Улсын Их Хурлын гишүүн Г.Тэмүүлэн, Ж.Бат-Эрдэнэ, Л.Мөнхбаатар нар “Төрийн албаны тухай хуульд нэмэлт, өөрчлөлт оруулах тухай” хуулийнтөслийг Улсын Их Хурлын дарга Г.Занданшатарт өргөн барилаа.
Төрийн албан хаагчдыг төрийн захиргааны, үйлчилгээний, улс төрийн албан хаагч гэж ангилдаг. Тэдгээрээс улс төрийн алба хаагчийн томилгоо нь ямар нэгэн шалгуургүй, хувийн болон улс төрийн ашиг сонирхлын үүднээс хандаж шийдвэр гаргадаг, томилогдсон улс төрийн албан тушаалтан нь ёс зүй, мэргэжил, ур чадварын хувьд хангалтгүй байдаг жишиг байсаар байгаатай холбогдуулан улс төрийн албан тушаалтны томилгоонд нийтлэг болон тусгай шаардлага бий болгохоор энэ хуулийн төслийг боловсруулжээ.
Улс төрийн албанд ямар нэгэн хууль зүйн шаардлага тавихгүй байгаа учир хүнд суртал нэмэгдэж, төрийн үйлчилгээний чанар, хүртээмж, үр дүнд ноцтой доголдол гарах нөхцөл нэмэгдэж байна. Энэ байдал даамжирвал нийтийн эрх ашиг, хэрэгцээ, сонирхолд нийцүүлэн нийгмийг удирдан чиглүүлэх, аж ахуй, нийгэм, соёлын байгуулалтыг удирдах, хууль тогтоомжийг хэрэгжүүлэх төрийн чадавх сулрах, иргэдийн төрд итгэх итгэл буурах зэргээр манай улсын үндэсний аюулгүй байдалд сөргөөр нөлөөлнө.
Тиймээс улс төрийн албан тушаалтанд нийтлэг болон тусгай шаардлага тавьж, баталснаар төрийн гүйцэтгэх эрх мэдэл, орон нутгийн удирдлагын мэдлэг, ур чадвар, ёс зүйн хариуцлага нэмэгдэх, иргэдийн төрд итгэх итгэл нэмэгдэх, төрийн үйлчилгээ үр дүнтэй болох, шийдвэр гаргалт, хэрэгжилтийг удирдлагаар хангах, хэрэгжүүлэх чадавх бүрдэх, улмаар мэдлэг, ур чадвартай, мэргэшсэн, ёс зүйтэй төрийн алба төлөвших эерэг үр дүн гарна гэж хууль санаачлагчид үзжээ.