Тайпэйн Худалдаа, эдийн засгийн Улаанбаатар дахь төлөөлөгчийн газар нь Тайвань Монголын худалдаа, эдийн засгийн харилцааг өргөжүүлэхийн тулд Тайваниас 10 гаруй аж ахуйн нэгж, бизнес эрхлэгчдийг урин, 9 дүгээр сарын 7-ноос 10-ны өдрүүдэд зохиогдох “Улаанбаатар Түншлэл-2017” намрын Олон улсын үзэсгэлэн яармагт (2017 Mongolian International Autumn Trade Fair) оролцуулан, Тайванийн шилдэг бүтээгдэхүүнүүдийг танилцуулахаар зорьж байна. Энэ удаагийн үзэсгэлэн яармагийн үеэр Тайванийн гоо сайхны бүтээгдэхүүн, хүнсний нэмэлт бүтээгдэхүүн, эмнэлгийн тоног төхөөрөмж, барилгын материал, металл эдлэл, хутганы иж бүрдэл, малын нэмэлт тэжээл зэрэг бүтээгдэхүүн тавигдах бөгөөд эдгээр бүтээгдэхүүнийг сонирхож буй хувь хүн, аж ахуйн нэгж, албан байгууллагыг өргөнөөр ирж, үзэж сонирхохыг урьж байна.
Монголын аж ахуйн нэгж, бизнес эрхлэгчдийн санхүүжилтийг нэмэгдүүлэх, Тайваниас бүтээгдэхүүн импортлоход дэмжлэг үзүүлэх үүднээс тус төлөөлөгчийн газар нь Монгол Улсын Голомт банк, Худалдаа, хөгжлийн банк, Хаан банк, Төрийн банк, Хас банк зэрэг арилжааны банкуудын төлөөллийг урин, Тайванийн Экспорт, импортын банкны Тайванийн бүтээгдэхүүн импортлох санхүүжилтийн зээлийн хөнгөлөлттэй нөхцөл, журмыг танилцуулсан болно. Тайваниас худалдан авалт хийхийг дэмжсэн энэхүү санхүүжилтийн зээлийн нийт дүн нь худалдан авалтын нийт дүнтэй адил хэмжээтэй байх боломжтой бөгөөд зээлийн эргэн төлөлтийн хугацаа нь 5 жил хүртэл байх боломжтой юм. Мөн түүнчлэн Монголын аж ахуйн нэгж, бизнес эрхлэгчид Тайвань компаниас л захиалга хийсэн тохиолдолд өөр бусад улсаас бүтээгдэхүүн тээвэрлэн авч байгааг ч үл харгалзан энэхүү санхүүжилтийн зээлд хамрагдах боломжтой юм.
Өнгөрсөн 10 гаруй жилийн хугацаанд Тайвань нь өндөр технологийн үйлдвэрлэлийн салбарт чухал үүрэг, роль гүйцэтгэж байна. Засгийн газрын зүгээс уламжлалт үйлдвэрлэлийн салбарын бүтээлч байдал, өөрчлөлт шинэчлэлийг дэмжиж байгаа тул Тайванийн уламжлалт үйлдвэрлэлийн салбарын бүтээгдэхүүнүүд ч бас зарим улс орнуудын сайшаалыг нийцсэн хэвээр байна. Энэ удаагийн үзэсгэлэн яармагт оролцох аж ахуйн нэгж, бизнес эрхлэгчид нь Тайванийг төлөөлж чадахуйц, шагнал урамшуулал хүртэж байсан шилдэг бүтээгдэхүүнийг нийтэд толилуулах бөгөөд Монгол орны аж ахуйн нэгж, бизнес эрхлэгч нартай урт хугацааны, ойр нягт харилцаа холбоо тогтоохыг чухалчилж буй ажээ.