“Өдрийн сонин”-ы пүрэв гаригийн дугаар 20 нүүрээр хэвлэгдэн уншигч таны гарт хүрлээ. Манай сурвалжлах хэсэг Хавдар судлалын үндэсний төвийн өргөтгөлийн барилгын ажилтай газар дээр нь очиж танилцлаа. Одоогоор барилгын ажил 70 хувьтай явж байгаа бөгөөд санхүүгийн хүндрэл гарахгүй бол ирэх зургадугаар сард ашиглалтад бүрэн хүлээлгэж өгөх боломжтой аж. Энэ талаарх дэлгэрэнгүйг “Өдрийн сурвалжлага” буландаа орууллаа.
Түүхийн жимээр буланд “Монголын 37 ронин” хэмээх сонирхолтой материал орлоо. Холливудад өнгөрсөн жил нээлтээ хийн ашиг орлогоороо тэргүүлсэн “47 Ronin” уран сайхны кинонд 1701-1072 оны Японы 47 дайчин эрсийн баатарлаг гавъяа, эр зоригийг өгүүлсэн бөгөөд тэд үхнэ гэдгээ мэдсэн ч өөрсдийн шударга ёсны төлөөх тэмцлийг шантралгүй үргэлжлүүлсээр, зорьсондоо хүрч чаддаг. Тэгвэл XX зууны эхэнд, эр зориг, хүч чадлаараа тэдэнтэй дүйхээр Гэндэн гүний 37 цэргийн талаарх сонирхолтой баримтыг 12 дугаар нүүрнээс уншаарай.
Манай сонины долдугаар нүүрт Хятадын харъяат, өмнөд монгол иргэнээс 50 сая төгрөг нэхэж, барьцаалсан гэгдээд байгаа Баянзүрх дүүргийн иргэн Г.Түмэнжаргалын ярилцлага нийтлэгдлээ. Тэрбээр гадаадын иргэнээс мөнгө нэхэж барьцаалсан биш, харин ч эсрэгээрээ 50 сая төгрөгөө Хятадын иргэнд хулхидуулсан гэдгээ өөрийн ярилцлагадаа дурдсан юм. Гуравдугаар нүүрт Төрийн соёрхолт, нэрт сэтгүүлч Б.Цэнддоогийн “Тэнэг Үүл (Бат)” хэмээх нийтлэл хэвлэгдлээ.
Энэмэтчилэн цаг үеийн сонирхолтой нийтлэл, мэдээ мэдээллүүд өнөөдрийн дугаарт багтлаа.