БНХАУ цар тахалтай холбогдуулан Бээжинг зорьсон олон улсын нислэгийг өөр хотод хүлээж авч байсан журмаа цуцалжээ. Тодруулбал, хил нээгдсэн нэгдүгээр сарын 8-ны 00 цагаас эхлэн Бээжин рүү чиглэсэн олон улсын зорчигч тээврийн нислэгийг Бээжинд газардуулахаар болсон байна. Энэ талаар БНХАУ-ын агаарын тээврийн “Эйр Чайна” компани мэдээлсэн бөгөөд тус компани 17 улсаас Бээжин рүү шууд үйлдэх олон улсын нислэгээ сэргээжээ. Цаашид Бээжин чиглэлийн олон улсын бусад нислэгийг ч дэс дарааллаар нь сэргээх аж.
Улаанбаатар Бээжин чиглэлийн нислэг энэ сарын 12-ны өдрөөс сэргэх бөгөөд Улаанбаатараас 16:45 цагт хөөрч Бээжинд 18:50-д газардах юм. Долоо хоног бүрийн даваа, мягмар, пүрэв гаригт нислэгтэй ажээ.