-ын зүгээс аль болох аж ахуйн нэгж, иргэдийн үйл ажиллагааг хязгаарлахгүйгээр ажиллаж байна.
Хэдийгээр халдварын тоо нэмэгдэж байгаа ч явуулын эмчилгээний багийг гаргах ажлууд зохион байгуулагдаж эхэлсэн учраас хатуу хөл хориог зохион байгуулахгүй гэж үзлээ” гэлээ.
Маргааш Засгийн газрын хуралдаанд энэ шийдвэрээ танилцуулна гэлээ.
УОК-ын дарга, Шадар сайд С.Амарсайхан сэтгүүлчдийн асуултад хариулж байна.
-Улаанбаатар хот бүхэлдээ эрсдэлтэй байна гэж ЭМЯ мэдээлсэн. Хэдэн хороо эрсдэлтэй байгаа вэ? Гэрээр эмчлэх тооцоо судалгаагаа хэр хийсэн бэ? Орны хүрэлцээ хэр байна?
-Өнөөдрийн байдлаар мянга гаруй ор нөөцөнд байна. Хэсэгчилсэн хөл хорионы ажил цаашдаа ч үргэлжилнэ. Гэрээр эмчлэх тухайд шинж тэмдэггүй, хөнгөн, өөрийнх нь нөхцөл байдлыг харгалзан гэрээр эмчилнэ. Хэрвээ тухайн хүн гэртээ баймааргүй байна гэвэл тусгаарлалтын байранд байрлуулна. Цаашдаа эрсдэл өндөртэй зорилтот бүлэг рүүгээ анхаарч ажиллана.