Жил бүрийн 11 дүгээр сард Олон улсын чанарын өдөр тохиодог бөгөөд энэ өдрийг НҮБ-ын дэмжлэгээр Европын чанарын байгууллага, Японы Инженер эрдэмтдийн холбоо, Америкийн Чанарын хяналтын нийгэмлэг, Латин Америкийн орнуудын чанарын байгууллага хамтран санаачилж 1989 оноос эхлэн дэлхий нийтээр тэмдэглэдэг уламжлалтай болсон байна.
Энэ жилийн “Үндэсний чанарын чуулган-2022” арга хэмжээг Монгол Улсын Шадар сайдын ивээл дор зохион байгуулах бөгөөд Засгийн газраас баримталж буй Шинэ сэргэлтийн бодлогын хүрээнд “Чанар-стандартын хэрэгжилт” уриатайгаар зохион байгуулахаар төлөвлөж байгаа юм байна. Арга хэмжээг танхимаар болон зайнаас хосолсон хэлбэрээр зохион байгуулах ба уг арга хэмжээнд үйлдвэрлэгч, экспортлогч, ханган нийлүүлэгч, худалдаа үйлчилгээний салбарын аж ахуйн нэгж, төрийн болон төрийн бус байгууллагуудын 500 гаруй төлөөлөл оролцох аж.
Дээрх арга хэмжээг Стандарт, хэмжил зүйн газар болон Монголын үндэсний худалдаа аж үйлдвэрийн танхим хамтран зохион байгуулахаас гадна “Үндэсний чанарын шагнал”-ыг гардуулна. “Үндэсний чанарын шагнал олгох журам” батлагдсанаар уг шагнал нь албан ёсоор Монгол Улсын Засгийн газрын шагнал болсноороо онцлог аж