Зарим суманд хаваржилт хүндэрсэнтэй холбогдуулан Улсын онцгой комисс болон ХХААХҮЯ-ны хамтарсан ажлын хэсэг энэ сарын 4-нөөс эхлэн Увс аймагт ажиллаад буцлаа. Тэд хаваржилт хүндрээд байгаа баруун талын сумдад ажиллаж, улсын нөөцөөс ирүүлсэн өвс тэжээлийг хуваарилан хүргүүлсэн юм.
Мөн аймгийн Мал эмнэлгийн газрын үйл ажиллагаатай танилцаж, хүний нөөц дутагдалтай байгаа, түргэн тусламжийн автомашин байхгүй зэрэг тулгамдсан асуудлыг сонслоо. Тэрчлэн бэлчээрийн усан хангамжийн хүрэлцээ муу, эвдэрсэн худгуудыг засварлах шаардлагатай байгаад анхаарч ажиллахаар болсон юм.
“Увс аймгийн мал эмнэлэгт хүний нөөц дутагдалтай байна. Гэхдээ одоохондоо батлагдсан бүтэц, орон тооны дагуу ажиллах ёстой. Харин худаг засварлах ажилд анхаарч ажиллана. Мөн түргэн тусламжийн автомашиныг олгоно” хэмээн ХХААХҮ-ийн дэд сайд Ж.Сауле хэллээ.
Аймгийн хэмжээнд одоогоор 44 мянга гаруй мал зүй бусаар хорогдоод байна.