Украин улс шинэ Засгийн газраа байгууллаа. Тэд гүн хямралаа давахын тулд гадаадын өндөр боловсон хүчинд итгэл хүлээлгэж байна. Америк, Гүрж, Литви улсын иргэнд улсынхаа иргэншлийг олгож, гол, гол салбаруудаа удирдуулахаар боллоо. Ингэвэл улс нь хүнд байдлаас гарна гэдгийг харж зөв шийдвэр гаргажээ.
Манайх социализм байгуулж байхдаа ЗХУ-аас хоёр, гурван зуугаар нь мэргэжилтэн авдаг байлаа. Тэгвэл одоо капитализм байгуулж байгаа юм чинь Америкаас мэргэшсэн хүн авчирч сайд тавимаар байна. Өнөөдөр Их хурлын гишүүн болгон сайдын сэнтийд санаархан уйлалдан гүйлдэж байгаа. Та нарт л гэхэд сайд хийж, улсаа толгойлж чадахгүй. Өнгөрсөн хугацаанд хангалттай харууллаа. Үүний нэг тод жишээ бол сүүлийн 25 жил өөрсдөө ганц ч гэсэн эмнэлэг босгосонгүй. Япончууд барьж өгснийг нь эс тооцвол сургууль ч барьчихаагүй шүү дээ. Хүн ардынхаа эрүүл мэнд, боловсролд анхаарсан бүтээн байгуулалтаас өгсүүлээд энэ мэтчилэнгээр юу ч хийсэнгүй. Манай дарга нарт улс орноо аваад явах чадамж алга даа. Харин сайд болсон хүн, түүнийг дагагчид л баяжаад байдаг.
Тэгвэл хамгийн их шинэчлэл хийх шаардлагатайХууль зүйн яамыг америк мэргэжилтнээр удирдуулъя л даа. Мөн Уул уурхайн яамыг ч бас гадаадын өндөр боловсон хүчнээр толгойлуулмаар байна. Зарим газар, агентлагийн дарга нарыг ч гадны мэргэжилтнээр тавьчихъя. Энэ бүхнийг амьдралд хэрэгжүүлэх уян хатан хуулийн зохицуулалт хэрэгтэй байна.
Америкийн дэлхийд гайхуулсан боловсон хүчин бэлтгэдэг сургуулийг төгссөн чадварлаг хүмүүсийн дунд дөрвөн жил гүйцэтгэх сайдын тендер зарлаж болно шүү дээ. Өндөр цалин хөлс амлаад ч болтугай тэднийг авчиръя л даа. Юуны тулд өргөн уудам газар нутагтай билээ дээ, 20-30 га эдлэн газар эзэмшүүлсэн ч яадаг юм.
Гадаадын боловсон хүчнээр улсаа удирдуулж байгаа Украинаас жишээлж байгаагийн учир нь манай хоёр улс яг адилхан болохоор тэр. Украины улс төрийн бүлэглэлүүдийн хоорондох зөрчилдөөн дайн дажны хэмжээнд хүрч улсаа нурааж байгаа. Үүн шиг Монголын улс төрийн хүчнүүд хийгээд фракцын тэмцэл хэрээс хэтэрсэн. Тийм болохоор тэд эх орныхоо эрх ашгийг тэргүүнд тавьж, улсаа жолоодож чадахгүй байгаа юм. Тиймээс Украин шиг америк мэргэжилтнээр сайд тавья.
М.МӨНХЦЭЦЭГ