Өнөөдөр дэлхийн хүнсний өдөр

НҮБ – ын Хүнс, хөдөө аж ахуйн байгууллагын Монгол дахь суурин төлөөлөгчийн газар энэ жил “Дэлхийн хүнсний өдөр”-ийг “БИДНИЙ ҮЙЛДЭЛ БИДНИЙ ИРЭЭДҮЙ: Өлсгөлөнгүй дэлхий-2030” гэсэн уриан дор тэмдэглэн өнгөрүүлэх юм байна.

Энэ хүрээнд Сүхбаатарын талбай дээр Хүнсний амталгаат үзэсгэлэн худалдаа зохион байгуулах бөгөөд үзэсгэлэнд өргөн хэрэглээнд нэвтрүүлэх шинэ нэр төрлийн хүнсний бүтээгдэхүүнүүдээ олон нийтэд таниулах, шим тэжээлийн дутал болох далд өлсгөлөнг бууруулах зорилгод хувь нэмрээ оруулан ажиллаж буй төрийн, төрийн бус байгууллагууд, хүнсний үйлдвэр, аж ахуйн нэгж газрууд зэрэг нийт 30 байгууллага оролцохоор болжээ.

Өнөөдөр та Сүхбаатарын талбай дээр хүрэлцэн ирснээр дараах арга хэмжээнүүдэд оролцох боломжтой.

Үүнд:

2017 оны статистик үзүүлэлтийг харахад дэлхийд өлсгөлөн амьдарч буй хүмүүсийн тоо сүүлийн 3 жилийн хугацаанд нэмэгдсээр байгаа бөгөөд 820 сая орчим хүн өдөр тутам идэх хоол олох гэж зүдэрч байгаа нь харамсалтай.

2030 он гэхэд дэлхий нийтэд ӨЛСГӨЛӨНГ ЗОГСООХ нь НҮБ-ын Тогтвортой хөгжлийн 17 зорилгын хоёр дахь зорилт юм. Хамгийн гол нь үүнийг хэрэгжүүлэхэд улс орнуудын Засгийн газраас барьж буй бодлого тун чухал. Тэрчлэн хүн бүрийн оролцоо, санаачилга дэмжлэг маш их хэрэгтэйг зохион байгуулагчид онцолж байна.

Ингээд дэлхий дахинд болон Монгол Улсын хувьд хүнсний хангамж, өлсгөлөн, ядуурал, түүнээс үүдсэн эрүүл мэндийн асуудалтай холбогдолтой тоо баримтуудаас хүргэе.

ДЭЛХИЙ ДАХИНД

1. Хэдийгээр дэлхийн бүх хүн амд хүрэлцэхүйц хэмжээний хүнс үйлдвэрлэж байгаа боловч 815 сая хүн өлсгөлөнд нэрвэгдсээр байна. Тэдний 60% нь эмэгтэйчүүд.
2. Дэлхий дээрх нэн ядуу хүмүүсийн 80% нь орон нутагт амьдарч, амьжиргаагаа хөдөө аж ахуйн салбараас залгуулдаг.
3. Бага насны хүүхдийн 45% нь шим тэжээлийн дутагдалд ороод байна.
4. 5-с доош насны 155 сая хүүхэд өсөлт хоцрогдолтой байгаатай зэрэгцээд хүүхдүүдийн дунд жингийн илүүдэл нэмэгдсээр байна.
5. 1.9 тэрбум хүн илүүдэл жинтэйгээс 600 сая нь хэт таргалалттай байна. Насанд хүрэгчдийн дунд таргалалтын асуудал хурдацтай нэмэгдсээр байна.
6. Жил бүр 3.4 сая хүн хэт таргалалтаас үүссэн шалтгаанаар нас барж байна. Олон оронд таргалалтын асуудлаас болж нас барж байгаа хүний тоо гэмт хэрэгт өртөн нас барж байгаа хүний тооноос их байна.
7. Жилд 3.5 тэрбум ам.долларыг шим тэжээлийн асуудалд зарцуулж байна.
8. 2050 он гэхэд хүн амыг хоол хүнсээр хангахын тулд хөдөө аж ахуйн үйлдвэрлэлийг 60%-иар нэмэгдүүлэх шаардлагатай.
9. Өлсгөлөнд нэрвэгдээд байгаа 815 сая хүний 489 сая хүн, нийт 5-с доош насны өсөлт хоцрогдолтой хүүхдүүдийн 75% нь зөрчил тэмцэлтэй улс орнуудад амьдарч байна.
10. Ган гачиг хөдөө аж ахуйн эдийн засгийн бууралтад 83% хүртэл нөлөөлж байна.
11. Хүнсний үйлдвэрлэлийн гуравны нэг нь хаягдал болж байна. Энэ нь ойролцоогоор жилд 2.6 их наяд ам.долларын өртөгтэй.

МОНГОЛ УЛСАД

1. Монгол Улсын ядуурлын түвшин 2016 онд 29.6 хувьтай байна.
2. 2016-2017 онд хийсэн Монгол Улсын “Хүн амын хоол тэжээлийн байдал” үндэсний V судалгааны дүнгээс: 5 хүртэлх насны хүүхдийн 26.6%, эхчүүдийн 16.1%, жирэмсэн эмэгтэйчүүдийн 21.4% цус багадалттай, 6-59 сартай хүүхдийн 27.7%, жирэмсэн эмэгтэйчүүдийн 29.6% төмөр дуталтай, Д аминдэм дутлын тархалт хүүхэд, насанд хүрэгчдийн дунд маш түгээмэл, 6-59 сартай хүүхдийн 61% дуталтай, 28.9% нөөц дутмаг, жирэмсэн эмэгтэйчүүдийн 75.4% дуталтай, 20.2% нөөц дутмаг, 15-49 насны эрэгтэйчүүдийн 40.4% Д аминдэм дуталтай, 41.9% нөөц дутмаг, 5 хүртэлх насны хүүхдийн 9.5% А аминдэм дуталтай, 60.1% А аминдэмийн нөөц хангалтгүй, дуталд өртөхөд ойрхон,
3. Нийт өрхийн 78.9% зохистой түвшинд иоджуулсан давс хэрэглэж байгаа бөгөөд, Баруун болон Хангайн бүсийн хүн ам, жирэмсэн эмэгтэйчүүд иодын дуталд өртөх эрсдэлтэй,
4. Нийт хүн амын хоногт хэрэглэдэг хүнсний бүтээгдэхүүний нэр төрөл цөөн, аминдэм, эрдсийн дутлын тархалт өндөр,
5. 5 хүртэлх насны хүүхэдтэй өрхийн 64.9 хувь хүнсний баталгаат байдал нь ямар нэг хэмжээгээр алдагдсан,
6. Илүүдэл жин ба таргалалтын асуудал нийгмийн эрүүл мэндэд ноцтой сөрөг үр дагавар учруулах түвшинд хүрсэн байна.