Өнөө орой Уругвай – Францын тоглолттой

2018 оны ДАШТ хамгийн сонирхолтой үе дээрээ ирээд байна. Өнөөдөр шөвгийн наймын тоглолтууд эхлэх ба хоёр тоглолт биднийг хүлээж байгаа. Эхлээд Уругвай болон Францын шигшээ багуудын онц сонирхолтой тоглолтыг үзнэ. Уругвайн шигшээ баг одоогоор 4 дараалан хожиж хаалгандаа ганц л гоол алдаад байгаа гэсэн сүрдэм үзүүлэлттэй байна. Тэд өмнөх шатанд Европын аварга Португалын шигшээ багийг Эди Каванигийн хоёр гоолоор мулталсан юм. Харин Европын дэд аварга “Гурван Өнгөтөн”-үүд шөвгийн 16-д Аргентины багтай хүндхэн тулааныг хийж хожил авсан ба энэ шатанд тэдний хөршүүдтэй нүүр тулна.
“Ла Селесте”-ээс гол довтлогч Эдисон Кавани гэмтэлийн улмаас оролцох эсэх нь эргэлзээтэй байгаа бөгөөд түүний оронд Кристиан Стуани гараанд гарч Луис Суарезтай хамтрах магадлалтай гэнэ. Харин Францаас Блайз Матиуди торгуулийн улмаас тоглохгүй ба түүний орыг Корентин Толиссо залгах бололтой.

• Францын шигшээ баг Уругвайтай хийсэн өмнөх найман тоглолтодоо ердөө ганц л хожиж байсан (4 тэнцээ, 3 хожигдол). Тэд хамгийн сүүлд 2013 оны зургадугаар сард тоглоход Уругвайчууд Луис Суарезын ганц гоолоор хожиж байжээ.
• Уругвай ДАШТ-нд Францад хожигдож үзээгүй. (1 хожил, 2 тэнцээ) 1966 онд 2:1, 2002 он болон 2010 онуудад 0:0.
• Энэ бол Дидье Дешамын Францын шигшээг удирдах 81 дэх тоглолт. Тэрээр анхны тоглолтоо 2012 оны наймдугаар сард Уругвайн эсрэг нөхөрсөг тоглолтоор эхлүүлсэн ба 0:0-р тэнцэж байв.
• “Гурван Өнгөтөн”-үүд ДАШТ-нд Өмнөд Америкийн багуудын эсрэг хийсэн сүүлийн 9 тоглолтодоо хожигдоогүй (5 хожил, 4 тэнцээ). Ингэхэдээ тэд 7 тоглолтод нь хаалгаа хуурай манажээ.
• Францууд ДАШТ-ний шөвгийн наймд таарсан сүүлийн 5 учрааныхаа 4-г нь хожиж байжээ. Зөвхөн 2014 онд Германд л дийлдэж байж.
• Энэ бол Уругвайн шигшээ багийн 2010 оноос хойших анхны шөвгийн наймын тоглолт. Тэд тухайн жил Ганын багийг үндсэн цагт тэнцээд торгуулийн цохилтоор хожиж байв.
• Францын шигшээ баг ДАШТ-ний хасагдах шатны (Финалыг оролцуулаад) сүүлийн 7 тоглолтынхоо зургаад нь хожоод байгаа ба бүгд 90 минутад шийдэгдсэн байна.
• 1958 онд Пелегийн оруулсан 6 гоолоос хойш өсвөр насандаа ДАШТ-нд хамгийн их гоол оруулсан тоглогч бол Клиан Мбаппе юм. Тэрээр одоогоор 3 гоолтой явж байна.
• Мбаппе энэ жилийн тэмцээнд хаалганд нийт 5 удаа цохиж бүгд “бай”-гаа оносон ба гурав нь гоол болжээ.
• Францын довтлогч Антуан Грийзманн томоохон тэмцээнүүдэд (ДАШТ, ЕАШТ) хийсэн хасагдах шатны сүүлийн 5 тоглолтодоо 6 гоол оруулсан.
• 2018 оны ДАШТ-нд оруулсан Уругвайн сүүлийн гурван гоолыг довтлогч Эдисон Кавани оруулсан.