Манай улсын хилээр энэ оны эхний улиралд 853.8 (давхардсан тоогоор) мянган зорчигч нэвтэрсэн нь өмнөх оны мөн үеийнхээс 703.1 (5.7 дахин) мянгаар өссөн байна.
Ийнхүү өсөхөд цар тахлын нөлөө суларч, дэлхийн улс орнууд хилийн боомтоо нээж, хөдөлгөөний хязгаарлалт суларсан нь нөлөөлжээ. Улсын хилээр орсон зорчигчдын тоо энэ оны эхний улиралд 424.8 мянга байв. Тэдний 29.4 хувь нь Чингис хаан, 17.8 хувь нь Замын-Үүд, 16.7 хувь нь Гашуунсухайт, 12.7 хувь нь Алтанбулаг, 5.6 хувь нь Шивээхүрэн, 17.8 хувь нь бусад боомтоор оржээ. Улсын хилээр орсон зорчигчдын 338.6 (79.7 хувь) мянга нь Монгол Улсын иргэн, 86.2 (20.3 хувь) мянга нь гадаад улсын иргэн аж.
Улсын хилээр 2023 оны эхний улирлын байдлаар гадаадын 86.2 мянган хүн орсон нь өмнөх оны мөн үеийнхээс 71.7 мянгаар буюу 5.9 дахин нэмэгдсэн байна. Тэдний 87 хувь нь 30 хүртэл хоног, 2.9 хувь нь 30-90 хоног, 10.1 хувь нь 90, түүнээс дээш хоногийн хугацаагаар ирснийг Үндэсний статистикийн хорооны нийгэм, эдийн засгийн мэдээнд тэмдэглэжээ.
Энэ оны эхний улиралд улсын хилээр орсон гадаадын зорчигчдын 80 (92.8 хувь) мянга нь насанд хүрсэн хүн, 6.2 (7.2 хувь) нь хүүхэд байв. Нийт зорчигчдын 49 (56.8 хувь) мянга нь эрэгтэйчүүд, 37.2 (43.2 хувь) мянга нь эмэгтэйчүүд байлаа. Улсын хилээр орсон гадаадын зорчигчдын 61.4 хувь нь Европ, 34.5 хувь нь Зүүн Ази, Номхон далайн бүс нутаг, 2.1 хувь нь АНУ, 2 хувь нь Ойрх Дорнод, Өмнөд Ази, Африк тивээс иржээ. Хилээр орсон гадаадын зорчигчдын 56.7 хувийг ОХУ-ын, 17.5 хувийг БНХАУ-ын иргэд, 8.9 хувийг БНСУ-ын иргэд, 2.5 хувийг Казахстан Улсын иргэд, 1.7 хувийг Беларусь улсын иргэд, 1.6 хувийг Канадын иргэд 11.1 хувийг бусад улсын иргэд эзэлж байв.
Хилээр нэвтэрсэн жуулчдын тоо энэ оны эхний улиралд 78.1 мянга болсон нь өмнөх оны мөн үеийнхтэй харьцуулахад 65.8 (6.4 дахин) мянгаар өссөн байна. Энэ оны эхний улирлын байдлаар хилээр орсон жуулчдын тоог өмнөх оны мөн үеийнхтэй зорчсон улсаар нь харьцуулбал ОХУ-ын жуулчид 42.2 (10.2 дахин), БНХАУ-ын жуулчид 10.2 (7.6 дахин), БНСУ-ын жуулчид 5.7 (5дахин) мянга, АНУ-ын жуулчид 540 (1.9 дахин)-өөр нэмэгджээ.
Манай улсын 349.5 (давхардсан тоогоор) мянган иргэн энэ оны эхний улиралд гадаадыг зорьсноос 217.8 (62.3 хувь) мянга нь аялал жуулчлалын зорилгоор зорчсон нь өмнөх оны мөн үеийнхээс 178.3 (5.5 дахин) мянгаар өссөн бол 131.6 (37.7 хувь) мянга нь ажиллах, суралцах, байнга оршин суух зорилгоор зорчсон нь өмнөх оны мөн үеийнхээс 107.8 (5.5 дахин) мянгаар нэмэгдсэн байна.
Гадаадад зорчсон Монгол Улсын иргэдийн 330.2 (94.5 хувь) мянга нь насанд хүрсэн зорчигч, 19.2 (5.5 хувь) мянга нь хүүхэд, 247 (70.7 хувь) мянга нь эрэгтэй, 102.5 (29.3 хувь) мянга нь эмэгтэйчүүд байна. Тэдний 331.4 (94.8 хувь) мянга нь 30 хүртэл хоног, 4.8 (1.4 хувь) нь 30-90 хүртэл хоног, 13.2 (3.8 хувь) мянга нь 90, түүнээс дээш хоногийн хугацаагаар зорчжээ. Улсын хилээр энэ оны эхний улиралд 609.3 (давхардсан тоогоор) мянган тээврийн хэрэгслийг нэвтрүүлсэн нь өмнөх оны мөн үеэс 355.6 (2.4 дахин) мянгаар өсжээ. Тэдгээрийн 48.7 хувийг ачааны, 8.1 хувийг суудлын машин, 40.9 хувийг ачааны вагон, 2.3 хувийг бусад тээврийн хэрэгсэл эзэлж байна. Нийт тээврийн хэрэгслийн 38.2 хувь нь Замын-Yүд, 23.3 хувь нь Гашуунсухайт, 7.9 хувь нь Шивээхүрэн, 6.7 хувь нь Алтанбулаг, 23.9 хувь нь бусад боомтоор нэвтэрсэн аж.