Засгийн газраас төрийн үйлчилгээг иргэдэд хурдан шуурхай хүргэх зорилгоор “ТҮЦ машин” нэвтрүүлж эхэлсэн. Өнөөдрийн байдлаар төрийн үйлчилгээний ТҮЦ машинаар дамжуулан 442 мянга гаруй иргэн улсын бүртгэлийн лавлагаа авснаас иргэний үнэмлэхийн лавлагааг хамгийн их буюу 221 мянган иргэн аваад байгаа ажээ.
ТҮЦ машинаар дамжуулан иргэд 10 гаруй төрлийн үйлчилгээг авч байгаагаас төрсний гэрчилгээний, иргэний үнэмлэхийн, оршин суугаа хаягийн тодорхойлолт, гэрлэлт цуцлалтын, гэрлэлт бүртгэлгүй тухай лавлагаа болон эд хөрөнгийн эрхийн бүртгэлийн, хуулийн этгээдийн бүртгэлийн лавлагаа зэрэг улсын бүртгэлийн 10 төрлийн үйлчилгээг авч байгаа билээ.
Цахим машины тусламжтайгаар иргэд өмнө нь 18 төрлийн үйлчилгээ авч байсан бол одоо орон нутагт суурилуулсан нийт 108 ТҮЦ машинаас 20 төрлийн үйлчилгээ авч байгаа аж.
Хамгийн сүүлд Улсын бүртгэлийн ерөнхий газраас иргэд ТҮЦ машинаар дамжуулан дахин авах буюу хаясан, гээсэн, гэмтээсэн цахим үнэмлэхийг захиалахаас гадна аж ахуйн нэгжтэй эсэх талаарх лавлагаа авах үйлчилгээг нэвтрүүлсэн байна.