Ийм нэртэй хөөрхөн контент залуус санаачилсан байна лээ. Аль нэг нам эвслийг дэмжээгүй, залуусаа сонгуульд идэвхтэй оролцуулахыг уриалсан нь сонгуулийн сурталчилгааны үеийн хамгийн сонирхолтой, хөөрхөн контент байлаа. Үзэсгэлэнтэй хөөрхөн залуус дээлээр гангарч энд тэнд алхаж яваа зургаа тавьжээ. Үзүүштэй, сэтгэл татам. Сонгуульдаа идэвхтэй оролцохыг үеийн залуусдаа уриалсан нь тэр. Хуучны цагт хамгийн шинэ, өнгөлөг дээлээ өмсөөд өглөө эртлэн босч хос мориор гангарч, сонгуулиа өгөхөөр явдаг байсан тухайгаа настнууд хуучилдаг. Юун наадам, юун цагаан сар л болдог байсан юм байх. Тэд сонгуульдаа идэвхтэй оролцдог. Одоо ч тэр хуучны ганган дээлтэй өвөө, эмээ нар л хамгийн түрүүнд саналаа өгөхөөр оччихсон байдаг. Тэдний энэ хатуу идэвх бидний залхуу хойргийг дийлээд байна, залуус аа. Хатуу диктатур ч нөлөөлдөг байсан биз. Тэдний энэ идэвх сонгуулийн дүнд шууд нөлөөлдөг. Бидний ирээдүйг тэд тодорхойлсоор ирсэн гэсэн үг шүү дээ.
Ардчилсан парламентын найм дахь удаагийн сонгууль болж байна. Залуучууд бид сонгууль бүрээр идэвхгүй оролцдогоороо дуудуулдаг. Одоо харин тэгж гэнэдэхээ больцгооё. Гоё дээлээ өмсөөд эртээ босоод санал өгөх байр луугаа жирийлгэе. Эмээ, өвөөгөөс хурдаараа хоцорвол онигоо шүү дээ. Өөрийнхөө ирээдүйн төлөө сонголтоо хийж, “саналаа өглөө” гэсээр бардам алхаад гараад ирээрэй. За залуус аа хурдлаарай, би ч бас эрхээ эдэлж, үүргээ биелүүлэхээр саналаа “өглөө” шүү.