Дундговь аймгийн Улсын бүртгэлийн хэлтэс 3 дугаар сарын 6-нд албан хаагчдынхаа сургалт, семинарыг зохион байгууллаа. Тус үйл ажиллагаанд аймгийн ЗДТГ-ын дарга Ц.Эрдэнэсүрэн оролцож, хэлсэн үгэндээ ‘’Иргэн төвтэй-төрийн үйлчилгээний жил’’-дээ бүртгэлийн үйлчилгээг иргэдэд хүргэх ажлаа илүү сайжруулж, идэвх санаачилгатай ажиллаж, 2018 онд ажлаараа аймагтаа тэргүүлсэн амжилтаа бататган бусад төрийн байгууллагуудыг манлайлж ажиллахыг хүсчээ.
Сургалтад Улсын бүртгэлийн хэлтсийн албан хаагчид, сумдын улсын бүртгэгчид оролцож, 2018 оны ажлаа дүгнэн ярилцаж, 2019 оны зорилго, зорилт, цаашид анхаарах асуудал, хэрэгжүүлэх үйл ажиллагаагаа тодорхойлсон байна.
Энэ үеэр улсын бүртгэлийн багц хуулийн шинэчлэлтэй холбогдуулан иргэний бүртгэл, эд хөрөнгийн бүртгэл, хуулийн этгээдийн бүртгэлийн үйл ажиллагаанд гарч байгаа өөрчлөлт, зөрчил дутагдал, шийдвэрлэхэд хүндрэлтэй асуудлуудаа ярилцаж, харилцан мэдээлэл солилцжээ.
Мөн ‘’Хүний эрхэд суурилсан хандлага’’ сэдвээр Хүний эрхийн үндэсний комиссын Дундговь аймаг дахь реферэнт Т Баярцэцэг, ‘’Бодлогын баримт бичгийн хэрэгжилт, захиргааны байгууллагын үйл ажиллагаанд хяналт шалгалт хийх нийтлэг журам’’ сэдвээр АЗТГ-ын хяналт шинжилгээ дотоод аудитын хэлтсийн мэргэжилтэн Д Даариймаа, ‘’Харилцаа ба холбоо тогтоох арга зүй’’ сэдвээр сургагч багш Ж. Нарангарав нар мэдээлэл хийж, зөвлөгөө өгчээ.