Казахстаны Алматы хотод энэ сарын 29-нд эхлэх Дэлхийн оюутны өвлийн спортын “Универсиад” наадамд оролцох Монголын баг тамирчдыг үдэн гаргах ёслол өнөөдөр Спортын төв ордны хурлын танхимд боллоо. Тус ёслолд БСШУС-ын дэд сайд Ё.Отгонбаяр, БТСГ-ын дарга Ц.Шаравжамц, Казахстан улсаас Монгол Улсад суугаа бүрэн эрхт Элчин сайд К.Кобландинас болон Монголын цанын холбооны ерөнхийлөгч Д.Хишигжаргал, тэшүүрийн холбооны ерөнхийлөгч Д.Болормаа нар оролцов. Энэ үеэр тус наадамд цанын төрөлд оролцох Ч.Отгонцэцэг, тэшүүрийн тамирчин Б.Тулга нар тамирчны тангаргаа өргөсөн юм.
БСШУС-ын дэд сайд Ё.Отгонбаяр цанын тамирчин Ч.Отгонцэцэгт Монгол Улсын төрийн далбаа гардууллаа. Ч.Отгонцэцэг хоёр жилийн өмнө “Сочи-2014” өвлийн олимпийн наадамд эх орноо төлөөлөн оролцсон туршлагатай тамирчны нэг бөгөөд олон улсын тэмцээнд түрүүлж байсан юм.
