Сагсан бөмбөгийн “Үндэсний цом-2015” тэмцээн өнөөдөр нээлтээ хийх гэж байна. Тэмцээн 21 аймгийг хамрах бөгөөд аймаг бүрийн шигшээ багууд цомын төлөө өрсөлдөх юм. Тэмцээн Спортын тев ордонд тав хоногийн турш үргэлжилнэ.
Өнөөдөр Архангай-Өвөрхангай, Сэлэнгэ-Төв, Дорноговь-Хөвсгөл, Баянхонгор-Өмнөговь, Ховд-Увс багууд хоорондоо тоглох хуваарьтай байна. Тэмцээний нээлтийн ажиллагаа 12.00 цагаас болно.
Тэмцээний гол онцлог гэвэл тухайн аймгийн харьяат, олны танил алдартнууд багийнхаа бүрэлдэхүүнд багтсан байгаа гэнэ. Мөн тухайн нутгийн “Үндэсний супер лиг”-т тоглодог дөрвөн тоглогч, нутгийнхаа залуустайгаа нэгдэн, нэг багт болж өрсөлдөх юм.
21 аймгийн аварга шалгаруулах А зэрэглэлийн тэмцээнд оролцох Увс аймгийн багийг Монгол Улсын аварга С.Мөнхбат удирдаж байна. С.Мөнхбат аварга шаггүй холбон тоглогч гэдгээ “Бөхчүүдийн аварга шалгаруулах тэмцээн”-д олонтаа нотолсон сагсан бөмбөгч. Түүнчлэн Архангай аймгийн багт “ТВ Коктейл” хамтлагийн жүжигчин Э.Цолмонбаатар, Өвөрхангай аймгийн багт улсын арслан Д.Ганхуяг, Төв аймгийн багт Олимпийн аварга, Хөдөлмөрийн баатар, Гавьяат тамирчин Э.Бадар-Ууган, Дорнод аймгийн багт Гавьяат тамирчин Б.Наранбаатар нар өрсөлдөх гэнэ.
Сагсан бөмбөгчдийн өлгий Дархан-Уул аймгийн багийг саяхан төрөлх нутагтаа “Бага олимп” зохион байгуулсан Хөдөлмөрийн баатар, Дэлхийн аварга Х.Цагаанбаатар ахалж, ОУХМ Д.Гүржав дасгалжуулж, ОУХМ Г.Ихбаяр ахлахаар болжээ.
21 аймгийн аварга шалгаруулах А зэрэглэлийн тэмцээнд оролцох Хөвсгөл аймгийнхан багаа “Тэргүүн тоглогчид”-ын баг хэмээн нэрлэж байна. Тэдний бүрэлдэхүүнд ОУХМ Ж.Майбаяр, Д.Бат-Эрдэнэ /Дандий/, Б.Пүрэвдорж, Г.Наранбаатар, Т.Санчир нар багтаж байна.
Сагсан бөмбөгчдийн өлгий Дархан-Уул аймгийн багийг саяхан төрөлх нутагтаа “Бага олимп” зохион байгуулсан Хөдөлмөрийн баатар, Дэлхийн аварга Х.Цагаанбаатар ахалж, ОУХМ Д.Гүржав дасгалжуулж, ОУХМ Г.Ихбаяр ахлахаар болжээ.
Баруун хязгаар Ховд аймгийн багт 2013-2014 оны улирлын “Үнэ цэнэтэй тоглогч”, ОУХМ Б.Билгүүн, Ц.Азбаяр, Ц.Пүрэвдорж нарын тоглогчид байгаа бол сагсан бөмбөгийн анхны гавьяат дасгалжуулагч Ц.Цэвэрбал Ховд аймгийн багаа дасгалжуулахаар болжээ. Дорноговь аймгийн багийг Үндэсний шигшээ багийн төвийн тоглогч ОУХМ С.Өрнүүнбилэг удирдаж, залуу тоглогчдоор багаа бүрдүүлсэн байна. Дорноговь аймагт дасгалжуулагч Ж.Отгондарь, Б.Баярбат, Батмөнх, Батжавхлан нарын ид үедээ тоглож байгаа олон шилдэг сагсан бөмбөгчид бий.
Өмнөговь аймгаас төрөн гарсан ОУХМ, сагсан бөмбөгч Б.Мөнхболд энэ тэмцээнд багаа ахлах бол Завхан аймгийн баг Үндэсний аварга, “Альянс Тех Харцага” багийн дасгалжуулагч А.Алтан-Очир, Залуучуудын шигшээ багийн тоглогч А.Гансүх, Г.Цэнгүүнбаяр зэрэг тоглогчдоос бүрдсэн жигдхэн хүчтэй баг байх нь ээ.
Орхон аймгийн багийг “Танан гарьд” багийн төвийн тоглогч Д.Дорждагва удирдаж байна. Харин 21 аймгийн аварга шалгаруулах Б зэрэглэлийн тэмцээнд дэд аварга болсон Сүхбаатар аймгийн багт Залуучуудын шигшээ багийн тоглогч Б.Батзолбоо, “Ирвэсүүд” багийн Эрдэнэдалай, Дөлгөөн Сүхбат зэрэг “Супер лиг”-ийн тоглогчид хүч нэмжээ. “Үндэсний цом”-ын Б зэрэглэлийн тэмцээний аварга, “Спрайт хөгжлийн лиг”-ийн аварга Хэнтий аймгийн багт өнгөрсөн наадмын түрүү бөх, улсын арслан Э.Оюунболд хүч нэмэх сураг байна.
