Цагдаагийн байгууллагад 2023 оны аравдугаар сарын 17-ны 06:40 цагт Сонгинохайрхан 6 дугаар хорооны нутаг дэвсгэрт байрлах автобусны буудлын ТҮЦ-ийн “Худалдагчийн орлогыг дээрэмдсэн” гэх дуудлага, мэдээлэл бүртгэгджээ.
Энэ талаар ЦЕГ-аас “Сонгинохайрхан дүүргийн цагдаагийн газрын хоёрдугаар хэлтсээс эрэн сурвалжлах ажиллагааг шуурхай явуулж, ТҮЦ-ийн худалдагчийг 26 настай, эрэгтэй “М” гэгч үйлдсэнийг илрүүлэн, мөрдөн шалгах ажиллагааг үргэлжлүүлж байна” гэв.
Иймд дараах сэрэмжлүүлэг хүргэж байна.
- Үйл ажиллагаа явуулж буй байр, орон сууц, ойр орчинд Монгол Улсын MNS 6423:2019 “Теле хяналтын системийн техникийн ерөнхий шаардлага”-д нийцсэн хяналтын камер суурилуулах,
- Хүнгүй, гэрэлтүүлэггүй, камергүй газраар аль болох явахаас зайлсхийх,
- Архи, согтууруулах ундааны зүйл хэтрүүлэн хэрэглэхгүй байх, баталгаатай дуудлагын жолооч, такси үйлчилгээгээр үйлчлүүлэх, эрсдэл бүхий замыг сонгохгүй байх,
- Бага насны хүүхэд зэрэг биеэ хамгаалах чадваргүй хүнийг гэртээ ганцааранг нь үлдээхдээ танихгүй хүнд хаалгаа нээж өгөхгүй байхыг тогтмол сануулах,
- Байнга сонор сэрэмжтэй байж, сэжигтэй үйлдэл, этгээдийн талаар цагдаагийн байгууллагын 102 тусгай дугаарт шуурхай мэдээлэхийг зөвлөлөө.
Эрүүгийн хуулийн 17.2 дугаар зүйлд зааснаар дээрэмдэх гэмт хэрэг үйлдвэл хорих ял оноодог байна.
1. Бусдын эд хөрөнгийг илээр, хүч хэрэглэхгүйгээр, хууль бусаар авсан бол зургаан сараас таван жил хүртэл хугацаагаар зорчих эрхийг хязгаарлах, эсхүл зургаан сараас таван жил хүртэл хугацаагаар хорих ял шийтгэнэ.
2. Бусдын эд хөрөнгийг хүч хэрэглэж, хүч хэрэглэхээр заналхийлж авахаар довтолсон бол хоёр жилээс найман жил хүртэл хугацаагаар хорих ял шийтгэнэ.
3. Энэ гэмт хэргийг:
3.1. байнга үйлдэж амьдралын эх үүсвэр болгосон;
3.2. зэвсэг, тусгайлан бэлтгэсэн зэвсгийн чанартай зүйл хэрэглэж үйлдсэн;
3.3. зохион байгуулалттай гэмт бүлэг үйлдсэн бол таван жилээс арван хоёр жил хүртэл хугацаагаар хорих ял шийтгэнэ.