“Өдрийн сонин”-ы урлаг, спорт чөлөөт цагийн мэдээллийн албаны дарга, “Болор цом”-ын эзэн, яруу найрагч Норовын Гантулга Монголын зохиолчдын эвлэлийн Удирдах зөвлөлийн гишүүнээр томилогдлоо. Тэрбээр энэ тухайгаа өөрийн цахим хуудаснаа ийн нийтэлжээ.
“Монголын зохиолчдын их хурлаар Удирдах зөвлөлийн гишүүний хариуцлагатай албанд томилогдлоо. Хамгийн өндөр санал авсан хүмүүний нэг болов. Их утга зохиолын ахмад үеийнхэн, идэр залуу дунд үеийнхэн, анд нөхөд, дүү нартаа ихэд баярлалаа. Яасан их итгэл хүлээлгэсэн, ямар их хүндэтгэл вэ гэж бодож сууна. Ерөн жилийнхээ ойтой золгож буй Зохиолчдын эвлэлийнхээ ачааны хүндийг үүрэлцэж, Монголын үе үеийн утгын их мэргэдийн шүншиг оршсон гэрэлт өргөөнд яруу найрагчдынхаа төлөөлөл болсондоо баярланам. Хийж бүтээхийн ирмүүн их хүсэл тэмүүллээр бялхан байна. Улс Монголынхоо оюун санааны тусгаар тогтнолын дархлаа болсон билгүүн авьяастнуудын минь алдар суу цагийн цагт бадрах болтугай. Удвал ахайтны санаачилсан уран зохиолын ордон улам дээшээ мандана аа. Хамтдаа зүтгэцгээе” хэмээсэн байв.
Э.МӨНХ