БНХАУ-ын ӨМӨЗО-ы Хөх хотын “Талын дуу хоолой” радиогийн таван жилийн ой энэ өдрүүдэд тохиож байна.
БНХАУ-ын ӨМӨЗО-ы “Хятадыг танин мэдэх” соёл, аялал жуулчлалын өдрүүдийн хүрээнд өнөөдөр уг радиогийн ойг тэмдэглэн өнгөрүүллээ. “Талын дуу хоолой” радио Монгол Улсын “Шинэ долгион-FM 107.5” радиотой хамтран монголчуудад нэвтрүүлгээ хүргэдэг. Тухайлбал, ардын болон уртын дууны “Тэнгэрлэг эгшиг”, утга зохиолын мэдээллийн “Солонго”, эрүүл мэндийн “Эрүүл биед саруул ухаан оршино” зэрэг нэвтрүүлгийг дурьдаж болох юм. Цаашдаа Монгол түмэнд хүргэж буй мэдээ, мэдээллийнхээ чанар, хүртээмжийг нэмэгдүүлж, хоёр орны худалдаа, эдийн засаг, нийгэм соёл гээд бүхий л салбарын харилцааны гүүр болох зорилго тавин ажиллаж байгааг тус радиогийн хамт олон онцолж байв.