Авлигатай тэмцэх газарт 2021 онд 335 авлигын хэрэг бүртгэгдсэн талаар Үндэсний Статистикийн Хорооноос мэдээлээ. Авлигатай тэмцэх газрын Мөрдөн шалгах хэлтэст 2021 онд 335 авлигын хэрэг бүртгэгдсэн нь өмнөх оноос 21-ээр өссөн үзүүлэлт юм. Ийн өсөх болсон нь эрх мэдэл, албан тушаалын байдлаа урвуулан ашиглах гэмт хэрэг 18-аар, хахууль авах гэмт хэрэг долоогоор, хахууль өгөх гэмт хэрэг таваар, хуулийн этгээдийн эрх мэдлийг урвуулан ашиглах гэмт хэрэг гурваар, үндэслэлгүй хөрөнгөжих гэмт хэрэг гурваар тус тус өссөн нь голлон нөлөөлсөн байна.
Бүртгэгдсэн 335 авлигын хавтаст хэргийг Монгол Улсын Эрүүгийн хуулийн 22 дугаар бүлгийн зүйлээр ангилахад 237 нь эрх мэдэл, албан тушаалын байдлаа урвуулан ашиглах, 74 нь хахууль авах гэмт хэрэг, 45 нь хахууль өгөх гэмт хэрэг, 10 нь үндэслэлгүйгээр хөрөнгөжих гэмт хэрэг, зургаа нь хуулийн этгээдийн эрх мэдлийг урвуулан ашиглах гэмт хэрэг, гурав нь төсвийн хөрөнгийг зориулалтын бусаар зарцуулах гэмт хэрэг хэмээн дэлгэрүүлэн мэдээллээ.