Элсэлтийн Ерөнхий шалгалтын хариу оноо өчигдөр гарсан, харин өнөөдрөөс их, дээд сургуулийн элсэлт эхэлж байна. Шалгалтын оноо гарснаар элсэгчид онлайнаар элсэх сургуульдаа бүртгүүлэх боломж бүрдэж байгаа юм байна.
Тодруулбал МУИС-ийн бүртгэлийн хугацаа зургадугаар сарын 20-ноос долдугаар сарын 3-ныг хүртэл үргэлжлэх юм байна. Тус сургуулийн бүртгэлийн хураамж 9000 төгрөг бөгөөд орон нутаг дахь салбарынх 1000 төгрөг аж. МУИС-д элсэхийг хүсэгчид http://www.burtgel.num.edu.mn хаягаар бүртгүүлэх юм.
Харин МУБИС-ийн хувьд бүртгэх хугацаа өнөөдрөөс эхлэн долдугаар сарын 4-нийг хүртэл үргэлжлэх бөгөөд бүртгэлийн хураамж 15000 төгрөг юм. Тус сургуульд элсэх сурагчид онлайнаар буюу http://burtgel.surgalt.mn/ хаягаар болон төв сургууль дээр биечлэн очиж бүртгүүлэх боломжтой.
Түүнчлэн нийслэлээс ШУТИС-ийн бакалаврын хөтөлбөрт элсэхийг хүсэгчид өнөөдрийн 10.00 цагаас эхлэн http://www.elselt.edu.mn/ вэб хаягаар орж бүртгүүлж байна.
Тэгвэл Анагаахын шинжлэх ухааны үндэсний их сургуулийн бүртгэл долдугаар сарын 3-5-ны өдрийн 13.00 цаг хүртэл үргэлжилнэ хэмээн хэллээ. Тус сургуулийн бүртгэлийн хураамж 8000 төгрөг бөгөөд http://www.burtgel.mnums.edu.mn/ хаягаар бүртгүүлэх аж. Харин аймаг орон нутгаас элсэхийг хүсэгчдийн бүртгэл болон хуваарь сонголтыг Монголын Их Дээд Сургуулиудын Консорциум зохион байгуулах ажээ.