Сар шинийн өмнө жил бүр Үндэсний бүтээн байгуулалтын дээд шагнал-Төрийн гэрэгэ шагналыг Монгол Улсын Ерөнхийлөгчийн зарлигаар олгодог. Тус шагналыг шагналыг нийгэм, эдийн засаг, оюун санааны ертөнцөд шинэ жишиг гаргаж, олон улсын стандартад хүрсэн, улс орныхоо өрсөлдөх чадварын нэрийн хуудас болж чадсан, бизнесийн шинэ чиглэлийн хөгжилд хувь нэмэр оруулсан дэд бүтэц, үйлдвэрлэл, хөдөө аж ахуй, газар тариалан, аялал жуулчлалын салбарын үйлдвэрлэл, барилга байгууламж, улсын нэр хүндийг өргөсөн, өв соёл, үндэсний уламжлалыг сэргээсэн бүтээл туурвилыг шалгаруулж гардуулдаг аж.
Харин уг нэр хүндтэй шагналыг өнөөдөр Дархан төмөрлөгийн үйлдвэр, МАК-ийн удирдлагууд гардаж авлаа.
2015 онд тус үйлдвэр ХБНГУ-ын технологиор барилгын хийт бетонын дүүргэгч материалын үйлдвэрийг ашиглалтад оруулсан бөгөөд жилдээ 270 мянган куб бүтээгдэхүүн үйлдвэрлэх хүчин чадалтай. Ийм бүтээгдэхүүнийг үйлдвэрлэдэг болсноор барилгын өөрийн өртгийг багасгах, байгаль орчинд ээлтэй зэрэг олон давуу талтай гэж үзсэн юм.
Дархан төмөрлөгийн үйлдвэрийн захирал Д.Батжавхлан: “Монгол Улсын хөрсөн доор байгаа төмрийн хүдрээ боловсруулж нэмүү өртөг шингээн эцсийн ган бүтээгдэхүүн үйлдвэрлэж улсаа ган үйлдвэрлэгч улс болгохоор ажиллаж байна. Сүүлийн дөрвөн жилийн турш энэ төсөл дээр ажиллаж байгаа. Төслийн маань дэд бүтцийн нэгээхэн хэсэг болсон төмөр замын бүтээн байгуулалт маань Монгол Улсын Ерөнхийлөгчийн санаачилсан үндэсний бүтээн байгуулалтын дээд шагнал хүртэж байгаад бид бүхэн баяртай байна. Төмөр зам барих ажлын зураг төслөөс эхлээд газар шороо, далангийн ажил, хөрс, усны шинжилгээ, дохиолол хамгаалал, гүүр хоолой энэ бүхнийг монгол инженерүүд Монголын үндэсний компаниуд бүтээснээрээ онцлог. Энэ бол монголчууд том бүтээн байгуулалтыг хийж чадна, мөн төмөр замаа барьж чадна гэдгийг нотолсон үйл явдал. Монголчууд энэхүү бүтээн байгуулалтыг Ерөнхийлөгч үнэлж, шагнал хүртээсэнд маш их баяртай байна.” гэжээ.
Уг шагналыг 2011 онд “Нэпко” хэвлэлийн газраас эрхлэн гаргасан Британника нэвтэрхий толь, 2012 онд Үндэсний “Энержи Ресурс” компанийн Өмнөговь аймаг дахь Ухаа Худаг уурхайн бүтээн байгуулалт, 2014 онд “Гацуурт” компанийн газар тариалан, мал аж ахуйн салбарт нэвтрүүлсэн техник, технологийн шинэчлэл, бүтээн байгуулалт, Дулааны 4 дүгээр цахилгаан станцын суурилагдсан хүчин чадлыг 123 МВт-аар өргөтгөх төсөл, Хөтөлийн “Цемент-шохой” компанийн хуурай аргын технологи нэвтрүүлсэн үйлдвэрлэлд тус тус хүртээсэн юм.