“Өдрийн сонин”ы- пүрэв гаригийн шинэ дугаар уншигч таны гар дээр очиж байна. Нийслэлийн нийтийн тээвэрт дотоодод үйлдвэрлэсэн цахилгаан автобус ашиглахаар болж. Өөр ч олон шинэчлэл хийхээр төлөвлөсөн байна. Нийтийн тээвэр тойрсон асуудлаар бэлтгэсэн өдрийн сурвалжлага I, III нүүрэнд нийтлэгдлээ.
Үндсэн хуулийн хэлэлцүүлэг ид өрнөж буй энэ үед манай сонин УИХ-ын гишүүн, хуульч, судлаач, эрдэмтэн, төр нийгмийн зүтгэлтэн гээд салбар бүрийнхний байр суурийг хүргэж байгаа билээ. Энэ удаа УИХ-ын гишүүн А.Ундраа байр сууриа илэрхийллээ. Найр наадмын цагаар Үндсэн хуулийн хэлэлцүүлэг өрнөж буй нь анхаарал сарних, элдэв хэрэггүй заалт тусах гэх мэт маш олон эрсдэлтэй гэж тэрээр онцолсон юм.
Монголын зэсийн экспортыг математикийн шинжлэх ухааны “тоглоомын онол”-оор харж, хэрэглээний матемиатикчдын олон улсын хуралд илтгэл хэлэлцүүлсэн эдийн засагч Ч.Отгочулуутай манай сэтгүүлч ярилцжээ. Дэлхийд зэсийн баяжмал үйлдвэрлэх дундаж өртөг 2500 ам.долларт хэлбэлздэг бол манайд 4500 ам.доллараар хэмжигддэг гэх мэт сонирхож унших баримт, гаргалгаа олонтой энэ ярилцлага I, XI нүүрэнд нийтлэгдлээ.
Хятадаас импортолдог мотоциклууд малчдын амь насанд заналхийлэх болсон гэж Тээврийн цагдаагийн мэргэжилтэн хэлж байна. Түүний ярилцлагыг I, VII нүүрэнд онцоллоо.
Ардчилсан хувьсгал эхэлж байх цагийн Ц.Элбэгдоржийн өдрийн тэмдэглэл, Ерөнхийлөгч Х.Баттулгын АНУ-д хийж буй айлчлал, дэлхийг сандаргаад эхэлчихсэн Сибирийн түймэр манай улс руу орж ирэх магадлал хэр байгаа тухай тодруулга, гурван давхар тэтгэвэр авах тогтолцоотой болохын тулд юу хийх ёстой талаарх судлаачийн байр суурь гэх мэт анхаарал татсан нийтлэл, ярилцлага, сурвалжлага, мэдээлэл манай сонины өнөөдрийн дугаарт багтлаа.
