УИХ-ын чуулганы нэгдсэн хуралдаан болж байна. Хуралдаанаар Түр хороо байгуулах асуудлыг хэлэлцэхийг гишүүн Л.Болд нар горимын санал гаргалаа. Гэвч хурууны хээ уншигч төхөөрөмж гацсан тул цаг орчим санал хураалт гацлаа. УИХ-ын дарга Г.Занданшатар “УИХ-ын Тамгын газрынхан ямар төхөөрөмж авсан юм. Хурууны хээ уншигч төхөөрөмж гацаж, чуулганы үйл ажиллагаа нэг цаг тасалдаад байна. УИХ-ын Тамгын газрын даргын Ерөнхий нарийн бичгийн дарга н.Цолмон үүнээс болж огцорвол таарна” хэмээн бухимдав. УИХ-ын Тамгын газраас “Программ төхөөрөмжид ямар нэг асуудал байхгүй. Ирцэнд бүртгүүлсэн гишүүд саналаа өгөхдөө хуруугаа зөв өнцгөөр тавих ёстой. УИХ-ын Дэгийн хуулиар хурууны хээ уншигч төхөөрөмж гацсан тохиолдолд ил санал хураалтыг гар өргөж өгч болно гэж заасан байдаг” гэсэн тайлбар тайлбар хийлээ.
Ийнхүү гишүүд гар өргөн илээр саналаа өглөө. Гишүүдийн олонхийн саналаар Түр хороо байгуулах асуудлыг хэлэлцэхийг дэмжив.
Ингээд Боловсролын тухай хуульд өөрчлөлт оруулах төслийг хэлэлцэж эхэллээ. Хэлэлцэж байгаа асуудалтай холбогдуулан гишүүд асуулт тавьж хариулт авлаа.
УИХ-ын гишүүн О.Баасанхүү:
-“Үдийн цай” хөтөлбөр өөрөө асуудал дагуулж байгаа. Гэтэл “Үдийн хоол” хөтөлбөр гэж байна. Энэ хөтөлбөрт хэдэн төгрөг төсөвлөж байна вэ? Монголын нэртэй сургуулиудад хоолны хордлого их гарч байна. Сургуулийн гал тогоо, технологич байна уу? Эсвэл хэн нэг компанид өгөөд, гэрээсээ хоол зөөх юм уу. Зөөврийн хоол аюултай шүү. Хүнсний аюулгүй байдлыг яаж тооцсон байна.
УИХ-ын гишүүн М.Оюунчимэг:
-Ханган нийлүүлэлт, хадгалахтай холбоотой асуудал анхаарал татаж байгаа. Өнөөдөр хүүхдийн үдийн цайнд 600 төгрөг. Гэтэл энэ мөнгөний 400 орчим нь түрээсийн төлбөрт яваад, хүүхдэд 200 төгрөг ногдож байна. Шалгалтаар дотоод хяналт байхгүй, зориулалтын бус гал тогоотой байсан нь 50 хувьд гарчээ.
Сургуулийн зориулалтын гал тогоотой болоход 9.3 тэрбум төгрөг шаардлагатай гэсэн тооцоог 2017 онд гаргасан. Үүнийг 2020 оны улсын төсөвт багтаагаад явж болно.
УИХ-ын гишүүн Д.Сарангэрэл:
-Сүүлийн үед ерөнхий боловсролын сургуулиудад хоолны хордлого их гарч байна. Тухайн сургуулиудын хоолонд шалгалт өгч шалгах хэрэгтэй. Хамгийн сүүлд “Сингапур” гэх сургуульд нийтийг хамарсан маш том халдвар гарсан. Цусан суулга өвчний нян нийт ажилчид, сурагчдын 80 хувьд илэрсэн. Үүнийг шалгах ажлын хэсэгт би багтсан. Нийслэлийн мэргэжлийн хяналт ажиллахгүй байна. Асуудал гарахаар л гарч ирдэг. Мэргэжлийн чиглэлээр зөвлөмж үзүүлдэггүй. Олноороо хордож байгаа асуудал эрүүл мэндийн салбарт эрсдэл их учруулдаг. Санхүүгийн болоод бусад чиглэлээр. Эрүүл мэндийн салбарт учирч байгаа хохирлыг хэн барагдуулах вэ? Анх энэ хуулийн төслийг боловсруулж байсан үеэс байдал өөр болжээ. Тиймээс ажлын хэсэг асуудал байгаа учраас энэ хуулийн төслийг эргэж харж, өөрчлөх саналтай байна.
Ц.Нямдорж: 80-тай эмээ дээр гүйцэтгэх ажиллагаа явуулж болох уу?
УИХ-ын чуулганы нэгдсэн хуралдаан эхэллээ. Хуралдаанаар хэлэлцэх асуудлын дарааллыг УИХ-ын дарга танилцуулсны дараагаар гишүүд горимын санал гаргав. УИХ-ын гишүүн Л.Болд “ОУПХ-ноос С.Зоригийн амь насыг хөнөөсөн хэргий шийдвэрлэхдээ эрүүдсэн шүүсэн талаарх бичлэгийг УИХ-ын гишүүд, сэтгүүлчид үзсэн. Өнөөдөр С.Зоригийн амь насыг хөнөөсөн хэргийг асуудлаар судлах Түр хороо байгуулах тогтоолын төслийг байнгын хороо дэмжсэн. ОУПХ энэ асуудлаар манай улсад ирж, судлах юм. Монголын парламент энэ асуудлаар зөвлөл байгуулж, хариулт өгмөөр байна. Энэ асуудлыг шийдэж өгнө үү” гэлээ. ХЗДХ-ийн сайд Ц.Нямдорж:
-ОУПХ-ноос энэ асуудалд анхаарч, шүүх хурал биш байна, хэлмэгдүүлэлт болсон байж болзошгүй гэж хэлсэн. Энэ асуудлаар чихнээс хонх уяж байгаа. Ноцтой дүгнэлт хийсэн. ОУПХ энэ асуудалд анхаарч байхад Монголын парламент мэдсэн ч мэдээгүй юм шиг, сонссон ч сонсоогүй юм шиг явсаар гурван жил болж байна. Тийм учраас Түр хороо байгуулахыг шийдвэрлэж өгөхийг хүсч байгаа. Монголд гарч байгаагүй асуудлаар УИХ дүгнэлт хийхгүй бол болохгүй шүү. Би хувьдаа 2016 оны намар энэ хэргийн анхан шатны шүүх хурал болоогүй байхад МАН-ын бүлгийн хурал дээр “65 суудалтай эрх барьж байгаа нам энэ асуудалд анхаарахгүй бол болохгүй шүү” гэж хэлж байсан. Миний бодож, төсөөлж байснаас долоон дор юм болсон байна. Үүнийг хэлэлцэж, анхааралдаа авахгүй бол бид энд суугаад байх шаардлагагүй. Миний өнөөдрийг хүртэл ярьсан зүйл балмад зүйлийг өчүүхэн хэсэг шүү. Цаашаа яривал ноцтой зүйл ярина. 70, 80 гарсан эмээ нэр дээр яах гэж гүйцэтгэх ажиллагаа явуулсан юм бэ гээд асуудал гарна хэмээлээ.
Ингээд Л.Болд, Ц.Нямдорж нарын гаргасан саналаар санал хураалт явууллаа. Гэвч хурууны хээний төхөөрөмж гацсанаас санал хураалт явагдахгүй хойшиллоо. УИХ-ын Тамгын газрынхан хурууны хээ уншигч төхөөрөмжийг засч байна.