Өнөөдрийн УИХ-ын чуулганы хуралдааныг нээж Үндэсний эрх чөлөө, тусгаар тогтнолоо сэргээсний баярын өдрийг маргааш орон даяар тэмдэглэхтэй холбогдуулж, Ерөнхийлөгч Х.Баттулга үг хэлсэн юм. Үүний дараа УИХ-ын дарга М.Энхболд хэлэлцэх асуудлын жагсаалтыг танилцуулав. Хэлэлцэж асуудалтай холбогдуулж, УИХ-ын гишүүн Л.Оюун-Эрдэнэ, “УИХ, Засгийн газар, Ерөнхийлөгч нэгдээд томоохон асуудлууд дээр шийдэл гаргамаар байна. Тухайлбал, он гараад хаалттай горимоор Засгийн газрын мэдээллийг чуулганаар бүтэн өдөр сонсох хэрэгтэй. Олон улсын зээл тусламж хэрхэн зарцуулагдаж байгаа ч хянах нь зүйтэй. Нэг хуралдаан дээр 20 асуудал хэлэлцэхээр оролцогчид нь санал хэлсэн болоод тардаг. Тиймээс зөвхөн нэг асуудал хэлэлцэж, оновчтой гарц гармаар байна” гэв.
УИХ-ын гишүүн С.Бямбацогт Төв банкны болон Банкны тухай хуулийг эгүүлэн татах хэрэгтэй гэсэн байр суурьтай байсны зэрэгцээ оны эхний чуулганы хуралдаанаар утааны асуудлыг авч хэлэлцэх саналтай байгаагаа хэллээ. Харин УИХ-ын гишүүн Х.Нямбаатар утаа зөвхөн нийслэлийнхний тулгамдсан асуудал биш болсон шүү хэмээн сануулав.