Хүмүүнлэгийн ухааны их сургуулийн Сэтгүүл зүй, медиатехнологийн тэнхим, Монгол Улсын их сургуулийн Сэтгүүл зүй, олон нийтийн харилцааны тэнхим, Монгол Улсын боловсролын их сургуулийн Сэтгүүл зүйн тэнхим хамтран сэтгүүл зүйн оюутны шилдэг бүтээл шалгаруулах “Алтан үзэг” улсын VIII наадам өнгөрсөн баасан гаригт боллоо. Их, дээд сургуульд сэтгүүл зүйн чиглэлээр суралцдаг оюутнуудын авьяас чадварыг нээн илрүүлж, тэдний онолын мэдлэгийг практик үйл ажиллагаатай хослуулах замаар ирээдүйн чадварлаг сэтгүүлчдийг дэмжих зорилготой тус наадамд нийт 300 гаруй оюутан оролцож, нийтлэл, нэвтрүүлэг, радио нэвтрүүлгийн төрөлд бүтээлээ ирүүлсэн байна. Оюутны шилдэг бүтээл шалгаруулах “Алтан үзэг” наадмын “Гранпри”- байрт орсон оюутанд, өргөмжлөл, 500.000 төгрөг, төрөл тус бүрээс нэгдүгээр байр өргөмжлөл, 200.000 төгрөг, хоёрдугаар байр өргөмжлөл, 150.000 төгрөг, гуравдугаар байр өргөмжлөл, 100.000 төгрөг тус тус олголоо. Мөн анхны “Алтан үзэг” наадмаас эхлэн “Өдрийн сонин” хамтран ажиллаж, өөрийн нэрэмжит шагнал, төгсөөд сониндоо ажиллах эрх олгодог уламжлал тогтсон билээ. Тэгвэл энэ жилийн “Өдрийн сонин”-ы нэрэмжит шагналыг “Ноён Эллиотийн “боолууд” хэмээх нийтлэлээрээ Монгол Улсын их сургуулийн Сэтгүүл зүйн IV дамжааны оюутан Э.Маралмаа хүртлээ.
Энэхүү уралдааны талаар ХИС-ийн Сэтгүүл зүй, медиатехнологийн тэнхимийн эрхлэгч Д.Дагиймаа “Жил тутам өргөжин тэлж буй “Алтан үзэг” наадамд оролцох оюутнуудын бүтээлийн чанар чансаа ч сайжирсаар байна. Энэ нь сэтгүүлч болох хүсэл мөрөөдөлдөө хөтлөгдөн, уг мэргэжлээр суралцагч оюутнуудад ур ухаанаа дайчлан, авьяас чадвараа нээх боломжийг олгож байдаг тус наадмын үр нөлөөг илтгэж байна” гэв.
Э.ТҮВШИН
